❤️✨️ശാലിനിസിദ്ധാർത്ഥം 7✨️❤️ [??????? ????????] 245

“എന്റെ പേര് സിദ്ധാർഥ്.. മൊത്തപ്പേര് സിദ്ധാർഥ് സത്യറാം… എല്ലാവരും സിദ്ധുവെന്ന് വിളിക്കും.

അല്ല ചേട്ടാ, ചേട്ടൻ മംഗലശ്ശേരി കാർത്തികേയന്റെ ആരെങ്കിലുമാണോ… എന്നാ ലുക്കാ… ” സിദ്ധാർഥത്തൊന്നു ചിരിച്ചു.

” അതെ പുള്ളിയെന്റെ വകേലൊരു അമ്മാവനായിട്ട് വരും… നിന്റെ ചേച്ചിയുടെ പേര് സിതാര എന്നാണോ…” മറ്റേയാൾ തന്റെ ഗൗരവം വിട്ട്, മീശയും പിരിച്ച് പുഞ്ചിരിച്ചു കൊണ്ട് ചോദിച്ചു.

“മ്മ് അതെ.. അതെന്റെ ചേച്ചിയാ, മാത്‍സ് ഡിപ്പാർട്മെന്റിലാ പഠിക്കുന്നത്. ചേട്ടനെങ്ങനെ അറിയാം ??? “

“അതൊക്കെ അറിയാം… മോനെ. നിന്റെ ചേച്ചി എന്റെയൊരു ചങ്കത്തിയാണ്. ഇനി മോൻ ചെന്നോളൂ… ക്ലാസ്സ്‌ തുടങ്ങാറായില്ലേ.. ” അവനല്പ്പമൊന്നു നിർത്തിയിട്ട് തന്റെ കൂട്ടത്തിലുള്ള ഒരു പയ്യനെ വിളിച്ച് സിദ്ധാർഥിനെ, അവന്റെ ഡിപ്പാർട്മെന്റ് വരെ എത്തിക്കാൻ പറഞ്ഞു വിട്ടു.

“എടാ ധനുഷേ, ആ പയ്യൻ… നമ്മുടെ സിതാരയുടെ അനിയനല്ലേ…???”

ധനുഷിനോട് കൂട്ടത്തിലൊരുവൻ ചോദിച്ചു.

“അതെ.. നമ്മുടെ താരയെ പോലെ ഒരു പാവമാ അവൻ…” ധനുഷ് മന്ത്രിച്ചു.

“എടാ ആ ഗൺമാന്റെ കൂട്ടാളികൾ ഇന്നോ ഇനിയുള്ള ദിവസങ്ങളിലോ പുറത്തിറങ്ങാൻ ചാൻസുണ്ട്…”

അയാൾ ഇനിയുള്ള ദിവസങ്ങളിൽ വരുമെന്നാണ് കേൾക്കുന്നത്. ഈ പിള്ളേരെ അവന്മാർ വെറുതെ വിടുമെന്ന് തോന്നുന്നില്ല….” ധനുഷിന്റെ കൂട്ടുകാർ ആവലാതിപ്പെട്ടു.

“അങ്ങനെയാണെങ്കിൽ ഈ കോളേജിലെ നമ്മുടേതുൾപ്പടെയുള്ള മിക്ക വിദ്യാർഥിസംഘടനകളും നിരോധിക്കപ്പെടുകയും, മൊത്തത്തിലൊരു അരക്ഷിതാവസ്ഥ ഉണ്ടാകുകയും ചെയ്യും.

എന്തായാലും നിങ്ങൾ, ഇവന്മാർ മിക്കവാറും എന്നെയാ പഴയ D.K’ ആക്കി മാറ്റുമെന്നുള്ള കാര്യമുറപ്പിച്ചു വെച്ചോ….” അത് കേട്ടതും അവർ ഞെട്ടലോടെ പരസ്പരം നോക്കി.

**************************************

സിദ്ധാർഥിനെ അവന്റെ ഡിപ്പാർട്മെന്റിലെ ഒന്നാംവർഷ ക്ലാസ്സിൽ എത്തിച്ചതിനു ശേഷം കൂടെ വന്ന സീനിയർ മടങ്ങിപ്പോയി.

സിദ്ധാർഥ് അവന്റെ ക്ലാസ്സിൽ കേറിയിട്ട് അവിടെയുള്ള സെറ്റപ്പൊക്കെ നോക്കികൊണ്ട് അവന്റെ മുന്നിലുണ്ടായിരുന്ന രണ്ടു സെറ്റ് ബെഞ്ചുകളിലെ ആദ്യത്തെ നിരയിൽ കേറിയിരുന്നു. സാമാന്യം നല്ല വലുപ്പമുള്ള ക്ലാസ്സ്‌ റൂമായിരുന്നു അത്. ഒരു പ്രൊജക്ടർ സ്ക്രീൻ, ബ്ലാക്‌ബോർഡ്, തുടങ്ങി എല്ലാ അടിസ്ഥാന സൗകര്യങ്ങളും അവിടെയുണ്ടായിരുന്നു.