❣️LIFE PARTNER❣️ 2 [ᶜ͢ᴿ͢ᴬ͢ᶻ͢ᵞ A J R] 264

“പറയാം ഒന്ന് വേഗം വാ.”

അവൾടെ കൈയും പിടിച്ച് ഞാൻ താഴെക്കോടി. സോഫയിൽ കിടക്കുന്ന ലക്ഷ്മിയെ കണ്ട് ഞെട്ടി നെഞ്ചത്ത് കൈയും വച്ച് ചേച്ചി അവിടെ തന്നെ നിന്നു.

“ദേവി.. ആരാ മോനെ ഇത്??”

“അതൊക്കെ പറയാം ചേച്ചി ഇപ്പൊ ഒന്ന് നോക്ക്.”

ചേച്ചി അവളെ പരിശോധിക്കാൻ തുടങ്ങി.

“ടാ വേഗം അകത്തേക്ക് കൊണ്ട് വാ.”

ഞാനും ഗോവിന്ദൻ മാമയും കൂടെ അവളെ എടുത്തിട്ട് ചേച്ചീടെ റൂമിൽ കൊണ്ട് പോയി.

“ആരാടാ മോനെ ഈ കൊച്ച്??”

അകത്തേക്ക് കേറിയാ പാടെ അമ്മയും കൂടെ വന്ന് ചോദിക്കുന്നുണ്ട്. ആ മുഖത്തെ ആദി ഞാൻ കണ്ടിരുന്നു. അല്ലെങ്കിലും സ്വന്തം മകൻ രാത്രി ഒരു പെണ്കുട്ടിയേം കൊണ്ട് വീട്ടി കേറി വന്ന ഏതമ്മക്കാ ആദി അവണ്ടിരിക്ക്യ?? അവളെ താഴയുള്ള ഒരു മുറിയിലേക്ക് കിടത്തുമ്പോഴും ചേച്ചി അവൾടെ ശരീരത്തിലെ മുറിവ് ഉള്ള ഭാഗങ്ങളിൽ മരുന്ന് വച്ച് കെട്ടുമ്പഴും ഞാൻ കേട്ടിരുന്നത് ‘ആരാ മോനെ ഇവൾ??’ എന്ന അമ്മയുടെ ശബ്ദമായിരുന്നു. അവളരാണെന്നുള്ള കാര്യം എനിക്ക് മാത്രേ അറിയൂ. ആ കാര്യം ഇവരിയാൻ പാടില്ല.

“ഇനി പറ ആരാ ഇവൾ??”

മരുന്ന് വച്ച് കെട്ടി അവളെ ഒന്നൂടെ നോക്കിയ ശേഷം ചേച്ചി എന്നോട് ചോദിച്ചു. ഞാൻ ഹാളിലേക്ക് നടന്നു. കൂടെ അവരും. അവരോട് എന്ത് പറയുമെന്നെനിക്ക് അറിയില്ലായിരുന്നു!

“ആരാ മോനെ അത്??”

അമ്മ വീണ്ടും ചോദിച്ചു. ഈശ്വരാ ഇവരോട് ഞാനെന്ത് പറയും??

“ഉണ്ണി അമ്മേടെ മുഖത്തേക്ക് നോക്ക്.
ആരാ ആ കുട്ടി??”

സഖാവിന്റെ മകൻ കള്ളം പറയില്ല. പറയാൻ അച്ഛൻ പഠിപ്പിച്ചിട്ടില്ല. സത്യം എല്ലാം അറിഞ്ഞിട്ട് അവർ തീരുമാനിക്കട്ടെ അവളെ ഇവിടെ നിർത്തണോ അതോ വേണ്ടയോന്ന്. അവളെ ഇവിടുന്ന് പറഞ്ഞയച്ച കൂടെ ഞാനും ഇറങ്ങും. മനസ്സിൽ ഉറച്ച തീരുമാനവും ആയി ഞാനവരോട് എല്ലാം പറഞ്ഞു.