അമ്മയുടെ ലോകം

Ammayude Lokam | Author : മനൂസ്

 

View post on imgur.com

 

ചീനച്ചട്ടിയിൽ വേവുപാകമായ ചമ്മന്തിയിലേക്ക് കടുക് താളിച്ചു ഒഴിച്ച് അമ്മ വാങ്ങി വയ്ക്കുന്നത് കൊതിയോടെ ഞാൻ നോക്കി നിന്നു…

 

തേങ്ങാ ചമ്മന്തിയുടെ മണം കാറ്റിലൂടെ പറന്ന് എന്റെ നാസിക ഗ്രന്ഥികളിൽ അപ്പോഴേക്കും മത്തുപിടിപ്പിച്ചിരുന്നു..

 

ചമ്മന്തി വാങ്ങി വച്ച അതേ അടുപ്പിലേക്ക് ദോശക്കല്ല് വച്ച് ദോശ ചുടാനുള്ള ഒരുക്കങ്ങൾ അമ്മ തകൃതിയായി നടത്തുന്നുണ്ടായിരുന്നു.

 

പുറത്തെ തുലാവർഷ മഴയുടെ കുളിരിൽ  ചൂട് ദോശ ചമ്മന്തിയിൽ കുളിപ്പിച്ച് കഴിക്കുവാൻ ഞാൻ എന്ന എട്ട് വയസ്സുകാരന് കൊതിയായി.

 

ആ കൊതിയുടെ അടയാളമെന്നോണം വായിലേക്ക് തിരമാലകൾ പോൽ കൊതിവെള്ളം ഇരച്ചെത്തി.

 

“അമ്മേ… മൊരിഞ്ഞത് വേണം എനിക്ക്…”

 

ചൂടായ കല്ലിലേക്ക് എണ്ണ തൂവി ദോശമാവ് ഒഴിച്ച അമ്മയിലേക്ക് എന്റെ ആജ്ഞയെത്തി.

 

“ഓഹ് ഉണ്ണിക്കുട്ടന് അമ്മ തരാല്ലോ മൊരിഞ്ഞ ദോശ..

പക്ഷെ അമ്മയ്ക്ക് തിരിച്ചെന്ത് സമ്മാനം തരും…”

 

ഒരുവശം പാകമായ ദോശ മറുവശത്തേക്ക് ചട്ടുകം കൊണ്ട് തിരിച്ചിട്ട് അമ്മ എനിക്ക് നേരെ ചോദ്യമെറിഞ്ഞു.

 

ആ ചോദ്യമെന്നെ ഒന്ന് ചിന്തിപ്പിച്ചു..

 

സമ്മാനം വാങ്ങാൻ പണമില്ലാത്ത ഞാൻ എന്താണ് ചെയ്യുക..ആലോചനകൾ പലവിധത്തിൽ ആയി..

 

അപ്പോഴും അമ്മയുടെ മുഖത്ത് ഒളിച്ചുകളിച്ച ആ കൗശലക്കാരിയുടെ മൂടുപടം തിരിച്ചറിയാൻ ഞാൻ എന്ന കുരുന്നിന് കഴിഞ്ഞില്ല.

 

“ഉമ്മ തന്നാ മതിയോ അമ്മേ..”

 

പ്രതീക്ഷയെന്നോണം ഞാൻ ചോദിച്ചു.

 

“എനിക്ക് ഉമ്മയൊന്നും വേണ്ട… വേറൊരു സമ്മാനം മതി..”

 

പൊടുന്നനെ അമ്മ എന്റെ മുഖത്തെ പ്രതീക്ഷകളുടെ തിരിനാളത്തെ ഊതികെടുത്തി.

 

“ഉണ്ണികുട്ടാ പെരുവയറാ… അമ്മയ്ക്കാ ഉസ്കൂളിൽ പാടിയ പാട്ട് പാടി തന്നാ മതി..”