മെർവിൻ 5 (ഏദൻ ക്ലൈമാക്സ്‌ ) [VICKEY WICK] 125

സ്നേഹത്തിന്റെ ദാഹം മാറ്റാൻ പണത്തിനാവില്ല എന്നറിയാമായിരുന്നിട്ടും മകൾക്കു മുന്നിൽ തലകുനിക്കാനുള്ള ഒരച്ഛന്റെ വൈമനസ്യം ആണ് അവളെ തിരികെ വിളിക്കുന്നതിൽ നിന്നും അയാളെ പിന്തിരിപ്പിച്ചത്.

അവൾ തിരിച്ചു പോകാനും തയ്യാറായില്ല. എന്തെങ്കിലും നേടിയ ശേഷമേ തിരിച്ചു യാത്രയുള്ളൂ എന്ന് ഉറപ്പിച്ചു.

അതുതന്നെയാണ് ബെൻസനെ വിചിത്രമായതും ഒരു സൂപ്പർനാച്ചുറൽ ടച്ച്‌ ഉള്ളതുമായ കേസ് എടുത്തുതരാൻ ഏർപ്പാടാക്കിയതിനും കാരണം.

ആവൾ അയാൾ തന്ന നാല് ഫയലുകളും പരിശോധിച്ചു. അതിൽ അവൾക്കു ഏറ്റവും അധികം. താല്പര്യമുള്ളതായി തോന്നിയത് ലിന്റ, ലോണ മർഡർ കേസ് ആയിരുന്നു. അവൾ അതിലെ സത്യത്തെ അന്വേഷിച്ച് പോകുവാൻ തീരുമാനിച്ചു. ബെൻസനെ ഫോൺ ചെയ്ത് ആവശ്യമുള്ള കേസ് തിരഞ്ഞെടുത്തു എന്നും നാളെ രാവിലെ മീറ്റ് ചെയ്യാം എന്നും അറിയിച്ചു.

രാവിലെ അവർ ബ്ലൂ റോസിൽ തന്നെ മീറ്റ് ചെയ്തു.

“ഹോ, ഇത്ര വേഗം സെലക്ട്‌ ചെയ്യുമെന്ന് കരുതിയില്ല. ആട്ടെ, എന്താണ് ഇത്‌ തിരഞ്ഞെടുക്കാൻ കാരണം? ”

“കൂടുതൽ വിചിത്രമായി തോന്നിയത് ഈ കേസ് ആണ്. അൽപ്പ സമയം കൊണ്ട് തന്നെ ഒരു ബോഡി വെറും മാംസകഷണങ്ങൾ അവശേഷിക്കുന്ന ഒരു അസ്ഥികൂടമായി തീരുക, അത്രയധികം ആക്രമണങ്ങൾ ഉണ്ടായിട്ടും ഒരു കുട്ടി മാത്രം അത്ഭുതകരമായി രക്ഷപെടുക, കുട്ടിയുടെ മൊഴിയിലും ഒരു സൂപ്പർ നാച്ചുറൽ പ്രെസെൻസിനെ കുറിച്ച് പരാമർശമുണ്ട്.

പോലീസ് മാനസിക വിഭ്രാന്തി മൂലമാണ് സാക്ഷിമൊഴി വ്യക്തതയില്ലാത്തതും സാമാന്യ ബുദ്ധിക്കു നിരക്കാത്തതുമാകുന്നത് എന്ന് പറഞ്ഞിരിക്കുന്നു. അന്വേഷണം കാര്യമായി ഇപ്പോൾ നടക്കുന്നുണ്ടോ എന്ന് വ്യക്തമല്ല. തീയതിയും കാര്യങ്ങളും വെച്ച് നോക്കിയാൽ ഇത്‌ നടന്നിട്ട് ഇപ്പൊ ഒരു 10,11 മാസത്തോളം ആയി. ”