❤️✨️ശാലിനിസിദ്ധാർത്ഥം15✨️❤️ [𝓐𝓼𝓱𝔀𝓲𝓷𝓲 𝓚𝓾𝓶𝓪𝓪𝓻𝓪𝓷] 441

” ങ്ങും.. അതെയതെ.. കുറേ നാളുകൾക്ക് ശേഷമാണ് അവളെയൊന്നു ചിരിച്ചുകാണുന്നത്…” അത് കണ്ടു കൊണ്ടുനിന്ന ആവണി നെടുവീർപ്പിട്ടു.

അപ്പോഴാണ്, ‘നിൽക്ക് സിദ്ധാർഥ്.. ഞാനും വരുന്നു’വെന്നു പറഞ്ഞുകൊണ്ട് ഒരു പെൺകുട്ടി അവരെയെല്ലാവരെയും മറികടന്നു കൊണ്ട് സിദ്ധാർഥിന്റെ അടുത്തേക്ക് ഓടിചെല്ലുന്നതും അവനോടും ശാലിനിയോടും സംസാരിക്കുന്നതുമവർ കണ്ടത്.

‘ഓ സിദ്ധാർഥിന്റെ ശല്യം അങ്ങോട്ട് ചെന്ന് വലിഞ്ഞു കേറിയിട്ടുണ്ട്.. ഇനി എന്തൊക്കെ സംഭവിക്കുമെന്ന് കണ്ടറിയാം. ‘ അർജുൻ പിറുപിറുത്തത് കേട്ട് അവർ അവനെയൊന്നു നോക്കി.

“അല്ലടി കാർത്തൂ, നമ്മൾക്കും ഇതുപോലെ നടന്നാലോ…” ജയസൂര്യ, കാർത്തികയോട് ഒരു കള്ളചിരിയോടുകൂടി ചോദിച്ചു.

“കാർത്തുവോ…! ആരാടാ നാറി നിന്റെ കാർത്തു.. സിദ്ധു, ശാലുവിനെ വിളിച്ചത് പോലെ എന്നെ വിളിക്കാനാണ് ഭാവമെങ്കിൽ എന്റേന്ന് ചിലത് മേടിച്ചോണ്ടേ മോൻ ഇവിടുന്ന് പോകത്തുള്ളു.” കാർത്തിക അസൽ ഭദ്രകാളിയായി മാറി.

“എന്റെ പൊന്നോ… എനിക്ക് നിന്റെ കൂടെ നടക്കണ്ടായേ. ഇതിലും ഭേദമാണ് ആ ബ്യൂട്ടി പാർലറിലെ ചേച്ചിമാർ.. അവരൊന്നും ഇങ്ങനെയൊന്നും തെറി വിളിക്കത്തേയില്ല.. ഹൊ !”

ജയനത് പറഞ്ഞു തീർന്നതും അവന്റെയടുത്തും പിന്നിലുമായി ഒരുകൂട്ടം പൊട്ടിചിരികൾ മുഴങ്ങി. അവന്റെ കൂട്ടുകാരും, പിന്നെ അവന്റെ ക്ലാസ്സിലെ പെൺകുട്ടികളുമായിരുന്നു അത്.

“ബ്യൂട്ടി പാർലറോ ഏത് ബ്യൂട്ടി പാർലർ ???” അവന്റെ കൂടെയുണ്ടായിരുന്ന പെൺകുട്ടികൾ അവനെ കണ്ണുരുട്ടി നോക്കി.

“ങാ അപ്പോൾ നിങ്ങൾക്കാ കാര്യം അറിയില്ലല്ലേ.. എന്നാ കേട്ടോ, ഇവന്റെ വീടിനടുത്ത് ഒരു ബ്യൂട്ടി പാർലറുണ്ട്…” ആദം ജയന്റെ ചരിത്രം വിവരിക്കാനാരഭിച്ചു.

“.…സമയം കിട്ടുമ്പോഴെല്ലാം അവിടെ പോയിനിന്ന് അവിടെയുള്ള സ്റ്റാഫുകളെയും, സ്ഥിരം കസ്റ്റമേഴ്സിനെയും കൈയും കാലും കാണിച്ച് വളച്ചെടുക്കാൻ ശ്രമിക്കലാണ് ഇവന്റെ മെയിൻ പരിപാടി.”