മെർവിൻ 5 (ഏദൻ ക്ലൈമാക്സ്‌ ) [VICKEY WICK] 125

അടുത്തതായി അബിയയുടെ ദൃഷ്ടി പാഞ്ഞു ചെന്നത് ലിന്റയുടെ മരണത്തിലേക്ക് ആണ്. ലിന്റ പള്ളിക്ക് ഉള്ളിലേക്ക് വലിച്ചെറിയപ്പെട്ടു. അവൾ തറയിൽ ചെന്ന് വീണു. വാതിലും കൊട്ടിയടക്കപ്പെട്ടു. അവൾ ഭയം മൂലം നിർത്താതെ കിതച്ചുകൊണ്ടിരുന്നു. ചില വിടവുകളിലൂടെ അരിച്ചിറങ്ങുന്ന വെളിച്ചമൊഴിച്ചാൽ പള്ളിയിൽ മുഴുവൻ ഇരുട്ട് മാത്രം. അവൾ ഭയത്തോടെ കിതച്ചുകൊണ്ട് ചുറ്റും കണ്ണുകൾ പരതി വിളിച്ചു.

 

 

 

“ലോണ…? , ജെനീ… ”

 

 

ശബ്ദം പള്ളിക്കു പുറത്തേക്കു പോകുന്നില്ലെന്നു നിരാശയോടെ അവൾ മനസിലാക്കി. പെട്ടെന്ന് പിന്നിൽ നിന്നും ഒരു പതിഞ്ഞ വിളി.

 

 

“ലിന്റാ… ”

 

 

അവൾ ഞെട്ടി തിരിഞ്ഞു നോക്കി. അത് ഏദൻ ആയിരുന്നു. അവൾ ഓടിച്ചെന്നു അവനെ കെട്ടിപ്പിടിച്ചു കരഞ്ഞു. ആ ഭയത്തിൽ അവൻ എന്താണ് അവിടെയെന്നോ എങ്ങനെ ഉള്ളിൽ എത്തിയെന്നോ ചോദിക്കാൻ അവൾ മറന്നിരിക്കണം. ലിന്റ കരഞ്ഞു കൊണ്ട് വിളിച്ചു.

 

 

“ഏദൻ… ”

 

 

പതിയെ അവളെ തോളത്ത് പിടിച്ചു മാറ്റിയിട്ടു അവൾ ചോദിക്കാൻ മറന്നത് അവൻ ചോദിച്ചു.

 

 

“ലിന്റ നീ എങ്ങനെ ഇവിടെയെത്തി ? എന്തിനാ ഇവിടെ വന്നത്? ”

 

 

 

“ഒക്കെ പറയാം ഏദൻ, ആദ്യം നമുക്ക് ഇവിടെ നിന്നും എങ്ങനെയെങ്കിലും പുറത്ത് കടക്കണം. ”

 

 

അപ്പോഴാണ് അവൾ ഓർത്തത്. ഏദൻ എങ്ങനെയായിരിക്കും ഈ പള്ളിക്കുള്ളിൽ എത്തിയത്.

 

 

“ഏദൻ നീ എങ്ങനെ ഇതിനുള്ളിൽ എത്തി? ”

 

 

“എനിക്ക് അറിയില്ല ലിന്റ. ഞാൻ എന്റെ കണ്ണുതുറന്നപ്പോൾ ഇവിടെയാണ്‌… ”

 

 

“ഓഹ്, മൈ ഗോഡ്… ”

 

 

ലിന്റ തല കുമ്പിട്ടു നിന്ന് കരഞ്ഞു. അവൾ നിവർന്നപ്പോൾ ഏദൻ എന്തോ കണ്ട് പേടിച് നിൽക്കുകയായിരുന്നു. അവൻ ലിന്റയുടെ പിന്നിലേക്ക് ആണ് നോക്കി കൊണ്ടിരുന്നത്. അവൾ അവനോട് പതുക്കെ ചോദിച്ചു.

 

 

“എന്താ…? ”

 

 

അവൻ അതേപടി നിൽക്കുകയാണ്. നന്നായി കിതക്കുന്നും ഉണ്ട്. അവൾ പതിയെ തിരിഞ്ഞ് നോക്കി. ആ ഇരുട്ടിൽ എന്ത് കാണുവാനാണ്. അവൾ വീണ്ടും തിരികെ തിരിഞ്ഞു.

 

 

പെട്ടെന്ന് ഏദൻ ഇരുട്ടിലേക്കു വലിച്ചെടുക്കപ്പെട്ടു. ലിന്റ അലറി വിളിച്ചു.