“എന്തൊരു ചൂടാണ് “

സൂര്യനെ നോക്കി തന്റെ പരിഭവം അറിയിച്ചുകൊണ്ട് അയാൾ അതിവേഗം നടന്നു.

വിയർപ്പു കണങ്ങൾ നിറഞ്ഞു നിന്ന നെറ്റിയിൽ വലതു കൈയ്യിലെ തള്ള വിരൽ കൊണ്ട് തൂത്തെറിഞ്ഞു. അത് ആരുടെയെങ്കിലും മേൽക്ക് വീഴുന്നുണ്ടോ എന്ന് പ്രത്യേകം ശ്രെദ്ധിക്കാനും മറന്നില്ല.

കാൽ തളരുകയാണ്. എന്തോ ഇത്രയും നേരത്തെ ജോലി തന്നെ നല്ല രീതിയിൽ തളർത്തിയിട്ടുണ്ട്.

ഒരു പെൺകുട്ടി അടുത്ത് നടന്നു പോകുന്നു. അവൾ തല ചെരിച്ചു അയാളെ അവജ്ഞയോടെ നോക്കി. അത്  മനസ്സിലായിട്ടെന്ന വണ്ണം അയാൾ തന്റെ വലതു തോൾ ഭാഗം മൂക്കിന് നേരെ അടുപ്പിച്ചു മണത്തു നോക്കി.

അസഹനീയം തന്നെയാണ്.

വിയർത്തു ഷർട്ട് മൊത്തം നനഞ്ഞിരിക്കുകയാണ്.

മുന്നിൽ എതിർ വശത്തൂടെ നടന്നു വരുന്നവരെ കണ്ട് അയാൾ ഒരല്പം അകലം പാലിച്ചു നടന്നു.

ഉള്ളിലൊരു അപകർഷതാബോധം ഉടലെടുത്തിരിക്കുന്നു.

നടന്നു ഒരു പീടികയുടെ മുന്നിൽ നിന്ന് അയാൾ ഉള്ളിലിരിക്കുന്നതെല്ലാം വീക്ഷിച്ചു.

തനിക്ക് വാങ്ങേണ്ടത് എന്തെല്ലാമെന്ന് പൂർണ്ണമായ ബോധം ഉണ്ട്‌. പക്ഷെ ഓരോന്ന് കാണുമ്പോൾ വാങ്ങാതിരിക്കാൻ തോന്നില്ലല്ലോ?

അടുക്കളയിലേക്ക് വാങ്ങാനുള്ള സാധനങ്ങളുടെ ലിസ്റ്റ് അവൾ രാവിലെ തന്നെ തന്നിരുന്നു.

ലിസ്റ്റ് കടക്കാരന് നൽകി അയാൾ ഉള്ളിലേക്ക് നോക്കി നിന്നു.

സാധനങ്ങൾ എല്ലാം കൂടെ കുറെയുണ്ട്.  ഒരു മാസത്തേക്ക് ഉള്ള സാധനങ്ങൾ ഉണ്ട്‌. അതും കൂട്ടിയും കിഴിച്ചും ഒക്കെ കണക്കു കൂട്ടി ആണ് വാങ്ങുന്നത് ഏതെങ്കിലും അധികം ആയാൽ എല്ലാം തീർന്നു.

“ബാക്കി റേഷൻ വാങ്ങാം ”
സ്വയം പറഞ്ഞു.

“ഒറ്റ വരയിട്ട നോട്ട് ബുക്ക് ആറ് എണ്ണം. പിന്നെ വരയിടാത്തത് മൂന്ന്.”