✝️The NUN 5✝️ (അപ്പു) 180

“സർവ്വശക്തനായ ദൈവത്തിന്റെ പ്രതിപുരുഷനായ ഞാൻ നിനക്കൊരു അവസരം തരുന്നു… നിന്റെ യജമാനനെ എനിക്ക് മുന്നിൽ വെളിപ്പെടുത്തിയാൽ നിന്നെ വിട്ടയക്കാം…. അല്ലെങ്കിൽ ഭൂമിയിൽ നിന്റെ അധികാരം തടഞ്ഞ് നിന്നെ ഞാൻ നശിപ്പിക്കും….!!”

ഫാ. സ്റ്റീഫൻ വല്ലാത്തൊരു അധികാരഭാവത്തോടെ അത് പറയുന്നതും അത് കേട്ട് ബെഞ്ചമിൻ ഭയന്ന് വിറക്കുന്നതും ബാക്കിയുള്ളവർ ആശ്ചര്യത്തോടെ നോക്കിനിന്നു… പക്ഷെ ഭയന്നതല്ലാതെ അവൻ പ്രതികരിച്ചില്ല…

അച്ചൻ വീണ്ടും കണ്ണുകളടച്ചു… പ്രാർത്ഥിച്ചുകൊണ്ട് അദ്ദേഹം തന്റെ കയ്യിലിരുന്ന കുരിശ് അവനുനേരെ നീട്ടിയതും തീപ്പൊള്ളലേറ്റപോലെ അവൻ ഒച്ചവെക്കാൻ തുടങ്ങി….

ഉച്ചത്തിൽ നിലവിളിച്ചുകൊണ്ട് പ്രാകൃതമായ ഏതോ ഭാഷയിൽ അവൻ എന്തൊക്കെയോ പറഞ്ഞുകരഞ്ഞു… ആർക്കും ഒന്നും മനസിലായില്ല… പക്ഷെ അപ്പോഴേക്കും ഫാ. സ്റ്റീഫൻ ആ കുരിശ് താഴ്ത്തി…

“പറ….!!” ശാന്തനായി അദ്ദേഹം കല്പ്പിച്ചു…

“ബെലിയാൽ…..!!” അവൻ അത് പറഞ്ഞ നിമിഷം ഒരു നിശബ്ദത പടർത്തി തൊട്ടടുത്ത നിമിഷം ഭൂമിയെത്തന്നെ കുലുക്കിക്കൊണ്ട് ഇടിയും മിന്നലും ഉണ്ടായി… കാറ്റിൽ വാതിലുകൾ ശക്തിയായി തുറന്നടഞ്ഞു… അവിടമാകെ ഒരു തണുപ്പ് വന്ന് നിറഞ്ഞു…

ആ ശബ്ദം കേട്ട് എല്ലാവരും പേടിച്ച് വിറച്ചു… പെട്ടന്ന് ആ ഭയം കൂട്ടിക്കൊണ്ട് ബെഞ്ചമിൻ ഡെസ്കിൽ തളർന്നുവീണു… ഫാ. സ്റ്റീഫൻ നിരാശനായതുപോലെ ബെഞ്ചമിൻ കിടന്ന ഡെസ്കിൽ കൈവെച്ച് തലകുനിച്ച് നിന്നു…

“ഫാദർ….??” ബെനഡിക്ട് അച്ചൻ ചെറിയ ഭയത്തോടെ ഫാ. സ്റ്റീഫനെ വിളിച്ചു…

അലനും ബാക്കിയുണ്ടായിരുന്ന രണ്ടുപേരും മദർസുപ്പീരിറിന്റെ അടുത്ത് നിന്നിരുന്നു… അവർ നാലുപേരും നന്നായി പേടിച്ചിട്ടുണ്ട്…

“അവന്റെ കെട്ടുകൾ അഴിച്ചേക്ക് ഫാദർ ആ പിശാച് അവനെ വിട്ടുപോയി…!!” ഫാ. ബെൻഡിക്ടിനെ നോക്കിക്കൊണ്ട് സ്റ്റീഫനച്ചൻ പറഞ്ഞു…

അത് കേട്ടതും ബാക്കിയുള്ളവർക്ക് നേരിയ ആശ്വാസമായി… മദർ ഒന്ന് ദീർഘമായി നിശ്വസിച്ചു…