?കരിനാഗം 9? [ചാണക്യൻ] 372

അതോടൊപ്പം ആ സർപ്പ ശിൽപ്പത്തിന്റെ വായിലുണ്ടായിരുന്ന നാവും കൂർത്ത പല്ലുകളും പതിയെ പിൻവലിഞ്ഞു.

അതുകണ്ടതും ഒരു പൊട്ടിച്ചിരിയോടെ രുദ്രരൂപ തന്റെ ഇരു കൈവിരലുകളിലും ചിന്മുദ്ര പ്രകടിപ്പിച്ചു.

അത്‌ പ്രകടിപ്പിച്ചു കഴിഞ്ഞതും രുദ്രരൂപയുടെ അരയ്ക്ക് മേൽപ്പൊട്ടുള്ള മനുഷ്യ ഉടൽ പൂർണമായും സർപ്പ രൂപമായി മാറി.

അഞ്ഞൂറിലധികം ഫണങ്ങളുള്ള സർപ്പ ലോകത്തിലെ രാജകുമാരി രുദ്രരൂപ തന്റെ ഭീമാകാരമായ ഉടൽ പ്രദർശിപ്പിച്ചുകൊണ്ട് നിലത്തിഴഞ്ഞു.

തലയെടുപ്പോടെ.

പൂർണ ചന്ദ്രന്റെ വെട്ടി തിളങ്ങുന്ന നീല നിലാവിൽ രുദ്രരൂപയുടെ ഫണങ്ങൾ വലിയൊരു വൃക്ഷത്തലപ്പ് പോലെയാണെന്ന് അവിടുള്ള അനുചരന്മാർക്ക് തോന്നി.

ശംഖൊലിയെക്കാൾ പവിത്രവും വശ്യവും കർണ മധുരതരവുമായ രുദ്രരൂപയുടെ ശീൽക്കാരം സർപ്പ ലോകമാകെ മുഴങ്ങി കേട്ടു.

തുടർച്ചയായ ആ ശീൽക്കാരത്തിന്റെ പ്രതിഫലനമെന്നോണം തറയിലെ മണൽ തരികളെല്ലാം ചുഴലിക്കറ്റ് പോലെ മുകളിലേക്കുയർന്നു തുടങ്ങി.

ആരെയോ വധിക്കാനുള്ള കൊല വെറി തന്നെയായിരുന്നു ആ ശീൽക്കാരത്തിന് പിന്നിൽ.

രുദ്രാരൂപ തന്റെ അഞ്ഞൂറിലധികം ഫണങ്ങളെ ഞൊടിയിടയിൽ ഏകീകരിച്ചു കൊണ്ട് ഒരു ഫണമാക്കി മാറ്റി.

ഒരു ശിരസ്സും ഉടലുമുള്ള സർപ്പമായി മാറിയ അവൾ ആ മായാജാല സർപ്പ ശില്പത്തിലേക്ക് ഞൊടിയിടയിൽ നൂഴ്ന്നു കയറി.

പുറമെ നിന്നു കണ്ടാൽ ആ ശില്പം അവളെ വിഴുങ്ങുന്നത് പോലെ തോന്നും.

ആ സർപ്പ ഉടലിലൂടെ ഇഴഞ്ഞു നീങ്ങിയ രുദ്രരൂപ പതിയെ സർപ്പ ലോകത്തിനു വെളിയിലെക്കെത്താനുള്ള പ്രയാണം ആരംഭിച്ചു.

ആ ശില്പ ഉടലിന്റെ മറുവശത്തൂടെ ഇഴഞ്ഞിറങ്ങിയ അവൾ അവസാനം എത്തി ചേർന്നത് സമുദ്രത്തിന്റെ അടിത്തട്ടിലേക്ക് ആയിരുന്നു.