❤️ദേവൻ ❤️part 19 [Ijasahammed] 230

അരയിൽ രണ്ട് കൈകൊണ്ടും ചേർത്ത് പിടിച്ചു മുഖംഅടുപ്പിച്ചു പതിയെ ചെവിയിലായി

വന്നു പറഞ്ഞ ആ വാക്കുകൾ വീണ്ടും എന്നിലെ അമ്പരപ്പിനെകുത്തനെ ഉയർത്തുകയായിരുന്നു…

ആയിരം ചോദ്യങ്ങൾ ഉള്ളിലുണർന്നെങ്കിലും എന്താണ് ആദ്യം ചോദിച്ചു തുടങ്ങേണ്ടതെന്നുപോലും അറിയാതെ കണ്ണ് മിഴിച്ചുകൊണ്ട് നോക്കി നിൽക്കുമ്പോൾ
അതിശയമാണോ, സന്തോഷമാണോ,

അതോ ജീവിതത്തിലെ ഏറ്റവും സുന്ദരമായ നിമിഷങ്ങളിലെ ആനന്ദനിർവൃതിയാണോ, ഉള്ളിൽ ഉറഞ്ഞു പൊന്തുന്നതെന്ന് തിരിച്ചറിയാൻ പറ്റുന്നില്ലായിരുന്നു…

“M.A മലയാളംകാരിക്ക് ഇംഗ്ലീഷ് പിടിത്തല്ലാന്ന്ണ്ടോ..?? !”

അല്പം കളിയാക്കികൊണ്ടുള്ള ആ ചോദ്യം കേട്ടപ്പോ ആ നെഞ്ചിൽ പതുക്കെയൊന്നു കുത്തി..

പരസ്പരംപ്രണയിച്ചു തുടങ്ങിയ നാളുകളിൽ ഓരോ പിറന്നാളിനും എത്ര തിരക്കിലും മുടങ്ങാതെ എന്നിലേക്ക് വന്നിരുന്ന ഈ വിഷസ് എന്തിനേക്കാളുമധികം എനിക്കത്രയും പ്രിയപ്പെട്ടതായിരുന്നു…

വിരഹം പേറിനടന്ന നാളുകളിൽ കടന്നുപോയിരുന്ന ഓരോ പിറന്നാളുകളും പിന്നീട് ഓർമകളുടെയും വേദനകളുടെയും മാത്രമായിമാറുകയായിരുന്നു..

അവസാനം സങ്കടക്കടലിൽ എത്തിനിൽക്കുമെന്ന് അറിഞ്ഞിട്ടും പിറന്നാൾ ദിവസം അത്രയും പ്രിയപ്പെട്ട ആ വാക്കുകൾക്ക് വേണ്ടി കാതോർത്തിരിന്നിരുന്നു..

മുമ്പത്തെ ഓർമ്മകൾ വേദനിപ്പിച്ചുകൊണ്ടിരുന്നെങ്കിലും ഒടുവിൽ എല്ലാം തിരിച്ചു എന്നിലേക്കുതന്നെ എത്തപ്പെട്ടിരിക്കുന്നു എന്ന ഓർമപ്പെടുത്തൽ മനസ്സിനെയും ശരീരത്തെയും ഒരുപോലെ കുളിർപ്പിച്ചു..

കണ്ണുകൾ അത്രമേൽ സന്തോഷം കൊണ്ട് നിറഞ്ഞു..

ചുണ്ടിൽ പ്രിയപ്പെട്ടവന് വേണ്ടി മാത്രമായി ഒരു ചിരി മൊട്ടിട്ടു ..