✝️The NUN 5✝️ (അപ്പു) 180

“ബെഞ്ചമിൻ…!!” ഫാ. സ്റ്റീഫൻ അവസാനിച്ചുകൊണ്ടിരുന്ന ചിരിയോടെ അവനെ വിളിച്ചു…

“ആ….!!” അവൻ അച്ചനെ ശ്രദ്ധിക്കാതെ ചിരിച്ചുകൊണ്ട് തന്നെ വിളികേട്ടു…

“ബെഞ്ചമിൻ എന്തിനാണ് അലനെ അന്ന് ഇങ്ങോട്ട് കൊണ്ടുവന്നത്….??” വളരെ ഗൗരവത്തോടെ ബെഞ്ചമിന്റെ തോളിൽ കയ്യിട്ട് ചേർത്ത് പിടിച്ച് ഫാ. സ്റ്റീഫൻ ചോദിച്ചു….ആ ചോദ്യം കേട്ട അവന്റെ ചിരി നിന്നുപോയി…

“ബെഞ്ചമിൻ എന്തിനാണ് ഇടക്കിടെ ഇങ്ങോട്ട് വരുന്നത്…?? ” വലതുവശം ചേർന്നു നടന്നിരുന്ന അവന് മുന്നിലൂടെ വലത്തേക്ക് കൈചൂണ്ടിക്കൊണ്ട് ഫാ. സ്റ്റീഫൻ പറഞ്ഞു….

ബെഞ്ചമിന്റെ ഭാവം മാറാൻ തുടങ്ങി… അവൻ സാവധാനം തല ചെരിച്ച് വലത്തേക്ക് നോക്കി…. തങ്ങൾ നടന്ന് നടന്ന് സെമിത്തെരിയുടെ മുന്നിൽ എത്തിയത് അപ്പോഴാണ് അവനറിഞ്ഞത്…. അവൻ മുന്നിലേക്ക് നോക്കി… ഇരുട്ടിലും തലയെടുപ്പോടെ നിൽക്കുന്ന വലിയ പള്ളി… ബെഞ്ചമിന്റെ മുഖഭാവങ്ങൾ മാറിവന്നു… അവൻ ക്രൂരമായ ഭാവത്തോടെ ഫാ. സ്റ്റീഫനെ നോക്കി… അച്ചൻ ഒട്ടും ഭയമില്ലാതെ നിന്നു…

പെട്ടന്ന് അച്ചന്റെ കഴുത്തിന് നേരെ അവന്റെ ഇടത്ത്കൈ ചെന്നു… കണ്ണഞ്ചിക്കുന്ന വേഗമായിരുന്നു ആ നീക്കത്തിന്… പക്ഷെ അതിനപ്പുറം പയറ്റിത്തെളിഞ്ഞ പോരാളിയെപ്പോലെ അച്ചൻ ആ കൈ നിസ്സാരമായി പിടിച്ച് തിരിച്ചൊടിച്ചു… അവൻ നിലവിളിച്ചില്ല….

പകരം വലത്തെക്കൈ കൊണ്ട് അവൻ ആക്രമിച്ചു… പക്ഷെ ഫാ. സ്റ്റീഫൻ അതും പിടിച്ച് നിർത്തി അവനെ രണ്ടുകയ്യിലും പിടിച്ച് മുന്നോട്ട് വലിച്ചെറിഞ്ഞു…

വീണിടത്ത് നിന്ന് പതിയെ എഴുന്നേറ്റ് നാലുകാലിൽ നിന്ന് മുറിവേറ്റ മൃഗത്തെപോലെ അവൻ മുരണ്ടു… ആ സമയം ബെഞ്ചിമിന് കുറച്ച് മുന്നിലായി ലോഹയും സ്റ്റോളും ധരിച്ച് കയ്യിലൊരു കുരിശും ഹനാൻവെള്ളവുമായി ഫാ. ബെനടിക്റ്റും വന്ന് നിന്നു… ബെഞ്ചമിൻ പതിയെ എഴുന്നേറ്റു…

അവൻ വന്യമായി മുരണ്ടുകൊണ്ടിരുന്നു…. ഭയത്തോടെ അവന് മുന്നിൽ നിന്ന ഫാ. ബെനഡിക്ടിന് അവനെ കണ്ടപ്പോൾ ഒരു ചെന്നായയുടെ രൂപവും ഭാവവുമാണ് തോന്നിയത്….

ബെഞ്ചമിൻ മുരണ്ടുകൊണ്ട് പിന്നിലേക്ക് നോക്കി… അവിടെ ഫാ. സ്റ്റീഫൻ ഗൗരവം നിറഞ്ഞ ഭാവത്തോടെ തെല്ലും ഭയമില്ലാതെ അവനെ നേരിടാൻ നിന്നു… അവൻ തിരിഞ്ഞ് ഫാ. ബെൻഡിക്ടിനെ നോക്കി… കയ്യിൽ ഇരിക്കുന്ന ഹനാൻ വെള്ളം തുള്ളിത്തുളുമ്പി പോവുന്നത്രക്കും അദ്ദേഹം പേടിച്ച് വിറക്കുന്നത് അവൻ കണ്ടു… അവന്റെ ചുണ്ടിൽ ഒരു പുഞ്ചിരി വന്നു… പെട്ടന്ന് തന്നെ അത് മാറി വീണ്ടും മുഖത്ത് വന്യതയായി… അവൻ ഫാ. ബെനെഡിക്ടിന് നേരെ കുതിച്ചു…