മാന്ത്രികലോകം 3 [Cyril] 2317

വലത് കൈയിൽ വാളും ഇടത് കൈയില്‍ കഠാരയും പിടിച്ചാണ് എപ്പോഴും അവന്‍ പൊരുതിയിരുന്നത്.

ഉടനെ ഞങ്ങൾ ആറ് നേതാക്കളും തമ്മില്‍തമ്മില്‍ നോക്കി.

“ഈ സംഘത്തിന്റെ നേതൃത്വം വഹിക്കാന്‍ ഞാൻ താല്പര്യപ്പെടുനില്ല…” സിദ്ധാര്‍ത്ഥ് ധൃതിയില്‍ പറഞ്ഞു.

“എനിക്കും ആ സ്ഥാനം വേണ്ട…” ജാസറും ഈഫിയയും ഒരേ സ്വരത്തില്‍ പറഞ്ഞു.

“എന്റെ അഭിപ്രായത്തില്‍ നമ്മുടെ ഈ സംഘത്തിന്റെ നേതാവായി ദനീർ മതി . കാരണം ഏത് സാഹചര്യത്തിലും അറച്ച് നില്‍ക്കാതെ ചുരുങ്ങിയ സമയം കൊണ്ട് സാഹചര്യത്തിന് അനുയോജ്യമായ തീരുമാനങ്ങൾ എടുക്കാന്‍ അവന് പെട്ടന്ന് കഴിയും.” ഈഫിയ കൂട്ടിചേര്‍ത്തു.

ഈഫിയ പറഞ്ഞത് ശെരിയാണ്. ഏതു സാഹചര്യത്തിലും ദനീരിന് വളരെ പെട്ടന്ന് ഒരു തീരുമാനത്തില്‍ എത്തിപ്പെടാന്‍ കഴിയും.

പക്ഷേ എന്തുതന്നെ ആയാലും എനിക്കും നല്ല പക്വതയോടെ നേതൃത്വം വഹിക്കാന്‍ കഴിയും എന്ന് ഞാൻ വിശ്വസിക്കുന്നു .

ഇങ്ങനെ ഒരു തീരുമാനം കേള്‍ക്കാന്‍ ആഗ്രഹിച്ചത് പോലെ പെട്ടെന്നുതന്നെ മറ്റുള്ളവരും ഈഫിയയുടെ അഭിപ്രായത്തോട് യോജിച്ചു.

സത്യത്തിൽ എന്റെ മനസില്‍ ഒരു ഭാരം കുറഞ്ഞത് പോലെയാണ് തോന്നിയത്…. എന്നാലും എന്റെ ഉള്ളില്‍ ചെറിയൊരു ഭാഗം മാത്രം ഞാൻ നേതാവായിരുന്നെങ്കിൽ എന്ന് ആശിച്ചു.

“ഇവിടെ ഒരു നേതാവിന്റെ ആവശ്യമില്ല എന്നാണ് എന്റെ അഭിപ്രായം. നിങ്ങളെ പോലെതന്നെ എനിക്കും ഈ ലോകം സുപരിചിതമല്ല. അതുകൊണ്ട് നമ്മള്‍ ഒറ്റക്കെട്ടായി നിന്നു എല്ലാം നേരിടാം….

പിന്നേ മാന്ത്രിക കിരീടത്തെ നമുക്ക് കൈവശപ്പെടുത്താൻ കഴിഞ്ഞാല്‍, മറ്റുള്ളവരെക്കാൾ ശക്തിയോ യുക്തിയെ കൂടുതലായി തെളിയിച്ച ആ വ്യക്തിക്ക് കിരീടം സ്വന്തം.” ദനീർ എല്ലാവരെയും നോക്കി ആത്മാര്‍ത്ഥമായി പറഞ്ഞു.

ആര്‍ക്കും അധികം ആലോചിക്കേണ്ടി വന്നില്ല . എല്ലാവരും പെട്ടന്ന് സമ്മതിച്ചു.

“എന്നാൽ ഈ മണ്ഡപത്തിന് പുറത്ത്‌ നമ്മെ എന്താണ് കാത്തിരിക്കുന്നതെന്ന് നമുക്ക് നോക്കാം. പക്ഷേ അതിനുമുമ്പ് എല്ലാവരും അവരവരുടെ ആയുധങ്ങളെ എടുത്തു ധരിച്ച് തയ്യാറായി വേണം പുറത്ത് പോകാൻ. ഈ ലോകം നമുക്കു നേരെ എറിയുന്ന ഏതു തടസ്സങ്ങളേയും മാന്ത്രികരും പോരാളികളമായ നമുക്ക് നിസ്സാരമായി നേരിടാന്‍ കഴിയും.” ഞാൻ തറപ്പിച്ച് പറഞ്ഞു.

സാഷ

മാന്ത്രികന്‍ ആയാലും ഐന്ദ്രിക ആയാലും പോരാളികളുടെ ശക്തിക്ക് ചെയ്യാൻ കഴിയാത്ത ചില ഗുണങ്ങള്‍ ഞങ്ങൾക്കുണ്ട്.

അന്തരീക്ഷത്തില്‍ തന്നെ ഞങ്ങൾക്ക് വലുതോ ചെറുതോ ആയ രഹസ്യ അറകളെ സൃഷ്ടിക്കാന്‍ കഴിയും. മാന്ത്രിക അറ എന്നാണ് അതിനെ ഞങ്ങൾ പറയുന്നത്. അതിനെ സൃഷ്ടിച്ച് കഴിഞ്ഞാൽ ഞങ്ങൾക്ക് അവശ്യ നേരത്ത് അതിനെ പ്രത്യക്ഷപ്പെടുത്താനും അല്ലാത്തപ്പോൾ അതിനെ അപ്രത്യക്ഷമാക്കി നിലനിര്‍ത്താനും കഴിയും.

ആ മാന്ത്രിക അറയിൽ ഞങ്ങൾക്ക് ആവശ്യമുള്ള എന്തും സൂക്ഷിക്കാന്‍ കഴിയും.

ഏതു ലോകത്ത് വെച്ച് വേണമെങ്കിലും വെറുമൊരു വിചാരം കൊണ്ട് ഞങ്ങൾ സൃഷ്ടിച്ച ആ മാന്ത്രിക അറകളെ ഞങ്ങൾക്ക് മുന്നില്‍ പ്രത്യക്ഷപ്പെടുത്താൻ കഴിയും. അതിൽ സൂക്ഷിച്ചിരിക്കുന്ന എന്തും അതിന്റെ ഉടമസ്ഥര്‍ക്ക് എടുക്കാനും കഴിയും.