✝️The NUN 5✝️ (അപ്പു) 180

“പറ അലൻ…. അന്ന് എന്താ സംഭവിച്ചത്….??” ഫാ. സ്റ്റീഫൻ അവനോട് ചോദിച്ചു…

അവൻ തലയുയർത്തി അദ്ദേഹത്തെ നോക്കി… അതുകഴിഞ്ഞ് അടുത്ത് നിന്ന ഫാ. ബെൻഡിക്ടിനേയും…. എന്നിട്ട് അവൻ പറഞ്ഞുതുടങ്ങി…

“ആ സമയം ഞാനെല്ലാദിവസവും എന്റെ അമ്മയെ സ്വപ്നം കാണുമായിരുന്നു… അമ്മേടെ മടീല് കിടന്ന് പാട്ടൊക്കെ കേട്ട് ഉറങ്ങാൻ കിടക്കുന്ന സ്വപ്നം… പക്ഷെ പെട്ടന്ന് അമ്മ പോവും… പകരം വൃത്തികെട്ട മണമുള്ള അഴുകി ഇരിക്കുന്ന ഒരു ശവത്തിന്റെ ദേഹത്താവും ഞാൻ കിടക്കുന്നത്… അപ്പൊ ഞാൻ ഞെട്ടി എഴുന്നേൽക്കും… അങ്ങനെ എഴുന്നേറ്റ ഒരു ദിവസം രാത്രി….!!” അവൻ പറഞ്ഞു നിർത്തിയപ്പോൾ ഫാ. ബെനഡിക്ടിന് ആകാംഷയായി… അവൻ തുടർന്നു….

“പെട്ടന്ന് ഞാൻ കണ്ണ് തുറന്നപ്പോ അവിടെയുള്ള ഒരു കട്ടിലിൽ ഒരു സിസ്റ്ററെ കണ്ടു… സീമ സിസ്റ്ററാന്ന് വിചാരിച്ച് ഞാൻ സിസ്റ്ററുടെ പേര് വിളിച്ചു… അപ്പോ പെട്ടന്ന് അവരെഴുന്നേറ്റ് പുറത്തേക്ക് നടന്നു… ഞാനും പുറകെ പോയി… ആ സിസ്റ്റർ നടന്ന് സെമിത്തേരിയുടെ അടുത്തേക്കാണ് പോയത്… ആ സിസ്റ്ററിന് ഞാൻ സ്വപ്നത്തിൽ കണ്ട അഴുകിയ ശവത്തിന്റെ മുഖമായിരുന്നു… പേടിച്ച് ഓടാൻ നോക്കീട്ടും ഞാൻ അവരുടെ അടുത്തേക്ക് തന്നെയാ പോയത്… എങ്ങനെയാന്ന് അറിഞ്ഞൂടാ… അന്ന് ബെഞ്ചമിൻ വന്നില്ലായിരുന്നെങ്കിൽ ചിലപ്പോ എന്നെ കൊന്നേനെ…!!” അവൻ പേടിയോടെ പറഞ്ഞു നിർത്തി…

“അവനെങ്ങനെ അവിടെയെത്തി…??” അച്ചൻ ചോദിച്ചു…

“അറിയില്ല ഫാദർ…. ഞാൻ പോവുന്നത് കണ്ട് പിന്നാലെ വന്നതാന്നാ പറഞ്ഞത്..!!”

“മ്മ്…. അന്ന് ആ സിസ്റ്റർ ഏത് കട്ടിലിലാ ഇരുന്നത്….??”

“അത് കൃത്യമായിട്ട് ഞാൻ കണ്ടില്ല ഇരുട്ടല്ലേ… പക്ഷെ എനിക്ക് തോന്നുന്നു എന്റെ കഴിഞ്ഞ് നാലാമത്തെ കട്ടിലിലാണ്…!!”

“അത് ആരുടെ കട്ടിലാ…??”

“ബെഞ്ചമിന്റെ….!!”