✨️❤️ശാലിനിസിദ്ധാർത്ഥം 5❤️✨️ [??????? ????????] 229

 

“ആണോ.. ഞാനും ജിത്തുവും നാട്ടിലെ അമ്പലത്തിൽ പോയിട്ട് തന്നെ കുറേ നാളായി…”

 

” അങ്ങനെയാണെങ്കിൽ ഈ അടുക്കള പണികഴിഞ്ഞാലുടനെ മോളും ജിത്തുവും റെഡിയായി തുടങ്ങിക്കോ…! ഇപ്പോൾ മൂന്നരയാവാറായില്ലേ…” സത്യഭാമ മിത്രയോട് അത്രയും പറഞ്ഞിട്ട് ചെയ്തുകൊണ്ടിരുന്ന ജോലി വേഗത്തിലാക്കി.

 

” അമ്മേ, വൈകിട്ട് അമ്പലത്തിൽ പോകുമ്പോൾ ഉടുക്കാൻ ചേച്ചിയുടെ കൈയിൽ സാരിയൊന്നുമില്ലല്ലോ….??? ” സിതാര ചോദിച്ചു.

 

“അതൊന്നും സാരമില്ല. ഇവൾക്ക് വേണ്ടി, ഞാനൊരു സാരി വാങി മാറ്റിവെച്ചിട്ടുണ്ട്…. അതെടുത്തു കൊടുത്തോളാം. ” ഭാമയുടെ മറുപടി കേട്ട് അഗ്നിമിത്ര പുഞ്ചിരിച്ചു.

 

“എന്നാ ഭാനുവമ്മേ, ഞാൻ പോയി ജിത്തുവേട്ടനെ ഈ കാര്യം അറിയിക്കട്ടെ… ഏട്ടന് ക്ഷേത്രത്തിൽ പോകാനൊക്കെ വല്ല്യ ഇഷ്ടമാണ്.. ” പാത്രങ്ങളെല്ലാം കഴുകി വൃത്തിയാക്കിയതിനു ശേഷം മിത്ര, ജിത്തുവിനെ വിവരം അറിയിക്കാനായി പോയി.

 

” ജിത്തുവേട്ടാ… എവിടെയാ, ” മുകളിലേക്കുള്ള പടികൾ കയറി ഹാളിൽ എത്തിയ മിത്ര, ജിത്തുവിനെ വിളിച്ചു.

 

” എടീ ഇവിടെ.. ഇങ്ങോട്ട് വാ ” അവിടെയുണ്ടായിരുന്ന മൂന്നു ബെഡ് റൂമുകളിലൊന്നിൽ നിന്ന് ജിത്തുവിന്റെ ശബ്‌ദം കേട്ടയിടത്തേക്ക് മിത്ര കയറിചെന്നു.

 

“എന്താ പരിപാടി ലാപ്ടോപ്പിൽ… ആരെങ്കിലും മെസ്സേജ് അയച്ചോ …??? ”

സിദ്ധാർഥിന്റെ, റൂമിന്റെ വാതിൽ തള്ളിതുറന്ന് അകത്തു കേറിയ മിത്ര ചോദിച്ചു.

 

” എടീ പതുക്കെ സംസാരിക്ക്. ദോ നീ അപ്പുറത്തേക്ക് നോക്കിയേ… ” ജിത്തു, മിത്രയോട് പതിഞ്ഞ സ്വരത്തിൽ അപ്പുറത്തേക്ക് നോക്കാൻ പറഞ്ഞു.

 

തൊട്ടടുത്ത ബെഡിൽ സിദ്ധാർഥ്, ഉറങ്ങുകയായിരുന്നു. അതിനാലാണ് ജിത്തു സ്വരം താഴ്ത്തി സംസാരിച്ചത്.

 

സിദ്ധാർഥ് ഉറങ്ങുന്നതും നോക്കി മിത്ര കുറച്ചു നേരം അങ്ങനെ തന്നെ നിന്നു എന്നിട്ട് :

“ഓ അപ്പോൾ ഇത് ഇവിടെത്തെ രാജകുമാരന്റെ സ്വർഗ്ഗലോകമായിരുന്നോ.. ? അറിഞ്ഞില്ല ഉണ്ണീ, ആരും പറഞ്ഞുമില്ല ”

 

 

” ആഹ് തന്നെ… ഇത് അവന്റെ സ്വർഗ്ഗലോകമാണ്. ” മിത്ര പറഞ്ഞതിന്റെ പ്രതിധ്വനിയെന്നോണം ജിത്തുവും അത് തന്നെ പറഞ്ഞു.

മിത്ര, സിദ്ധാർഥിന്റെ മുറി ആകെപ്പാടെയൊന്നു നോക്കി…

 

എല്ലാം നല്ല അടുക്കും ചിട്ടയോടും കൂടിയയൊരു മുറിയാണത്. മുറിയുടെ ഒരു മൂലയിൽ നല്ല തടി കൊണ്ടുണ്ടാക്കിയ ഡ്രെസ്സിങ് കബോർഡ് ഉണ്ടായിരുന്നു ,

ബെഡിനടുത്ത് ഒരു സൈഡ്ടേബിളും ഉണ്ടായിരുന്നു. പിന്നെയൊരു സ്റ്റഡി ടേബിളും. അതിലാണ് ജിത്തു തന്റെ ലാപ്ടോപ്പുമായി വർക്ക്‌ ചെയ്തു കൊണ്ടിരുന്നത്.

 

പക്ഷേ, ബെഡ്‌റൂമിലെ ഒരു കാര്യം കണ്ട് അഗ്നിമിത്ര അത്ഭുതപ്പെട്ടു നിന്നുപോയി.