മാന്ത്രികലോകം 3 [Cyril] 2316

എന്റെ നോട്ടം ആദ്യം പോയത് ആകാശത്ത് നിന്നും മങ്ങിയ പ്രകാശം പരത്തുന്ന ചുവന്ന ചന്ദ്രനില്‍ ആയിരുന്നു — അതിന്റെ നടുവിലായി തറപ്പിച്ച് വെച്ചത് പോലെ ഒരു കറുത്ത പക്ഷിയുടെ ആകൃതിയിലുള്ള രൂപത്തെയും ഞാൻ കണ്ടു.

എനിക്ക് അതിനെ കണ്ടിട്ട് കൗതുകം തോന്നി, പക്ഷേ ആ വെത്യസ്ത്തമായ കാഴ്ചയെ എന്റെ കൂടെയുള്ളവർ ആരും നോക്കുക പോലും ചെയ്തില്ല.

ഉടനെ ഞാൻ ഞങ്ങളുടെ സംഘത്തില്‍ നിന്നും പിരിഞ്ഞ് കുറച്ച് ദൂരം നടന്ന് മുന്നോട്ട് പോയി നിന്നു.

സാഷ ആരോടോ ദേഷ്യത്തില്‍ എന്തോ പിറുപിറുത്തു. അവളെന്നെ കുറ്റപ്പെടുത്തി എന്തെങ്കിലും പറഞ്ഞതാവും .

അവിടെ നിന്നുകൊണ്ട് എനിക്ക് ചുറ്റും ഞാൻ കണ്ണോടിച്ചു.

ഞങ്ങൾ കടന്നു വന്ന മുറിയെ ഭയക്കുന്നത് പോലെയാണ് വനപ്രദേശം പോലും അതിന്റെ അതിർത്തിയെ സ്ഥാപിച്ചിരുന്നത്. മുറിക്ക് ചുറ്റും നൂറ്റി ഇരുപതോളം അടി അകലം പാലിച്ചാണ് ഒരേ ഉയരത്തിലുള്ള ചെറിയ മരങ്ങൾ ഇടവിട്ട് ഈ മുറിയെ ചുറ്റി വളഞ്ഞ് അതിർത്തി സൃഷ്ടിച്ചിരുന്നത്.

അതിർത്തിക്കുള്ളിലേ ആ ചുറ്റളവിലുള്ള പ്രദേശത്തു ഒരു പുല്ലിന്റെ പച്ച നിറത്തെ പോലും എനിക്ക് കാണാന്‍ കഴിഞ്ഞില്ല. അവിടെയെല്ലാം ചുവന്ന മൺ തറയെ മാത്രമാണ് എനിക്ക് കാണാന്‍ കഴിഞ്ഞത്.

കാറ്റ് പോലും ആ ചെറു മരങ്ങളില്‍ നിന്നോ അല്ലെങ്കിൽ കാട്ടില്‍ നിന്നോ ഒരു ഇലയെ അല്ലെങ്കിൽ ചെറു ചില്ലയെ പോലും ഇവിടെ സ്ഥാപിച്ചിരുന്ന ആ അതിർത്തിക്കുള്ളിൽ കൊണ്ടിട്ടില്ല എന്നത് എന്നെ അത്ഭുതപ്പെടുത്തി.

അതിർത്തി മരങ്ങള്‍ക്ക് പുറത്തായി എവിടെ നോക്കിയാലും കണ്ണെത്തും ദൂരം വരെ ചുറ്റി വളഞ്ഞിരിക്കുന്ന വനപ്രദേശം മാത്രം…..,

ഞങ്ങൾ കടന്നു വന്ന ഈ മുറിയും, പിന്നെ അതിന്റെ അടിത്തട്ടില്‍ സ്ഥിതി ചെയ്യുന്ന മറു ലോകത്തേക്ക് കടക്കാനുള്ള കവാടവും മാത്രമാണ് ഈ കൊടും വനത്തില്‍ ഉണ്ടായിരുന്നത്.

അതിർത്തിക്ക് പുറത്തു പന്തലിച്ചു നില്‍ക്കുന്ന ചെടികളും, കുറുകിയ മരങ്ങളും, വന്‍ വൃക്ഷങ്ങളും എല്ലാം വളര്‍ന്നു നില്‍ക്കുന്നത് എനിക്ക് ആ ചുവന്ന ചന്ദ്രന്റെ ചുവന്ന വെട്ടത്ത് വ്യക്തമായി കാണാന്‍ കഴിഞ്ഞു.

അതുകൂടാതെ വനത്തില്‍ വൃക്ഷങ്ങള്‍ക്ക് ഇടയിലൂടെ രണ്ട് ദിക്കിലായി വേര്‍തിരിഞ്ഞ് പോകുന്ന രണ്ടു പാതകളേയും എനിക്ക് കാണാന്‍ കഴിഞ്ഞു.

“ഈ ഇരുട്ടത്ത് ആ അതിർത്തി പോലെ കാണുന്ന മരങ്ങൾക്കപ്പുറം എനിക്കൊന്നും വ്യക്തമായി കാണാന്‍ കഴിയുന്നില്ല…. പക്ഷേ അതൊരു വനം ആണെന്ന് മാത്രം മനസ്സിലായി…” അഷറ് ചെറിയ അസ്വസ്ഥതയോടെ പറഞ്ഞു.

വില്ലും അതുപോലെ കഠാരയും ഒരുപോലെ സമര്‍ത്ഥമായി പ്രയോഗിക്കാൻ കഴിവുള്ള ഒരു പോരാളിയാണ് അഷറ്.

“ഇരുട്ടോ…? അത്ഭുതത്തോടെ ഞാൻ ചോദിച്ചു. “ആവശ്യത്തിനുള്ള പ്രകാശം ഉണ്ടല്ലോ……! പിന്നെ വനത്തില്‍ രണ്ട് ദിക്കിലായി തിരിഞ്ഞു പോകുന്ന രണ്ട് പാതയും എനിക്ക് വ്യക്തമായി കാണാന്‍ കഴിയുന്നു….. അതിൽ ഏതെങ്കിലും ഒന്നോ അല്ലെങ്കിൽ അതു രണ്ടും യക്ഷ രാജാവിന്റെ കൊട്ടാരത്തിലേക്ക് നമ്മെ നയിക്കും എന്നാണ് ഞാൻ കരുതുന്നത്.”