❤️ദേവൻ ❤️part 19

Devan Part 19 | Author : Ijasahammed

[ Previous Part ]

 

ആ മനസ്സിലും സന്തോഷത്തിന്റെ വേലിപടർപ്പുകൾ പടർന്നുകയറുന്നത് ആ കൈവലയത്തിന് ഉള്ളിൽ കിടന്ന് കൊണ്ട് ഞാൻ അറിഞ്ഞു…

അപ്പോഴും ആ കൊച്ചുനുണക്കുഴി കവിളുകൾ മനസ്സിന്റെ ഏതോ കോണിലായി തങ്ങിനിന്നിരുന്നു….

ഏകാന്തതനിറഞ്ഞ നീണ്ട പകലുകളും നോവിന്റെ ഇരുണ്ടചാലുകൾ കീറിയ രാത്രികളും എന്നിൽ നിന്നും ഓരോ ദിനങ്ങളും കൊഴിഞ്ഞു പോകുന്നതിനനുസരിച്ച് അകന്ന് പൊയ്ക്കൊണ്ടിരുന്നു.. .

ഇത്രമേൽ ഗാഡമായി ദേവേട്ടന് പ്രണയിക്കാൻ കഴിയുമെന്ന് ആ ദിവസങ്ങളിൽ ഞാൻ കൂടുതൽ കൂടുതൽ മനസ്സിലാക്കുകയായിരുന്നു…

ഭാവിയെ കുറിച്ചുള്ള ആശങ്കകളൊഴിച്ചു നിർത്തിയാൽ സന്തോഷമല്ലാതെ എന്നിൽ മറ്റൊന്നും നിറയുന്നില്ലെന്ന് ആ ദിവസങ്ങളിൽ ഞാൻ അറിഞ്ഞു തുടങ്ങി…

സ്വപ്നം കണ്ട ജീവിതം ജീവിച്ചുതുടങ്ങായിരുന്നു…

അതിനിടയിൽ ഒരുനാൾ ഞങ്ങൾക്കിടയിലേക്ക് ആ കൊച്ചുകുറുമ്പി കടന്നു വന്നു..

ആ നുണക്കുഴിക്കാരി..

നന്ദ….

അടുത്ത് വന്നു ആ കൊച്ചു നുണക്കുഴികവിളുകൾ കാണിച്ചു ദേവേട്ടനൊപ്പം നിന്ന് ചിരിക്കുമെങ്കിലും ആദ്യമൊന്നും എന്നോട് അവൾക്കത്ര അടുപ്പമൊന്നുമുണ്ടായിരുന്നില്ല…

പിന്നീടെപ്പോഴോ ദേവേട്ടനെപോലെ, ഒരുപക്ഷേ ദേവേട്ടനേക്കാൾ കൂടുതൽ അവളെന്നെ സ്നേഹിച്ചുതുടങ്ങായിരുന്നു..

ദിവസങ്ങൾ കഴിയുംതോറും അവളെന്നിൽ ആഴത്തിൽ വേരൂന്നികൊണ്ടിരുന്നു..

ഒരു നിമിഷം പോലും പിരിഞ്ഞിരിക്കാൻ ആവാത്ത വിധം അവളെന്നിലേക്ക് അടുത്തത് എന്ന് മുതൽക്കാണ്…??

അറിയില്ല…??

 

വീട്മുഴുവൻ അവളുടെ കളിപ്പാട്ടങ്ങൾ ചിതറിക്കിടന്നു..

ആ കുഞ്ഞു കളിചിരികൾക്കൊപ്പം ചിലവഴിക്കുന്ന ഓരോ നിമിഷങ്ങളിലും ദേവേട്ടനും ഞാനും എല്ലാ നോവുകളെയും തീർത്തും മറക്കുകയായിരുന്നു..

ഉറങ്ങുവോളം അരികിൽ ഇരിന്നു ഒടുവിൽ ഉറങ്ങികഴിഞ്ഞ് ആ കുഞ്ഞു നെറ്റിത്തടത്തിൽ ചുംബിച്ചു ചേർന്ന്കിടക്കുമ്പോൾ
ജന്മം കൊടുക്കാതെ തന്നെ അമ്മയാകാൻ സാധിക്കുമെന്ന് ഞാൻ അവളിലൂടെ മനസ്സിലാക്കുകയായിരുന്നു…

“ശിവാ… ”

രാത്രയുടെ അന്ത്യയാമങ്ങളിൽ ചേർന്ന് കിടന്നുകൊണ്ട് ദേവേട്ടൻ പതുക്കെ വിളിച്ചു..

മറുപടിയായി ഒന്ന് മൂളി..

” ജീവിക്കാൻ തോന്നിതൊടങ്ങാടി നിക്ക്…