❤️✨️ശാലിനിസിദ്ധാർത്ഥം12✨️❤️ [??????? ????????] 379

കോളേജിലെ മാറിയ സംഭവവികാസങ്ങൾ സസൂക്ഷ്മം വീക്ഷിച്ചുകൊണ്ടിരുന്ന സിദ്ധാർഥ്, അവിടെയെന്താണ് നടക്കുന്നതെന്നു അറിയാത്തത് കൊണ്ട് അർജുന്നോട് ഓരോ കാര്യങ്ങൾ ചോദിച്ചു കൊണ്ടിരുന്നെങ്കിലും അർജുൻ നിശബ്ദനായിരുന്നു.

എന്നാൽ അർജുൻതന്റെ ചോദ്യത്തിന് ഉത്തരമൊന്നും പറയാതെ നിസംഗനായി ക്ലാസ്സിലേക്ക് നടക്കുന്നത് കണ്ട് സിദ്ധാർഥിന് ചെറുതായിട്ട് ദേഷ്യം വന്നു

“എന്താടാ നിനക്ക് നാക്കില്ലേ. എടാ നിന്നോടാ ചോദിച്ചേ… ഇവിടെ എന്താ നടന്നതെന്നു….??” അവൻ അർജുന്റെ തോളിൽ തട്ടികൊണ്ട് ചോദിച്ചു.

“ഇവിടമിപ്പോൾ ഒരു പട്ടാള ക്യാമ്പായി കൊണ്ടിരിക്കുകയാണ് സിദ്ധു… നമ്മളിവിടെ സ്വാതന്ത്ര്യം നഷ്ടപ്പെട്ടവരാണ്.

ഇതിൽ കൂടുതലൊന്നും എനിക്ക് പറയാനില്ല. കൂടുതലറിയണമെങ്കിൽ നീ ആദമിനോട് ചോദിക്കണം.”

അർജുന്റെ ദയനീയമായ ഭാവം കണ്ട് കോളേജിലെന്തോ ഗുരുതരമായ പ്രശ്നമുണ്ടായിട്ടുണ്ട് എന്ന് സിദ്ധാർഥിന് മനസ്സിലായി. അപ്പോഴേക്കും അവർ ക്ലാസ്സിലെത്തിയിരുന്നു.

സിദ്ധാർഥ് ക്ലാസ്സിലെത്തിയപ്പോൾ അവിടെ ത്രിശങ്കൂസ് ഒഴികെ ബാക്കി നാല് പയ്യൻസും ഉണ്ടായിരുന്നു. അപ്പോഴാണ് ഐസക് അവരെ ശ്രദ്ധിച്ചത്..

“ങേ.. സിദ്ധാർഥ്…! ഡേയ് എല്ലാവരും നോക്കിയേ നമ്മുടെ സിദ്ധാർഥ് തിരിച്ചുവന്നിരിക്കുന്നു…” ഐസക് എല്ലാവരുടെയും ശ്രദ്ധ സിദ്ധാർഥിലേക്ക് തിരിച്ചു.

സിദ്ധാർഥിനെ കണ്ടതും പെൺകുട്ടികൾ ആകാംഷയോടെ അവനെ നോക്കുകയും, പയ്യന്മാർ അവനടുത്തേക്ക് ഓടിയെയെത്തുകയും ചെയ്തു.

സിദ്ധുവിനെ കണ്ടതും അകൂട്ടത്തിലുണ്ടായിരുന്ന ആദം വളരെ വികാരാധീനനായി അവനെ ചെന്നു കെട്ടിപിടിച്ചു.

“എടാ നീ… നീ തിരിച്ചു വന്നുവല്ലോ. ഇത്ര പെട്ടന്ന് ഇതെങ്ങനെ സംഭവിച്ചു… അർജുൻ നിന്റെ കാര്യങ്ങളെല്ലാം ഞങ്ങളോട് പറയാറുണ്ടായിരുന്നു. എന്നെന്നേക്കുമായി നീയങ്ങനെ ആ അവസ്ഥയിലായി പോകുമോന്നൊരു ഭയം ഞങ്ങൾക്കുണ്ടായിരുന്നു.” ആദം സന്തോഷകണ്ണീരണിഞ്ഞു കൊണ്ട് പറഞ്ഞു.

“എനിക്കങ്ങനെ എന്നെന്നക്കുമായി ജീവിക്കാൻ സാധിക്കാത്തത് കൊണ്ട് ഞാൻ കഴിഞ്ഞ ശനിയാഴ്ച ഉയിർതെഴുനേറ്റുവെന്ന് മാത്രം.”

സിദ്ധാർഥിന്റെ ആ ഡയലോഗ് കേട്ട് അർജുനൊഴികെ ബാക്കിയുള്ളവന്മാർ അന്തംവിട്ടു നിന്നു. അർജുന് സിദ്ധാർഥ് പറഞ്ഞതിന്റെ സാരാശം മനസ്സിലായി കഴിഞ്ഞിരുന്നു.