?കരിനാഗം 9? [ചാണക്യൻ] 372

ആ വാതിൽ എന്നത് രണ്ടു ഭീമാകാരമായ സർപ്പങ്ങൾ ഇഴ പോലെ കൂടിച്ചേർന്നു നിർമ്മിക്കപ്പെട്ടവ ആയിരുന്നു.

അതിനു മധ്യത്തിലായി വലിയൊരു സർപ്പ ശില്പത്തിന്റെ ശിരസ് കാണാം.

അതിന്റെ ഉടൽ ആ കവാടത്തെയും ഭേദിച്ചു കൊണ്ട് പുറത്തേക്ക് നീണ്ടിരിക്കുന്നു.

ആ സർപ്പത്തിന്റെ ശില്പം അതി വിദഗ്ധനായ ഒരു മായജാല ശില്പി നിർമിച്ചതാണ്.

ആ സർപ്പത്തിന്റെ ഉടലിലൂടെ മാത്രമേ മറ്റൊരു ലോകത്തിലേക്ക് സർപ്പ ലോകത്തിലെ സർപ്പങ്ങൾക്ക് യാത്ര ചെയ്യാൻ സാധിക്കൂ.

അതുപോലെ സർപ്പങ്ങൾക്ക് മാത്രമേ ഈ മായാജാല ശില്പത്തിലൂടെ സഞ്ചരിക്കാനാവൂ.

അല്ലാത്ത പക്ഷം ഏതെങ്കിലും നാഗങ്ങളാണ് ഇതിലൂടെ കടക്കുന്നതെങ്കിൽ കൊടിയ വിഷമായ കാളകൂടത്തിനാൽ പൊള്ളി പിടഞ്ഞു വെന്തുരുകും.

അവസാനം മരണത്തെ വരിക്കേണ്ടി വരും.

സർപ്പങ്ങൾക്ക് മാത്രമേ ഈ കാളകൂടവിഷത്തെ മറി കടക്കാനാകൂ.

സർപ്പ ശിൽപ്പത്തിന്റെ ഫണത്തിനു മുന്നിലെത്തിയതും സമീപത്തുള്ള കഠാരയിലേക്ക് രുദ്രരൂപയുടെ ദൃഷ്ടി പതിഞ്ഞു.

അവൾ ആ കഠാര പതിയെ വലതു കയ്യിലെടുത്തു പിടിച്ച ശേഷം ഇടതു കയ്യിലെ തള്ള വിരലിൽ ആ കഠാരയുടെ മൂർച്ചയുള്ള വായ്ത്തല പതിപ്പിച്ചതും ആ വിരലിൽ ഉണ്ടായ മുറിവിൽ നിന്നും ചുവന്ന നിറമുള്ള രക്തം കിനിയുവാൻ തുടങ്ങി.

അതുകണ്ടതും രുദ്രരൂപ ഒരു പുഞ്ചിരിയോടെ ആ ശില്പത്തിന്റെ ഫണത്തിൽ തന്റെ രക്തം കൊണ്ട് തിലകം ചാർത്തി.

തെല്ലൊരു നിമിഷം കഴിഞ്ഞതും ആ ശിൽപ്പത്തിന്റെ അടഞ്ഞിരിക്കുന്ന വായ പതിയെ തുറന്നു വന്നു.