⚔️രുദ്രതാണ്ഡവം 6⚔️ [HERCULES] 1334

ശോഭയും നാരായണനും രാമകൃഷ്ണനും അത്രയും നേരമനുഭവിച്ച പിരിമുറുക്കത്തിനു അപ്പോൾമാത്രമാണ് ആശ്വാസം ലഭിച്ചത്.

ദേവു ഋതുമതിയായി എന്നറിഞ്ഞപ്പോൾ ശോഭയിലും നാരായണനിലും ഒരു പുഞ്ചിരി വിടർന്നു. എന്നാൽ രാമകൃഷ്ണൻ ആകെ ആശങ്കയിലായിരുന്നു. അയാൾ തന്റെ ആശങ്ക വിദഗ്ദമായി മറച്ചുവച്ചുകൊണ്ട് ഒരുപുഞ്ചിരിയോടെ ശോഭയോടും നാരായനോടുമൊപ്പം ദേവുവിനെ കാണുവാനായി മുന്നോട്ട് നടന്നു.

അകത്തേക്ക് കയറിയ അവർ കാണുന്നത് നേഴ്സിനോട് സംസാരിച്ചോണ്ട് കിടക്കണ ദേവുവിനെയാണ്.

ദേവു എന്തോ കാര്യമായി അവരോട് ചോദിക്കുന്നുണ്ടായിരുന്നു.

ഒരു പുഞ്ചിരിയോടെ അതിനൊക്കെയും ഉത്തരമവർ നൽകുന്നുമുണ്ടായിരുന്നു.

അവരുടെയെടുത്തേക്ക് നടന്നടുത്ത ശോഭയെയും മുത്തശ്ശന്മാരെയും കണ്ടപ്പോൾ ദേവു മനോഹരമായി പുഞ്ചിരിച്ചു.

അവർ ഇത്രയും നേരമനുഭവിച്ച പിരിമുറുക്കം ആ ഒരൊറ്റപുഞ്ചിരിയിൽ അലിഞ്ഞില്ലാതായാത്പോലെ അവർക്ക് തോന്നി.

” അമ്മേ….! “

ദേവു അവളുടെ മനോഹരമായ പുഞ്ചിരിയോടെ ശോഭയെ വിളിച്ചു.

“ഞങ്ങളെയൊക്കെ പേടിപ്പിച്ചല്ലോ ദേവു നീ”

നാരായണഭട്ടതിരിപ്പാട് ആണത് പറഞ്ഞത്.

ശോഭ ദേവുവിന്റെ അടുത്ത് കട്ടിലിലിരുന്ന് അവളുടെ തലയിലൊന്ന് തലോടി.