ശമ്പളദിവസ്സം [ദേവദേവൻ] 97

കടക്കാരനോട് കയ്യിലിരിക്കുന്ന പൈസ എണ്ണി തിട്ടപ്പെടുത്തിക്കൊണ്ട് അയാൾ പറഞ്ഞു.

മക്കൾക്ക് സ്കൂൾ തുറന്നിരിക്കുന്നു.

തികയില്ലെന്നറിയാം ബാക്കി അടുത്ത മാസം വാങ്ങാം. അല്ലെങ്കിൽ ആവശ്യം വരുമ്പോൾ കടം വാങ്ങുകയെ നിവർത്തി ഉള്ളൂ.

സാധനം എല്ലാം കൂടെ വലിയൊരു കവർ ഉണ്ട്‌. പൈസ കടക്കാരന് കൊടുത്തു ബാക്കി കിട്ടുന്ന ചില്ലറയ്ക്കായി അയാൾ കൈനീട്ടി.

ബാക്കി വാങ്ങി പോക്കറ്റിൽ ഇട്ടു. അയാൾ സഞ്ചി കയ്യിൽ തൂക്കിപ്പിടിച്ചു.

നല്ല കനമുള്ളതിനാൽ തന്നെ ഒരുഭാഗം ചെരിഞ്ഞാണ് അയാൾ നടന്നത്.

ആ ചെരിവ് ആസ്വസ്തമായതിനാൽ എടുത്ത് തോളിൽ കയറ്റി. എന്നിട്ടും വേദന തന്നെ.

ആ മുഖഭാവം അത് വ്യക്തമാക്കി.

പതിയെ നടന്നു.

വലിയൊരു ചെരുപ്പ് കട കണ്ടപ്പോൾ നോട്ടം അങ്ങോട്ട് പോയി.

മകന്റെ തേഞ്ഞ ചെരുപ്പ് ഓർത്തു അയാളുടെ ഉള്ള് നീറി.

സഞ്ചി താഴെയിറക്കി അയാൾ കടയ്ക്കുള്ളിലേക്ക് കയറി.

അധികം വിലയില്ലാത്തതും കാണാൻ ഭംഗിയുള്ളതുമായ ഒരു ചെരുപ്പ് കയ്യിലെടുത്തു അയാൾ കടക്കാരനോട് വിലപേശി.

അയാളുടെ സംസാരം സഹിക്ക വയ്യാതെ കടക്കാരൻ തനിക്ക് നഷ്ടമില്ലാത്ത വിലയ്ക്ക് ആ ചെരുപ്പ് അയാളെ ഏൽപ്പിച്ചു.

ആ ചെരുപ്പിലേക്ക് നോക്കിയപ്പോൾ അയാളുടെ കണ്ണുകൾ തിളങ്ങി.

ഇത് കാണുമ്പോൾ ഉള്ള മകന്റെ സന്തോഷം ഓർത്തപ്പോൾ ആ പിതാവിന്റെ മുഖത്ത് ഒരു ചിരി മിന്നി മാഞ്ഞു.

പുറത്തിറങ്ങി മക്കൾക്ക് വേണ്ടി മിട്ടായിയും വാങ്ങി.

സന്തോഷത്തോടെ ആ മനുഷ്യൻ നടന്നു നീങ്ങി.

വീട്ടിലെത്തി സാധനങ്ങൾ ഭാര്യയുടെ കയ്യിലേൽപ്പിച്ചു അയാളൊന്ന് മൂരി നിവർന്നു.

മുന്നിൽ വന്നു നിൽക്കുന്ന മക്കളുടെ കയ്യിൽ അവർക്കായി വാങ്ങിയ സാധനങ്ങൾ അയാൾ വെച്ചു കൊടുത്തു.

മക്കൾ അദ്ദേഹത്തെ ആരാധനയോടെ നോക്കി നിന്നു.

അച്ഛൻ കയ്യിൽ വെച്ചു തന്ന ചെരുപ്പ് നെഞ്ചോട് അണച്ചുകൊണ്ട് മകൻ അച്ഛനെ കെട്ടിപിടിച്ചു.