മെർവിൻ 5 (ഏദൻ ക്ലൈമാക്സ്‌ ) [VICKEY WICK] 124

ആ താഴ്ചയിലെ ശവകോട്ടായിലേക്ക് ഉറ്റുനോക്കി കൊണ്ട് ജെയിം ഏദന്റെ തോളിലേക്ക് കൈ വെച്ചതും ആ രൂപം ഏദൻറെ ദേഹത്തേക്ക് പ്രവേശിച്ചതും ഒരേ നിമിഷം ആയിരുന്നു. ഏദൻ ബോധമറ്റ് ജയിമിന്റെ കൈകളിലേക്ക് വീണു. അബിയ ഒന്ന് ഞെട്ടി. കൺപോളകൾ അനങ്ങി. എങ്കിലും കണ്ണുകൾ തുറന്നില്ല. ഏകാഗ്രത വെടിഞ്ഞില്ല. കാഴ്ച വീണ്ടും തുടർന്നു.

 

 

ഓരോ സംഭവങ്ങളും ഒന്നൊന്നായി കാണുവാനും മനസിലെ ചോദ്യങ്ങൾക്കുള്ള ഉത്തരം കണ്ടെത്താനും പ്രധാന സംഭവങ്ങൾ മാത്രമായി കാണാനും പ്രത്യേക മന്ത്രങ്ങൾ ഉണ്ടായിരുന്നു. അബിയക്കു മനസിലെ ചോദ്യങ്ങൾക്കുള്ള ഉത്തരമായിരുന്നു വേണ്ടത്. അതുകൊണ്ട് തന്നെ പ്രധാനമല്ലാത്ത കാര്യങ്ങൾ മിന്നിമറഞ്ഞ് അവളുടെ ദൃഷ്ടി അടുത്ത സംഭവത്തിലേക്ക് പാഞ്ഞു.

 

 

സെനോനിന്റെ മരണം. ഏദൻറെ അടുത്ത് നിന്നും വേർപെട്ട സെനോൻ ചെന്നായ്ക്കൾ ഇറച്ചി തിന്നുന്നത് കാണുകയാണ്. പെട്ടെന്ന് കാൽ കൊണ്ട് അവന്റെ അടുത്ത് കിടന്ന ചുള്ളി ഒടിഞ്ഞു. ചെന്നായ്ക്കളിൽ ഒന്ന് അവന്റെ നേരെ തിരിഞ്ഞു. പന്തം കെട്ടു. എങ്കിലും നിലാവെളിച്ചത്തിൽ കാണുവാൻ കഴിഞ്ഞു.

 

 

ഒരു ചെന്നായ്ക്കൂട്ടം ചുറ്റും വളഞ്ഞു അവന്റെ നേരെ നടന്നു അടുക്കുകയാണ്. അവൻ തോക്കിൽ പിടിയമർത്തിയതും അടുത്തെത്തിയ ഒരു ചെന്നായ അവന്റെമേൽ ചാടിവീണു. പിറകെ മറ്റെല്ലാം. ഉടനെ ഒരു മരക്കമ്പു അവയെ അടിച്ചു തെറുപ്പിച്ചു. എന്നാൽ അവ വീണ്ടും ചാടിയടുത്തപ്പോൾ ഒരു അലർച്ച.

 

 

 

“ഇർറാറാറാ… ”

 

 

ചെന്നായ്ക്കൾ തെരുവുനായ്ക്കളെ പോലെ വാലും ചുരുട്ടി മാറി നിന്നു. ആ രൂപം ഒരു മുരൾച്ചയോടെ സെനോനിന്റെ നേരെ നടന്നു അടുത്തു. അവൻ ഭയന്ന കണ്ണുകളോടെ ആ രൂപത്തെ നോക്കി പിന്നോട്ട് ഇഴഞ്ഞു കൊണ്ടിരുന്നു. അതിന്റെ കണ്ണ് മൂടും വരെ മുടി നീണ്ടുകിടന്ന കൊണ്ട് മുഖം വ്യക്തമല്ല.

 

 

അത് സെനോനിന്റെ അടുത്തെത്തിയതും പെട്ടെന്ന് കുനിഞ്ഞ് അതിന്റെ കൂർത്ത നഖമുള്ള കൈ വിരലുകൾ സെനോനിന്റെ നെഞ്ചിലേക്ക് ആഴ്ത്തി. ചോര ചീറ്റിയോഴുകി. അവൻ ഉപബോധാവസ്ഥയിൽ ഞെരങ്ങി.

 

 

 

“ഏദൻ… ഏദൻ… ”

 

 

 

പെട്ടെന്ന് അബിയയുടെ ദൃഷ്ടി ആ സത്വത്തിന്റെ നേർക്ക് തിരിഞ്ഞു. മുടി കണ്ണുമൂടും വരെ നീണ്ടുകിടന്നിരുന്ന ആ രൂപത്തിന്റെ ചുണ്ടുകൾ ഏദന്റെതിന് സമാനമായിരുന്നു. അല്ല അവ ഏദന്റേത് തന്നെ! അവയിൽ ഒരു ചിരി വിടർന്നു. കറുത്ത കറയോട് കൂടിയ പല്ലുകൾ. അപ്പോഴേക്കും സെനോനിന് ബോധം തിരിച്ചു കിട്ടിയിരുന്നു. അവൻ വല്ലാതെ കിതച്ചു. അതിനു ശേഷം അലറി.