✨️❤️ശാലിനിസിദ്ധാർത്ഥം 5❤️✨️ [??????? ????????] 229

 

 

“എടീ, ജോ നിന്നോട് പറഞ്ഞത് സത്യം തന്നെയായിരുന്നു… അയാൾ.. ആ ഗൺ മാൻ സിംഗ്…” ശ്യാമിന്റെ സ്വരം ചിലമ്പിച്ചിരുന്നു.

 

” ഏതാടാ എന്തെങ്കിലും കുഴപ്പമുണ്ടോ…” സിതാരയും ഭയന്ന് തുടങ്ങിയിരുന്നു.

 

” അതേടി… അയാൾ ഈ ആഴ്ച്ച , അയാളുടെ സസ്‌പെൻഷൻ കാലാവധി കഴിഞ്ഞ് തിരികെ വരുമെന്നാണ് ജോ പറഞ്ഞത്…”

 

“എന്റെ ദേവീ… അപ്പോൾ അയാൾ ഒരു വർഷത്തെ സസ്‌പെൻഷൻ ഇടവേളയ്ക്കു ശേഷം തിരികെ വരുകയാണല്ലേ… ” ശ്യാമിന്റെ വാക്കുകൾ കേട്ട് സിതാര നെഞ്ചിൽ കൈവെച്ചു.

 

” അതേ… ഈ ആഴ്ച അയാൾ എപ്പോൾ വരുമെന്ന് ആർക്കും തന്നെ അറിയില്ല…”

 

“അല്ലടാ, അയാൾ സസ്പെൻഷനായതിനുശേഷം ഇത്ര പെട്ടെങ്ങനെ തിരികെ വന്നു…??? ” സിതാര സംശയമുന്നയിച്ചു.

 

” എടീ അത് അങ്ങേരെ പുറത്താക്കുമ്പോൾ നമ്മുടെ സ്പെഷ്യൽ എഡ്യൂക്കേഷണൽ ഓഫീസർ, ബ്രിഗേടിയർ സ്വാതി മൽഹോത്ര മാഡം ആയിരുന്നല്ലോ… അവരും ഇയാളുമായി അത്ര നല്ല സ്വരച്ചേർച്ചയിലല്ല മുന്നോട്ട് പൊയ്‌കൊണ്ടിരുന്നത്. ”

 

” അതേ…അറിയാം. ഇനി മാഡം റിട്ടയർ ചെയ്തോ ??? ”

 

” അതെ… അവര് ഇക്കഴിഞ്ഞ ജൂൺ ഒന്നിന് റിട്ടയർ ചെയ്തപ്പോൾ പുതിയതായി വന്ന സ്പെഷ്യൽ ഓഫീസർ, ഈ ഗൺ മാൻ സിംഗിന്റെ സുഹൃത്തായിരുന്നു .. അങ്ങനെ അയാൾ വഴി ഗുണനായക് മനോഹർ പഴയ പ്രിൻസിപ്പൽ പൊസിഷനിലേക്ക് തിരിച്ചു വരുന്നു…” ശ്യാം പറഞ്ഞു നിർത്തി.

 

“ചതിച്ചല്ലോടാ… ഇനി നമ്മൾ എന്ത് ചെയ്യും മല്ലയ്യാ… ” സിതാരയ്ക്ക് കരച്ചിൽ വരുന്നുണ്ടായിരുന്നു.

 

” അതാ എനിക്കും അറിഞ്ഞൂടാത്തത്… എന്ത് ചെയ്യണമെന്ന് ഒരു പിടിയുമില്ല. ” അപ്പുറത്തു ശ്യാമും നിരാശയിൽ തന്നെയായിരുന്നു.

 

” ആ പോട്ടെ അതൊക്കെ നമ്മൾക്ക് അപ്പോൾ നോക്കാം… അതിരിക്കട്ടെ, നിന്റെ അനിയത്തിയുടെ അഡ്മിഷൻ എന്തായി…??? ” സിതാര അന്വേഷിച്ചു.