❤️✨️ശാലിനിസിദ്ധാർത്ഥം12✨️❤️ [??????? ????????] 379

സിദ്ധാർഥിന് മാക്സ് എന്താണ് ഉദ്ദേശിച്ചതെന്നു വ്യക്തമായില്ലെങ്കിലും അവൻ മൂളുക മാത്രമാണ് ചെയ്തത്.

“എന്നാൽ കണ്ണുകളടച്ച് ശാന്തനായിരുന്നോളൂ.. ഞാനിതാ നിന്നെ സുഖപ്പെടുത്തുവാൻ പോകുകയാണ്… ഇനിമേൽ മാനസികവും, ശാരീരികവും വൈകാരികവുമായ വിഷമതകൾ യാതൊന്നും തന്നെ നിന്നെ അലട്ടുകയില്ല…”

മാക്സിന്റെ അശരീരി അവിടെ മുഴങ്ങി തീർന്നതും, സിദ്ധാർഥ്, അതേ കിടപ്പിൽ നിന്ന് മൂന്നടി ഉയരത്തിലേക്ക് ഉയർന്നു…!

അവനൊന്നു പ്രതികരിക്കാൻ സാധിക്കുന്നതിനു മുന്നേയായിരുന്നു ഇതെല്ലാം സംഭവിച്ചത്…

ഇപ്പോൾ സിദ്ധാർഥ് അന്തരീക്ഷത്തിലിങ്ങനെ ഉയർന്നു നിൽക്കുകയാണ്…

“അയ്യ്യോ… എന്നെ താഴെയിറക് ഞാണിപ്പോ വിഴ്യും…” സിദ്ധാർഥ് നില വിളിക്കാൻ ശ്രമിച്ചു..

“എടാ നീയിങ്ങനെ പേടിക്കല്ലേ…! ഞാനല്ലേ നിന്റെ കൂടെയുള്ളത്. ഞാൻ നിന്റെ കൂടെയുള്ളപ്പോൾ നിനക്കൊന്നും പറ്റില്ല ”

മാക്സിന്റെ സ്വരം കേട്ടതോടെ സിദ്ധാർഥ് ശാന്തനായി. അപ്പോഴേക്കും സിദ്ധാർഥിന് മാക്സിൽ വിശ്വാസമുണ്ടായി ക്കഴിഞ്ഞിരുന്നു. കുറച്ച് കഴിഞ്ഞതും മുറിയുടെ മദ്ധ്യേ നിന്നിരുന്ന ആ പ്രകാശരൂപത്തിൽ നിന്ന് സ്വർണ-പിംഗല വർണത്തിലുള്ള തിളക്കമുള്ള പുകപടലങ്ങൾ, അവന്റെയടുത്തേക്ക് കടന്നു വന്നു.

മാക്സിന്റെ അശരീരിയായ സ്വരം, ഏതൊക്കെയോ വിവിധ ഭാഷകളിലെ ശക്തമായ മന്ത്രങ്ങൾ ഉരുവിട്ടതും, ആ പുക, പതിയെ മന്ത്രങ്ങളുടെ രൂപം കൈകൊണ്ടു…!

സംസ്കൃതം, അറബിക്, ഹീബ്രു, പാലി, പ്രാകൃത്, മൻഡറിൻ.. തുടങ്ങി സിദ്ധാർഥിന് മനസ്സിലാകുന്നതും മനസ്സിലാവാവാത്തുമായ അനേകം ഭാഷകളിലെ മന്ത്രങ്ങളുടെ രൂപങ്ങൾ സ്വീകരിച്ച ആ പുകപടലങ്ങൾ അവന് ചുറ്റും പ്രത്യേക രീതിയിൽ വലയമായി നിന്നുകൊണ്ട് കറങ്ങാൻ തുടങ്ങി.