✝️The NUN 5✝️ (അപ്പു) 180

ഏകദേശം 8-9 കൊല്ലങ്ങൾക്ക് മുൻപ് പുതുക്കി പണികഴിപ്പിച്ച ആ വലിയ ഇടവകദേവാലയത്തിന്റെ നടുവിൽ അൾത്താരക്ക് മുന്നിലായി ഒരു വലിയ ഡെസ്കിലാണ് അവനെ കെട്ടിയിട്ടിരിക്കുന്നത്… ദുഃഖവെള്ളി ദിവസം കർത്താവിന്റെ പൂർണരൂപം ഇറക്കി വെക്കുന്ന വലിയ മേശപോലുള്ള ഡസ്കാണത്… എത്ര ബലം പിടിച്ചാലും അത് മറിയില്ല…

അവൻ ആ കിടപ്പിൽ കിടന്ന് കുതറി… പക്ഷെ ഒന്നും സംഭവിച്ചില്ല… അവൻ മറുവശത്തേക് നോക്കി അവന്റെ രണ്ട് കൂട്ടുകാരും അലനും അവിടെ നിൽപ്പുണ്ട്… അവൻ അവരെയും ദയനീയമായി നോക്കി…

അവൻ കുറച്ചൊന്നു പൊങ്ങി അവരോടെന്തോ പറയാൻ തുടങ്ങുന്നതിന് തൊട്ടുമുൻപ് പെട്ടന്നവന്റെ മുഖഭാവം മാറി… എന്തോ അപകടം മണത്തതുപോലെ അവൻ രക്ഷപെടാനെന്നോണം ശക്തിയായി കുതറി…

അച്ചനും മദർ സുപ്പീരിയറും ആ മൂന്ന് കുട്ടികളും ഒന്ന് പേടിച്ചു…. അവർക്കൊന്നും മനസിലായില്ല… പെട്ടന്ന് അവന്റെ ഇടത്ത് വശത്തുകൂടി ഫാ. സ്റ്റീഫൻ അവനുമുന്നിലേക്ക് വന്നു…

ലോഹയും ഒരു സ്റ്റോളും ഒരുകയ്യിൽ ചെറിയ പുസ്തകവും മറുകയ്യിൽ കുരിശും പിടിച്ച് സ്വതവേയുള്ള പുഞ്ചിരിയോടെ ഫാ. സ്റ്റീഫൻ അവനുമുന്നിൽ നിന്നു…

ബെഞ്ചമിന്റെ മുഖം വന്യമായി… അവൻ സകലബലവും ഉപയോഗിച്ച് തന്റെ കെട്ടുകൾ പൊട്ടിക്കാനും അച്ചന് മുന്നിൽ നിന്ന് രക്ഷപെടാനും ശ്രമിച്ചുകൊണ്ടിരുന്നു… പക്ഷെ ആ കെട്ടുകൾ അഴിഞ്ഞില്ല…

“ബലം പിടിക്കണ്ട ബെഞ്ചമിൻ… അത് പൊട്ടില്ല… നീ രക്ഷപ്പെടാനും പോവുന്നില്ല…!!” ഫാ. സ്റ്റീഫൻ ഒരു ചിരിയോടെ അവനോട് പറഞ്ഞു…

അവന്റെ പരാക്രമങ്ങൾ കണ്ട് ബാക്കിയുള്ളവർ ആകെ ഭയന്നിരിക്കുകയായിരുന്നു… അവൻ അപ്പോഴും രക്ഷപെടാനുള്ള ശ്രമം തുടർന്നു…

ഫാ. സ്റ്റീഫൻ അവനരികിലേക്ക് വന്ന് അവന്റെ മുഖത്തോട് അടുത്ത് നിന്നു… അവൻ മുഖം വെട്ടിച്ചു…

“ഞാൻ തേടിവന്നവനല്ല നീ… നീ വെറും കാവൽക്കാരൻ, വഴികാട്ടി… പക്ഷെ ഇന്ന് നീ എന്റെയും വഴികാട്ടിയാണ്… നീ കാക്കുന്ന യജമാനനിലേക്കുള്ള വഴികാട്ടി…!!”