✨️❤️ശാലിനിസിദ്ധാർത്ഥം 6❤️✨️ [ ??????? ??????] 219

” അതെങ്ങനെ…??? ആ കുട്ടി പണ്ട് നിന്റെ കൂടെ പഠിച്ചതാണോ… അതായത് പത്താം ക്ലാസ്സുവരെയെങ്ങാനും ഒരുമിച്ചു പഠിച്ചത് വല്ലതും ആണോ…” സത്യ അവനോട് ചോദിച്ചു.

” അതൊന്നും എനിക്കറിയില്ലടാ… എനിക്ക് ആകെ ഓർമ്മയുള്ളത്, ഇക്കഴിഞ്ഞ മൂന്നു വർഷങ്ങളിലെ കാര്യങ്ങൾ മാത്രമാണ്… പക്ഷേ ഇവളെ ഞാനെവിടെയോ കണ്ടത് പോലെ തോന്നുന്നു. ”

സിദ്ധാർഥ്, അവൾ പോകുന്നതും നോക്കികൊണ്ട് അവരെ കുഴപ്പിക്കുന്ന രീതിയിൽ മറുപടി പറത്തോടെ അവർ കിളിപ്പോയ മട്ടിൽ പരസ്പരം നോക്കി.സിദ്ധാർഥിന് എന്തോ പ്രശ്നമുണ്ടെന്നു അവർക്ക് തോന്നി.

അപ്പോഴാണ് ആ പെൺകുട്ടി അവരുടെ സംസാരം കേട്ടിട്ടോ അതോ ഉൾപ്രേരണയാലോ എന്താണെന്നറിയില്ല.. തിരിഞ്ഞു നോക്കി.

അവളുടെ മുഖം കണ്ട് സിദ്ധാർഥിന് ആദ്യം അത്ഭുതവും അമ്പരപ്പുമാണ് തോന്നിയത്. തന്റെ ഹൃദയത്തിലൂടെ ഒരു കൊള്ളിയാൻ പാഞ്ഞു പോകുന്നത് പോലെ തോന്നി.

അവനാ മുഖം തന്റെ വിദൂരമായ സ്മൃതിയിലൊടുങ്ങിയ ഒരു മുഖത്തോട് സാദൃശ്യമുള്ളതായി മനസ്സിലാക്കി.

“ആഹ്…അമ്മേ ” അവന് തന്റെ തലച്ചോർ കത്തുന്നത് പോലെ അനുഭവപ്പെട്ടു. അവൻ തന്റെ കൈകളെടുത്ത് ചെന്നിയിൽ വെച്ചു.

“എന്താ സിദ്ധാർഥ് എന്തു പറ്റി…??? തലവേദനയാണോ… ” അവന്റെ ഭാവമാറ്റം കണ്ട് ശിവ ചോദിച്ചു. എന്നിട്ട് ആ പെൺകുട്ടി അവിടെയുണ്ടോയെന്നു നോക്കി. ഇല്ല… അവൾ അപ്പോഴേക്കും അവളുടെ സഹോദരനോടൊപ്പം പോയ്‌കഴിഞ്ഞിരുന്നു.

“എന്തോടാ അറിയില്ല. തലച്ചോർ മൊത്തത്തിൽ പൊട്ടി പിളരുന്നത് പോലെ തോന്നുന്നു…” തലകുനിച്ചു കൊണ്ട് അവൻ വിഷമതയോടെ പറഞ്ഞു.

“എന്താ എന്തു പറ്റി സിദ്ധു..??? ” അപ്പോഴേക്കും സംഭാഷണമാവസാനിപ്പിച്ചു കൊണ്ട് ആത്രേയയോടൊപ്പം അവിടേക്കെത്തിയ അഗ്നിജിത്ത് അവന്റെ തോളിൽ കൈവെച്ചു കൊണ്ട് ചോദിച്ചു.

“അറിയില്ല ജിത്തുവേട്ടാ.. ഞാനൊരു പെൺകുട്ടിയെ കണ്ടു. ഞാനവളെ എവിടെയോ കണ്ടിട്ടുള്ള പോലെ തോന്നുന്നു.” നെറ്റിയിൽ തടവിക്കൊണ്ട് സിദ്ധാർഥ് മറുപടി നൽകി.