രുദ്രതാണ്ഡവം 9 [HERCULES] 1253

 

 

 

” റോണിച്ചാ… അവർക്കവിടെ വില്ലയുണ്ടെന്നുറപ്പാണോ. “

 

അവർ പറഞ്ഞത് ശ്രെദ്ധയയോടെ കേട്ടുകൊണ്ടിരുന്ന അജിൽ ചോദിച്ചു.

 

” എടാ ഉറപ്പിച്ചുപറയാൻ… അങ്ങനെ ആരാണ്ട് പറഞ്ഞ്കേട്ടിട്ടുണ്ട്. ഇന്ന് അവനവിടേക്ക് പോകുന്ന കണ്ടപ്പോ പെട്ടന്നതാ ഓർമ്മവന്നെ. “

 

” ഹ്മ്മ്… എങ്കി അതാദ്യം കൺഫേം ചെയ്യണം… ഇവിടത്തന്നെ ആരോടേലും അന്വേഷിച്ചാ അറിയാമ്പറ്റില്ലേ… “

 

” അജിലേ കോളേജില് അന്വേഷിക്കണത് റിസ്ക്കാടാ… കുറെയെണ്ണം അവന്മാരോട് കൂറുള്ളവന്മാരാ. അവരുടെ ചെവിയിലെങ്ങാൻ എത്തിയാ ഒക്കെ വെറുതെയാവും. “

 

അജിലിന്റെ ചോദ്യത്തിന് ജിന്റോ ആയിരുന്നു മറുപടി പറഞ്ഞത്. 

 

” അപ്പോപ്പിന്നെങ്ങനാ അറിയണേ… “

 

” എന്തായാലും ഇക്കാര്യം അഭിയോട് പറയണം. അവന്റെ ഹോൾഡ് വച്ച് അവിടെ വില്ല ഉള്ളവരുടെ ഡീറ്റെയിൽസ് ഒപ്പിക്കാൻ പറ്റൂലെ. “

 

അവരുടെ സംസാരം കേട്ടുനിന്ന രാഗേഷായിരുന്നു അങ്ങനെയൊരു സജ്ജെഷൻ മുന്നോട്ട് വച്ചത്.

 

” ശെരിയാ… അത് തന്നെയാ നല്ലത്.  ഇന്ന് ക്ലാസ് കഴിഞ്ഞ് അഭിയുടെ വീട്ടിലേക്ക് പോകാം. അവന് പറയാനുള്ളതൂടെ കേട്ടിട്ട് ബാക്കി പ്ലാൻ ചെയ്യണതാവും നല്ലത്. “

 

മനീഷിന്റെ അഭിപ്രായത്തോട് എല്ലാവരും യോജിച്ചു.

 

തൽക്കാലത്തേക്ക് ചർച്ചകൾക്ക് വിരാമമിട്ട് അവർ പിരിഞ്ഞു. അജിലും രാഗേഷും വേഗം തന്നെ ക്ലാസിലേക്ക് ചെന്നു . ആദ്യത്തെ പീരിയഡ് കഴിഞ്ഞ് മിസ്സ്‌ പോയിട്ടുണ്ടായിരുന്നു. അടുത്ത അവറിനുള്ള സാർ എത്തിയിട്ടില്ല. അവർ വേഗം തന്നെ ക്ലാസിലേക്ക് കയറി അവരുടെ ഇരിപ്പിടത്തിൽ ഇരുന്നു.എല്ലാവരെയും  പരിചയപ്പെട്ടു വരുന്നേയുള്ളൂ.

 

അനുവിനെയാണ് ഇരുവരും മുന്നേ പരിചയപ്പെട്ടിട്ടുള്ളത്. അവളെ നോക്കിയപ്പോ ഡെസ്കിൽ തലവച്ച് കിടക്കുകയായിരുന്നു അവൾ.

 

അവർ നോക്കുന്നത് കണ്ട് അനുവിന്റെയടുത്ത് ഇരുന്ന കുട്ടി “അവൾക്ക് വയ്യ ” എന്ന് ചുണ്ടുകളനക്കി.

 

” എന്തുപറ്റി ” എന്ന് അജിലും അതേപോലെ തിരിച്ചുചോദിച്ചു.

 

അതിന് അറിയില്ല എന്ന രീതിയിൽ ചുണ്ടുമലർത്തി ചുമൽ കൂച്ചി കൈമലർത്തിയ അവളെ കണ്ടപ്പോൾ അജിൽ അറിയാതെ ചിരിച്ചുപോയി.