✝️The NUN 5✝️ (അപ്പു) 180

“നമുക്ക് അവനെയൊന്ന് കാണണം ഫാദർ… എനിക്ക് അവനോട് തനിച്ചോന്ന് സംസാരിക്കണം…!!” ഫാ. സ്റ്റീഫൻ എന്തോ മനസിലുറപ്പിച്ചതുപോലെ പറഞ്ഞു..

“അതിനെന്താ അവൻ താഴെ ഉണ്ടാവും work time അല്ലെ..!!” അതുപറഞ്ഞുകൊണ്ട് ഫാ. ബെനഡിക്ട് എഴുന്നേറ്റു…

അവർ ഇരുവരും മുറിക്ക് പുറത്തിറങ്ങി താഴേക്ക് ചെന്നു… വരാന്തയിൽ നിന്ന് മുറ്റത്തേക്ക് ഇറങ്ങി നിന്നപ്പോഴേ ഫാ.സ്റ്റീഫന് ബെനഡിക്ട് അച്ചൻ അലനെ കാണിച്ചുകൊടുത്തു… കുറച്ച് ദൂരത്തായി വളർന്ന് നിൽക്കുന്ന പുല്ലുകൾ പറിച്ചുകളഞ്ഞ് മുറ്റം വൃത്തിയാക്കുകയായിരുന്നു അവൻ… അച്ചൻ അവനെ സൂക്ഷിച്ച് നോക്കി…

“അലൻ….!!” ഫാ. സ്റ്റീഫൻ ഉച്ചത്തിൽ വിളിച്ചു… പെട്ടന്ന് ആരോ പേര് വിളിച്ചത് കേട്ടപ്പോൾ അവൻ ചുറ്റും നോക്കി…

“അലൻ… ഇവിടെ…!!” ഫാ. സ്റ്റീഫൻ ഒന്നുകൂടി കൈകാട്ടി വിളിച്ചു… അച്ചനെ കണ്ട അവന്റെ മുഖത്ത് ഒരു പുഞ്ചിരി തെളിഞ്ഞു… അവൻ അച്ചന്റെ അടുത്തേക്ക് നടന്നു…

അടുത്തെത്തിയ അലന്റെ തോളിലൂടെ കയ്യിട്ട് ചേർത്ത് പിടിച്ച് ഫാ. സ്റ്റീഫൻ വരാന്തയിലേക്ക് കയറി ഒരു വശത്തേക്ക് നടന്നു… അവരുടെ കൂടെ നടക്കാൻ തുനിഞ്ഞ ഫാ.ബെൻഡിക്ടിനോട് അവിടെത്തന്നെ നിൽക്കാൻ ഫാ. സ്റ്റീഫൻ കൈകൊണ്ട് ആംഗ്യം കാട്ടിയതുകൊണ്ട് അദ്ദേഹം അവിടെത്തന്നെ നിന്നു…

അലനും ഫാ. സ്റ്റീഫനും എന്തോ സംസാരിച്ചുകൊണ്ട് നടന്ന് അവസാനം കുറച്ച് ദൂരെയായി അവർ വരാന്തയുടെ അരമതിലിൽ ഇരുന്നു… അങ്ങോട്ട് ചെല്ലണ്ട എന്ന് അച്ചൻ പറഞ്ഞതുകൊണ്ട് ഫാ. ബെനഡിക്ട് നിന്നിടത്ത് തന്നെ അങ്ങോട്ടും ഇങ്ങോട്ടും നടന്നു…

പെട്ടന്ന് ഫാ. സ്റ്റീഫൻ അലൻ കാണാതെ ഫാ. ബെൻഡിക്ടിനെ അങ്ങോട്ട് വിളിച്ചു…. അദ്ദേഹം അങ്ങോട്ട് ചെന്നു… അവിടെ ചെല്ലുമ്പോൾ അലൻ തലകുമ്പിട്ട് ഇരിക്കുകയാണ്…