?കരിനാഗം 9? [ചാണക്യൻ] 372

അവൻ ആകെ തരിച്ചിരുന്നു.

എന്തു ചെയ്യണമെന്ന് ഒരു നിശ്ചയവുമില്ലായിരുന്നു.

റോസ്മേരി അവന് സ്വന്തം സഹോദരിയെ പോലായിരുന്നു.

കൂടപിറക്കാത്ത കൂടപ്പിറപ്പ് പോലെ.

അവളുടെ വാക്കുകൾ നിരസിക്കാനും അവന് തോന്നിയില്ല.

പക്ഷെ രാധമ്മയുടെ കൂടെ ജീവിച്ചിരുന്ന ഈ ചുറ്റുപാട് വിട്ടു പോകാൻ അവൻ ആഗ്രഹിച്ചിരുന്നില്ല.

അതാണ് സത്യം.

ഇതിപ്പോ റോസ്മേരിയുടെ വാക്കുകളെ നിഷേധിക്കാനും സാധിക്കില്ല.

മഹി തന്റെ നിസ്സഹായതയിൽ അമർഷം പൂണ്ടുകൊണ്ട് മുരണ്ടു.

അതും കേട്ടുകൊണ്ടാണ് യക്ഷമി മുറിയിലേക്ക് കടന്നു വന്നത്.

വന്നപാടെ അവൾ മഹിക്ക് സമീപം ബെഡിൽ വന്നിരുന്നു കൊണ്ട് ചോദിച്ചു.

“എന്താ മഹി മുഖം വല്ലാതിരിക്കുന്നെ?”

അവളുടെ ചോദ്യം കേട്ടതും മഹി മുഖം വീർപ്പിച്ചിരുന്നു.

അവന്റെ ഈ ഭാവ മാറ്റം കണ്ടു യക്ഷമിക്ക് ഒന്നും മനസിലായില്ല.

എങ്കിലും അത്‌ അറിയാനുള്ള ത്വര അവളിൽ നിറഞ്ഞു നിന്നു.

അവൾ പതിയെ ബെഡിൽ അലസമായി കിടക്കുന്ന മഹിയുടെ കൈ വിരലിൽ പതിയെ സ്പർശിച്ചു.

ആ സ്പർശനത്തിലൂടെ മഹിയുടെ മനസ് വായിക്കുകയായിരുന്നു അവളുടെ ലക്ഷ്യം.

മഹിയുടെ വിരലിൽ പതിയെ യക്ഷമിയുടെ കൈ വിരൽ പതിഞ്ഞതും നിമിഷ നേരം കൊണ്ട് ഒരു മിന്നൽ പിണർ മഹിയിൽ നിന്നും യക്ഷമിയുടെ വിരലിലൂടെ മേനിയിലേക്ക് പ്രവഹിച്ചു.

തന്നിലേക്ക് പ്രവഹിച്ച ആ മിന്നൽ പിണറിന്റെ അസാമാന്യ ശക്തിയിൽ അവളാകെ കുഴഞ്ഞു പോയി.

യക്ഷമിയുടെ ശരീരം വെട്ടി വിയർത്തു.

ഹൃദയമിടിപ്പ് മൂന്നിരട്ടിയായി മാറി.