രാവണന്റെ ജാനകി

Author : ശിവശങ്കരൻ

 

 

കുറെയേറെ നാളുകളായി രാവണൻ അസ്വസ്ഥനാണ്… അടുത്ത നിമിഷം എന്താണ് ചെയ്യേണ്ടതെന്നു അറിയാത്ത അവസ്ഥ… രത്‌നങ്ങളാൽ അലംകൃതമായ സിംഹസനത്തിൽ മിഴികൾ പൂട്ടി അവനിരുന്നു…

 

രാജ്യഭാരമേൽക്കുമ്പോൾ കുറെയേറെ സ്വപ്‌നങ്ങൾ മനസ്സിലുണ്ടായിരുന്നു… അതിലൊന്നാണ് തന്റെ ജാനകിക്കൊത്തുള്ള ജീവിതവും…

 

ഒട്ടേറെ പരിഷ്കാരങ്ങൾ വരുത്തി ലങ്കയിൽ…

 

അതിനായി കയ്യിലില്ലാത്തവ കണ്ടുപിടിച്ചെടുക്കുമ്പോഴും, നേടാനാവില്ല എന്ന് കരുതിയതിനെയൊക്കെ വെട്ടിപ്പിടിച്ചു നേടിയപ്പോഴും… മനസ്സിൽ ഒരേയൊരു മുഖം… അവൾ… ജാനകി…

 

എപ്പോഴും രാവണന്റെ ഊർജമായിരുന്നു അവന്റെ ജാനകി…

 

***********************************

 

യൗവനം നിറഞ്ഞു നിൽക്കുന്ന സമയത്തെന്നോ… മുടിത്തുമ്പിൽ തുളസിക്കതിരും, കൈയ്യിൽ അമ്പലത്തിലെ വാഴയിലക്കീറുമായി വന്ന ഒരു പട്ടുപാവാടക്കാരി… അതായിരുന്നു അവന്റെ ഓർമയിലെ അവളുടെ ആദ്യ ദർശനം…

 

അവളുടെ കൂട്ടുകാരികളിൽ നിന്നും അവനറിഞ്ഞു… പാട്ടുപാടുന്ന, കവിതയെഴുതുന്ന, പ്രായമായവർക്കൊക്കെ മകനായ, ആ രാവണനെ അവളും ശ്രദ്ധിക്കാറുണ്ടെന്നു…

 

പിന്നീട് അവന്റെ നാളുകളെല്ലാം, അവളുടെ ആ ശ്രദ്ധയെ തന്നോടുള്ള ഇഷ്ടമാക്കാൻ വേണ്ടിയുള്ള ശ്രമങ്ങളായിരുന്നു…

 

അവളുടെ മഷിയെഴുതിയ മിഴികളാൽ ഒരു നോട്ടം… അതുമതിയായിരുന്നു അവനലിയാൻ…

അതിനായ് അവൻ ഓടിനടന്നു, അവളുടെ സാന്നിധ്യമുള്ളിടത്തെല്ലാം…