?കരിനാഗം 9? [ചാണക്യൻ] 372

മാദ്രിയമ്മ ആ രത്നത്തിനായി അവൾക്ക് നേരെ കൈ നീട്ടി.

അതുകണ്ടതും മുത്തശ്ശിക്ക് അവൾ ചിന്താമണി കൈ മാറി.

രത്നം കിട്ടിയതും മാദ്രിയമ്മ അത്‌ തലങ്ങും വിലങ്ങും പരിശോധനക്ക് വിധേയമാക്കി.

ചിന്താമണി മുഖത്തോട് അടുപ്പിച്ചു ഇടതു കണ്ണടച്ച് പിടിച്ചു വലതു കണ്ണിൽ ഫോക്കസ് ചെയ്ത് കുറെ നേരം ഉറ്റു നോക്കി.

അതിനു ശേഷം ആ വനത്തിൽ അങ്ങിങ്ങായി അരിച്ചിറങ്ങുന്ന സൂര്യ പ്രകാശത്തിൽ ചിന്തമണി രത്നം വച്ചു നോക്കി.

സൂര്യപ്രകാശത്തെ ആ രത്നം സ്വീകരിച്ചു മഴവില്ലുകളായി പുറം തള്ളി.

രത്നത്തിൽ നിന്നും ബഹിർഗമിക്കുന്ന മഴവിൽ കണ്ടതും മാദ്രിയമ്മ ചിരിയോടെ അവർക്ക് സമീപം നടന്നു വന്നു.

“മക്കളെ ഇത് ഒറിജിനൽ തന്നെയാണ്…. നാഗ ലോകത്ത് മാത്രം ഉണ്ടാകുന്ന ചിന്താമണി രത്നം….. ഏകദേശം 250 വയസോളം ആയുസ് ഇതിനുണ്ട്.”

“എന്ന് വച്ചാൽ?”

യക്ഷമി ഒന്നും മനസിലാവാതെ മുഖം ചുളിച്ചു കൊണ്ട് അവരെ നോക്കി.

“എന്ന് വച്ചാൽ 250 വർഷങ്ങൾക്ക് മുൻപ് ഉണ്ടായതാണ് ഈ രത്നം.”

“അതെങ്ങനെ മാദ്രിയമ്മക്ക് അറിയാം?”

വീണ്ടും യക്ഷമിയുടേതായിരുന്നു ചോദ്യം.

“മകളെ ഒരു ചിന്താമണി രത്നം സൃഷ്ടിക്കപ്പെട്ടു കഴിഞ്ഞാൽ അതിൽ നിന്നും കണ്ണഞ്ചിപ്പിക്കുന്ന പ്രകാശം അനന്തമായി പുറപ്പെടുവിക്കും…… പിന്നീട് ശതകങ്ങൾ തോറും അതിന്റെ പ്രകാശ തീവ്രത കുറഞ്ഞു വരും…… ഏകദേശം ആയിരം വർഷങ്ങൾ ആകുമ്പോഴേക്കും ആ രത്നത്തിന്റെ പ്രകാശം പൂർണമായും ഇല്ലാതായി അതൊരു സാധാരണ രത്നമായി മാറും….. അപ്പോഴാണ് നാഗങ്ങൾക്ക് മരണം സംഭവിക്കുന്നത്.”