✨️❤️ശാലിനിസിദ്ധാർത്ഥം 5❤️✨️ [??????? ????????] 229

 

” സിദ്ധാർഥ് എന്താണ് ഈ എഴുതിയിരിക്കുന്നത്…??? ആരെയോ അവനു കൊല്ലണം. എന്നൊക്ക എഴുതിയിട്ടുണ്ട്… ” ജിത്തു ആ ബോർഡിലെഴുതിയിരുന്ന ആ വാചകങ്ങളിൽ ചിലത് വായിച്ചു.

 

” ജിത്തു, എനിക്ക് വിശ്വസിക്കാൻ പറ്റുന്നില്ല…. സദാ ശാന്തപ്രകൃതമുള്ള , എല്ലാവരോടും സ്നേഹത്തോടെ മാത്രം പെരുമാറുന്ന സിദ്ധാർഥ്, ഒരാളോട് ഇങ്ങനെ വിദ്വേഷവും പകയും പുലർത്താനുള്ള തക്ക കാരണമെന്തായിരിക്കും …???

 

” അറിയില്ല മിത്രാ, ഐ തിങ്ക് സംതിങ് ഈസ്‌ മിസ്സിംഗ്‌. എടീ എനിക്ക് തോന്നുന്നത്, സിദ്ധാർഥിന്റെ ജീവിതത്തിൽ എന്തോ സംഭവിച്ചതിന്റെ ഫലമാണ് ഇതെല്ലാം എന്നാണ്. ”

 

“ജിത്തൂ, നീ എന്താണ് ഉദ്ദേശിക്കുന്നത്…”

 

” എല്ലാം ഞാൻ വിശദമായി പറയാം… ആദ്യം ആ ബോർഡ്‌ പഴയത് പോലെയാക്ക്. എന്നിട്ട് നമ്മൾക്ക് ടെറസിൽ പോയി സംസാരിക്കാം.”

ജിത്തു അത്രയും പറഞ്ഞു കൊണ്ട് ടേബിളിലിരുന്ന ലാപ്ടോപ് ഷട്ട്ഡൗൺ ചെയ്തിട്ട് പുറത്തേക്കിറങ്ങി ; എന്നിട്ട് ടെറസിലേക്ക് നടന്നു.

 

മിത്രയാകട്ടെ, ആ ബോർഡ്‌ പഴയത് പോലെയാക്കിവെച്ചു. എന്നിട്ട്, ബെഡിൽ മയങ്ങുന്ന സിദ്ധാർഥിനെയൊന്നു നോക്കിയിട്ട്, മുറിക്ക് പുറത്തേക്കിറങ്ങി ടെറസിലേക്ക് പോകുന്ന അഗ്നിജിത്തിനെ അനുഗമിച്ചു.

 

” ഇനി പറയടാ, എന്താ നമ്മൾ ആ ബോർഡിൽ കണ്ടതിന്റെയൊക്കെ അർഥം ??? ”

 

” പറയാം… നീ പറഞ്ഞിരുന്നില്ലേ സിദ്ധാർഥിനു മൂന്നു വർഷങ്ങൾക്ക് മുൻപ്, ഒരു ആക്‌സിഡന്റ് സംഭവിച്ചിരുന്നു എന്ന്…”

 

“അതെ… അത് സിദ്ധാർഥിന്റെ പത്താം ക്ലാസ്സ്‌ വേനലവധികാലത്ത് സംഭവിച്ചതാണെന് എന്നോട് സിതാര അന്ന് പറഞ്ഞിരുന്നതായി ഓർമയുണ്ട്.

അഗ്നിമിത്ര ഓർത്തുകൊണ്ട് പറഞ്ഞു.

 

” എന്നാലത് വെറുമൊരു ആക്സിഡന്റ അല്ലായിരുന്നു … it Was an Well Planned Attack. ”

 

“എന്ത്…! എനിക്കൊന്നും മനസ്സിലാകുന്നില്ല.. നീ എന്താണീ പറയുന്നത്. സിദ്ധാർഥിനു നേരെ ആക്രമണം ഉണ്ടായെന്നോ… ആര് ??? എന്തിന് ??? ” അഗ്നിജിത്തിന്റെ ആ വെളിപ്പെടുത്തലിൽ അഗ്നിമിത്ര നടുങ്ങിപ്പോയി.

 

” അതാണ് എനിക്കും അറിയാത്തത്… അത് മൂന്നു വർഷങ്ങൾക്കു മുൻപ് സംഭവിച്ചതല്ലേ… ഇതൊക്കെ എന്റെ വെറും നിഗമനങ്ങൾ മാത്രമാണ് കൃത്യമാകണമെന്നില്ല.

ആ ബോർഡിൽ നമ്മൾ കണ്ടതനുസരിച്ചു പറയുകയാണെങ്കിൽ നമ്മളിനിയും അനേകം കാര്യങ്ങൾ കണ്ടത്തേണ്ടതുണ്ട്. ”

ജിത്തു പറഞ്ഞു നിർത്തി.

 

“പക്ഷേ അതേക്കുറിച്ചു നമ്മളെങ്ങനെ കണ്ടെത്തും ??? എന്താണതിനൊരു വഴി ” മിത്ര, തന്റെ സംശയം പ്രകടിപ്പിച്ചു.