മാന്ത്രികലോകം 3

                  Author – Cyril

                 [Previous part]

ഫ്രൻഷെർ

ഹെമീറ കുളത്തില്‍ വീണതും ആരോ അവളെ വലിച്ചു താഴ്ത്തിയത് പോലെ അവള്‍ താഴ്ന്ന് പോയി.

ഉടനെ എന്റെ കൈയിൽ ആരോ പിടിച്ചു… അത് ആരാണെന്ന് നോക്കും മുന്നേ ഞാനും എന്റെ കൈയിൽ പിടിച്ചിരുന്ന വ്യക്തിയും കുളത്തിലേക്ക് വീഴുകയായിരുന്നു.

വെള്ളത്തിൽ പതിച്ചതും ആ കുളത്തിൽ ഉണ്ടായിരുന്ന ഏതോ ഒരു ശക്തി ഞങ്ങളെ അതിന്റെ ആഴങ്ങളിലേക്ക് വലിച്ചു താഴ്ത്തി.

എന്റെ വീഴ്ച പ്രതീക്ഷിക്കാത്ത ഒന്നായിരുന്നുത് കൊണ്ട് കുളത്തില്‍ മുങ്ങി താഴും മുന്നേ എനിക്ക് ചെറിയൊരു ശ്വാസം മാത്രമേ എടുക്കാന്‍ കഴിഞ്ഞിരുന്നുള്ളു.

കുളത്തിന്റെ പുറത്ത്‌ നിന്ന്‌ നോക്കുമ്പോള്‍ കുളത്തിനു ഇളം പച്ച നിറം ആയിരുന്നുവെങ്കിലും, കുളത്തില്‍ ഞങ്ങൾ താഴും തോറും ഒരു വെള്ള പ്രകാശത്തിന്റെ പ്രഭ കൂടിക്കൂടി വന്നു.

എന്റെ ഇടതു കൈയിൽ മുറുക്കി പിടിച്ചിരുന്ന വ്യക്തി ആരാണെന്ന് ഞാൻ തല ചെരിച്ചു നോക്കി — ഒരു ചെറു ചിരി എന്റെ ചുണ്ടില്‍ വിടര്‍ന്നു.

ഞാൻ സംശയിച്ചത് പോലെ സാഷ തന്നെയായിരുന്നു.

അവളുടെ മറുവശത്ത് ദനീരും ഉണ്ടായിരുന്നു. അവന്റെ വലത് കൈയില്‍ ശാഷ പിടി മുറുക്കിയിരുന്നു.

അപ്പോ ഞങ്ങൾ രണ്ടുപേരെയും ഒരുപോലെ പിടിച്ചുവലിച്ച് കൊണ്ടാണ് അവള്‍ കുളത്തിലേക്ക് ചാടിയത്…!

ഞങ്ങൾക്ക് മുമ്പായി ചാടിയ ഹെമീറ എവിടെയെന്ന് അറിയാൻ എനിക്ക് കഴിയുന്നത് പോലെ എല്ലാ ഇടവും തല തിരിച്ച് നോക്കി… പക്ഷേ ഹെമീറയുടെ നിഴലിനെ പോലും എനിക്കെങ്ങും കാണാന്‍ കഴിഞ്ഞില്ല.

കുളത്തില്‍ അങ്ങിങ്ങായി പിന്നെയും ആരൊക്കെയോ ചാടിയത് മാത്രം ഒരു ചലനം പോലെ എന്റെ ശരീരത്തിനു അനുഭവപ്പെട്ടു.

പെട്ടന്ന് സാഷ ഭയന്നത് പോലെ എന്റെ കൈയിൽ പിടി മുറുക്കി…. ഉടനെ ഞാൻ അവളെ നോക്കി.

പക്ഷേ സാഷ വിളറിയ മുഖത്തോടെ താഴേ നോക്കുകയായിരുന്നു.

ഞാനും പെട്ടന്ന് താഴെ നോക്കി….,

ഞങ്ങൾക്ക് താഴെയായി പമ്പരം പോലെ തെന്നി കറങ്ങുന്ന ഒരു ചെറിയ നീര്‍ച്ചുഴി…..!!

ഞങ്ങൾ നോക്കിനില്‍ക്കെ അത് വലുതായി കൊണ്ടിരുന്നു, വാ പിളര്‍ന്നു കൊണ്ട് ആക്രമിക്കാൻ വരുന്ന വല്യ മത്സ്യത്തെ പോലെ അതു പാഞ്ഞ് വന്നു ഞങ്ങളെ വിഴുങ്ങി.

പെട്ടന്ന് എല്ലാ വെളിച്ചവും ആദ്യം മങ്ങി…. എന്നിട്ട് അപ്രത്യക്ഷമായി…..,

പകരം അന്ധകാരം ഞങ്ങളെ പൊതിഞ്ഞു…,

എന്റെ തൊട്ടടുത്തുള്ള സാഷയെ പോലും എനിക്ക് കാണാന്‍ കഴിഞ്ഞില്ല.