❤️മിണ്ടാപ്പൂച്ച❤️

Author : ᎷᎡ.LOVE

നിങ്ങളുടെ അഭിപ്രായങ്ങളും സപ്പോർട്ടും തീർച്ചയായും ആവശ്യമാണ്. വിമർശനമാണെങ്കിൽ പോലും

######

“ആ കുട്ടിയും  ഊമ തന്നെ  ആകും, ഓളെ കെട്ടിയപ്പോഴെ അവനോട് ഞാൻ  പറഞ്ഞത്, അതിനു പറഞ്ഞാൽ മനസ്സിലാവില്ലല്ലോ…. ”

ഇതിപ്പോ തുടങ്ങിയിട്ട് കുറേ ആയല്ലോ ഈ അമ്മക്കിതെന്നാത്തിൻ്റെ സൂക്കേടാണ്.

ഷോപ്പുംപൂട്ടി വരുന്ന അനൂപിൻ്റെ സ്ഥിരം റേഡിയോ ആണ് അനൂപിൻ്റെ അമ്മ. അമ്മയുടെ ഉറക്കെ ഉള്ള സംസാരം കേട്ട് കൊണ്ടാണ് ഇന്നും വീട്ടിലേക്ക് വന്ന് കയറിയത് .കരഞ്ഞു കൊണ്ട്  അകത്തേക്ക് പോകുന്ന ഗർഭിണിയായ  തൻ്റെ ഭാര്യയെ കണ്ടാണ് ഇന്നുമവൻ വീട്ടിലേക്ക് കയറിയതും.

“ഇത്രയധികം വേദനിപ്പിചിട്ടും അമ്മക്ക് ഇപ്പോഴും മതിയായില്ലേ, അവൾക്കാണെങ്കിൽ സംസാരിക്കാനും കഴിയില്ല. മിണ്ടാൻ കഴിയാത്തത് അവളുടെ തെറ്റാണോ… ആ അവസ്ഥ അമ്മക്ക് ആണ് വന്നത് എങ്കിൽ എന്താവും അവസ്ഥ എന്ന് അമ്മ ചിന്തിച്ചിട്ടുണ്ടോ ”

ദേഷ്യത്തോടെ അമ്മയുടെ മുഖത്തേക്ക്  നോക്കി പറഞ്ഞു കൊണ്ട് അവൻ അകത്തേക്ക് കയറി. പക്ഷെ അതിൽ വല്യ കാര്യമൊന്നുമില്ലന്നും അവനറിയാം അവനെനെന്തെങ്കിലും അമ്മയോട് ദേഷ്യത്തോടെ പറഞ്ഞിട്ടുണ്ടെങ്കിൽ അതിൻ്റെ പഴിമൊത്തം കേൾക്കുന്നതും അവൻ്റെ ഭാര്യയാണ്. അല്ലെങ്കിലും അച്ചൻ മരിച്ച ശേഷം മറ്റൊരു കല്ല്യാണവും കൂടി കഴിക്കാതെ തനിക്ക് വേണ്ടി മാത്രം സുഖ ദുഃഖങ്ങൾ മറന്ന്ക്കൊണ്ട്  കഷ്ടപ്പെട്ട് വളർത്തിയ അനൂപിന് അമ്മയെ സങ്കടപ്പെടുത്തുന്നത് തീരെ ഇഷ്ടമല്ലാത്തതും മറ്റൊരു വസ്തുതാപരമായ സത്യമാണ്. അത് പോലെ അവൻ്റെ ഭാര്യ സങ്കടപ്പെടുന്നതും അവനിഷ്ടമല്ലെന്നതും മറ്റൊരു വസ്തുതയാണ്.

“എന്തേലും ഒന്ന് കേട്ടാൽ  കരയാൻ  ഒരുങ്ങി ഇവിടെ ഒരാളും ” അവളെ നോക്കി പറഞ്ഞപ്പോൾ അവൾ  ദയനീയമായി കണ്ണിൽ കണ്ണീരുമായ് അവനെ തന്നെ നോക്കി നിന്നു.

ദിനംപ്രതി അമ്മയുടെ പരാതി പറച്ചിലും കുറ്റപ്പെടുത്തലും കൂടുന്നതല്ലാതെ കുറയുന്നതുമില്ല.

നിഷ്കളങ്കമായ അവളുടെ നോട്ടത്തിൽ

എന്ത് പറഞ്ഞു സമാധാനിപ്പിക്കണം എന്നറിയാതെ നിസ്സഹായനായി അവൻ മുണ്ട് എടുത്ത് ബാത്‌റൂമിൽ കയറിയപ്പോഴും ചിന്തിച്ചത് അമ്മയെപ്പറ്റിയാണ്.അമ്മയുടെ ഇപ്പോഴുള്ള മാറ്റത്തിൻ്റെ കാരണം അവനതികം ചികഞ്ഞ്  അന്വേഷിക്കേണ്ടി വന്നില്ല. അതിനുള്ള ഉത്തരവും അവന് കിട്ടിയിരുന്നു.പക്ഷെ അതിന് വേണ്ടി ഇനിയൊരു റിസ്ക്കെടുക്കാനും വയ്യ. കഴിഞ്ഞ പ്രാവശ്യം തന്നെ തലനാരിയിയക്കാണ്   ഭാര്യയിൽൽ നിന്നും രക്ഷപ്പെട്ടത്.ഇനിയും റിസ്ക്കെടുക്കാൻ വയ്യ.