?കരിനാഗം 9? [ചാണക്യൻ] 372

അതിനു മുന്നിലേക്ക് നടന്നെത്തിയ യക്ഷമി ഒന്നാലോചിച്ച ശേഷം ആ താഴ് ഉള്ളം കയ്യിൽ അമർത്തി പിടിച്ചു ഞെരിച്ചു.

യക്ഷമിയുടെ കൈക്കരുത്തിൽ ആ താഴ് തവിടു പൊടിയായി മാറി.

ആ വാതിൽ വലിച്ചു തുറന്നുകൊണ്ട് അവൾ വീടിനു ഉള്ളിലേക്ക് കടന്നു.

എല്ലാം പഴയ പോലെ തന്നെ.

പക്ഷെ ആകമാനം പൊടിമയമായി ആകെ അലങ്കോലമായി കിടപ്പുണ്ട്.

ഉടുത്തിരുന്ന സാരിയുടെ തുമ്പ് എളിയിൽ തിരുകി വച്ച ശേഷം യക്ഷമി മഹിയുടെ മുറിയിലേക്ക് നടന്നു.

അവിടെ നിൽക്കുമ്പോൾ രാധമ്മയുടെ ഓർമ്മകൾ അവളെ വല്ലാതെ അലട്ടുന്നുണ്ടായിരുന്നു.

ഒന്നു രണ്ടു ദിവസത്തെ പരിചയമേ ഉള്ളൂ എങ്കിൽ പോലും രാധമ്മയുമായി നല്ലൊരു ആത്മ ബന്ധം അവൾക്ക് ഉണ്ടായിരുന്നു.

ആ ഓർമ്മകൾ അയവിറക്കിക്കൊണ്ട് അവൾ മഹിയുടെ റൂമിലേക്ക് കയറി ചെന്നു.

അവിടെ ഒരു മൂലക്കായി ഒരു ട്രാവൽ ബാഗ് ഉണ്ടായിരുന്നു.

അതു തുറന്നു വച്ചു മഹിയുടെ ഡ്രെസ്സുകൾ അവൾ അതിലേക്ക് നിറക്കാൻ തുടങ്ങി.

കുറെ ഡ്രെസ്സുകൾ ബാഗിൽ നിറച്ചു വച്ചു കഴിഞ്ഞതും അവിടെയുള്ള ഒരു കുഞ്ഞലമാര യക്ഷമി കണ്ടു.

മഹിയുടെ സർട്ടിഫിക്കറ്റ് അതിൽ ആയിരിക്കുമെന്ന അനുമാനത്തിൽ അവൾ ആ അലമാരക്ക് സമീപം നടന്നു വന്നു അതിന്റെ വാതിൽ വലിച്ചു തുറന്നു.

ആ അലമാരയുടെ വാതിൽ തുറന്നതും പൊടുന്നനെ ഒരു എനർജി ഫ്ലോ അവളെയും തഴുകികൊണ്ട് കടന്നു പോയി.

യക്ഷമി പൊടുന്നനെ സ്തബ്ധയായി.

നാഗമാണിക്യത്തിന് സമാനമായ ഒരു പോസിറ്റീവ് തരംഗങ്ങൾ ആയിരുന്നു അത്‌.

ആകാംക്ഷയോടെ അവൾ ആ അലമാര മുഴുവനും പരതി നോക്കി.

അതിന്റെ ഉറവിടം അറിയുവാനായി.