?കരിനാഗം 12?[ചാണക്യൻ] 413

മഹി ഏകദേശം കേരളത്തിൽ കാലു കുത്തിയ സമയം തന്നെയാണ് കേരളക്കരയിൽ രുദ്രരൂപയും പ്രവേശിച്ചത്.

എല്ലാം നിമിത്തം.

നല്ലൊരു ഒളിത്താവളം തേടി രുദ്രരൂപ യാത്രയായി.

രുദ്രരൂപ എത്തിചേർന്നിരിക്കുന്നു എന്ന വിവരം കരിനാഗങ്ങൾക്കിടയിൽ കാട്ടു തീ പോലെയാണ് പരന്നത്.

വൈകുന്നേരം നല്ല മയക്കത്തിൽ നിന്നും മഹി എഴുന്നേറ്റപ്പോഴാണ് റോസ്മേരിയുടെ ഒച്ചപ്പാട് ഹാളിൽ നിന്നും മങ്ങിയ രീതിയിൽ മഹി കേൾക്കുന്നത്.

അവൻ പയ്യെ ബെഡിൽ എഴുന്നേറ്റിരുന്നു.

ഉറക്കപ്പിച്ച് കാരണം അവന്റെ കണ്ണുകൾ അടഞ്ഞു പോകുന്നുണ്ടായിരുന്നു.

ബെഡ് തന്നെ വീണ്ടും മാടി വിളിക്കുന്ന പോലെ.

ബെഡിന്റെ പ്രലോഭനങ്ങളിൽ നിന്നും രക്ഷപ്പെട്ടു മഹി എഴുന്നേറ്റ് നേരെ ചെന്നു ഡോർ തുറന്നു.

അവിടെ ഹാളിൽ ഇരുന്നു ചായയും പഴംപൊരിയും കഴിക്കുകയാണ് റോസ്മേരി

ആഹ് വന്നല്ലോ നായകൻ….. ബാ ഇവിടിരിക്ക്….. എങ്ങനുണ്ടായിരുന്നു ഉറക്കമൊക്കെ

അടുത്തുള്ള കസേര കാട്ടികൊടുത്തു കൊണ്ടു റോസ്മേരി പറഞ്ഞു.

മഹി അവിടെയുള്ള കസേരയിൽ പയ്യെ ഇരുന്നു.

ആ സമയം മറിയം കയ്യിൽ ഒരു ഗ്ലാസ് ചായയുമായി അവിടേക്ക് എത്തി.

ചായയും പഴംപൊരിയും കിട്ടിയ മഹി അത്‌ ആസ്വദിച്ചു കഴിച്ചു.

രാധമ്മ ആക്കി തരാറുള്ള പഴംപൊരി ആയിരുന്നു അവൻ ഓർത്തുകൊണ്ടിരുന്നത്.

നല്ല മൊരിഞ്ഞ പഴം പൊരിയും ചൂട് ചായയും

എന്നും മഹിയുടെ ഫേവറിറ്റ് ആയിരുന്നു.

റോസ്മേരിയുടെയും മറിയത്തിന്റെയും കൂടെ അവൻ സമയം ചിലവഴിച്ചുകൊണ്ടിരുന്നു.

അമ്മയുടെയും മകളയുടെയും സ്നേഹവും കുറുമ്പും പരദൂഷണം പറച്ചിലും ഒക്കെ മഹി നന്നേ ആസ്വദിച്ചുകൊണ്ടിരുന്നു.

ഇപ്പോഴാ ഓർത്തെ മോളെ നീ മോന്റെ ജോലി കാര്യം റെഡിയാക്കിയോ?

മറിയം ചോദിക്കുമ്പോഴാണ് ആ കാര്യം റോസ്മേരി പൊടുന്നനെ ഓർത്തത്.

അത് പറയാൻ വിട്ടുപോയി അമ്മേ……..അമയ്ക്ക് ഓർമയില്ലേ ഞാൻ പണ്ട് പഠിച്ച കോളജിൽ ഉണ്ടായിരുന്ന ഉഷ ടീച്ചറിനെ?

ഏതാ നിന്നെ ഇംഗ്ലീഷ് പഠിപ്പിച്ചതോ

ആഹ് അത്‌ തന്നെ….. ഞാനിന്ന് പുള്ളിക്കാരിയെ കണ്ടപ്പോ ഇവന്റെ കാര്യം ചോദിച്ചിരുന്നു……. ഞാൻ പഠിച്ച കോളേജിൽ ഒരു വാക്കൻസി ഉണ്ടെന്നാ പറഞ്ഞെ…. നാളെയോ മറ്റന്നാളോ ഇവനോട് പോയി കാണാൻ പറഞ്ഞിട്ടുണ്ട്….. പുള്ളിക്കാരി ഇപ്പൊ അവിടുത്തെ പ്രിൻസിപ്പാളാ

ആാാഹ….. ഉഷ ടീച്ചർ ആണോ ഇപ്പൊ അവിടുത്തെ പ്രിൻസിപ്പൽ

മറിയം ചോദിച്ചതും അതേയെന്ന മട്ടിൽ റോസ്മേരി തലയാട്ടി.

എന്താ മഹി നീയെയൊന്നും പറയാത്തെ?

മഹി മൗനമായി ഇരിക്കുന്നത് കണ്ട് റോസ്മേരി ചോദിച്ചു.