രുദ്രതാണ്ഡവം 10 [HERCULES] 1313

വന്നവരിൽ ഭൂരിഭാഗംപേരും ദേവുവിന് സമ്മാനങ്ങളുമായായിരുന്നു എത്തിയത്.
അതിൽ വസ്ത്രങ്ങൾ മുതൽ ആഭരണങ്ങൾ വരെയുണ്ടായിരുന്നു.
എല്ലാം കഴിഞ്ഞ് ദേവു കുളത്തിൽ മുങ്ങിക്കുളിച്ചു. അതോടെ ചടങ്ങുകൾക്ക് അവസാനമായി.

സദ്യയ്ക്ക് ശേഷം എല്ലാവരും ഇല്ലത്തിന്റെ നടുമുറ്റത് കൂടിയിരുന്ന് പല കളികളിൽ ഏർപ്പെട്ടു. കുറേ നാളുകൾക്ക് ശേഷമുള്ള ബന്ധുക്കളുടെ ഒത്തുകൂടലായിരുന്നു അത്. അതിനാൽ അവർ വിശേഷങ്ങൾ പങ്കുവച്ചും
തമാശകൾപറഞ്ഞും കളികളിലേർപ്പെട്ടും
ആ സമയത്തെ മനോഹരമാക്കിത്തീർത്തു.
അന്ന് എല്ലാവരും ഇല്ലത്തുതന്നെ നിൽക്കാം എന്ന് തീരുമാനിച്ചിരുന്നു.

≈≈≈≈≈≈≈≈≈≈≈≈≈≈≈≈≈≈≈≈≈≈≈≈≈≈≈≈≈≈≈≈≈≈

അനു രാവിലെനേരത്തെതന്നെ ഉറക്കമുണർന്നു. കവിലൂടെ ഒലിച്ചിറങ്ങിയ കണ്ണുനീരിന്റെ ശേഷിപ്പുകൾ തുടച്ച് മാറ്റി അവൾ ബാത്‌റൂമിലേക്ക് കയറി. ഒന്ന് ഫ്രഷ് ആയി അവൾ വേഗം തന്നെ താഴേക്ക് ചെന്നു.

“അമ്മേ… ഞാനമ്പലത്തിൽ പൊയ്‌ട്ട് വരാട്ടോ…!. ”
അവൾ അടുക്കളയിൽ ജോലിയിലായിരുന്ന അമ്മയോട് പറഞ്ഞു.

” എന്തായനൂ പതിവില്ലാണ്ടമ്പലത്തിലേക്ക്…? ”

” രാവിലെയെണീറ്റപ്പോ അമ്പലത്തില് പോണംന്ന് തോന്നി… ”

” ആഹ്… സൂക്ഷിച്ചുപോയിവാ.. ”

അമ്മയോട് പറഞ്ഞ് അവൾ വേഗം അമ്പലത്തിലേക്ക് നടന്നു.
ഓഫ്‌വൈറ്റ് ധാവണിയായിരുന്നു അവളുടെ വേഷം.
കുളികഴിഞ്ഞു വിടർത്തിയിട്ട മുടിയിഴകളിൽ അപ്പോഴും നനവ് ശേഷിച്ചിരുന്നു. അരക്കെട്ടോപ്പമുള്ള അവളുടെ തിങ്ങിയ മുടിയിഴകൾ അവളുടെ പുറത്ത് ധാവണിയിൽ ചെറിയ നനവ് പടർത്തുന്നുണ്ടായിരുന്നു.