മാന്ത്രികലോകം 3 [Cyril] 2317

എല്ലാവരെയും പഴയ പോലെ മാറ്റാൻ പോകുന്നു…., പിന്നെ അവരുടെ ചലനമറ്റ ശരീരമാണ് നിങ്ങള്‍ക്ക് വേണ്ടതെങ്കിൽ അത് നിങ്ങളുടെ ഇഷ്ടം…”

“അവരെ രക്ഷിക്കാൻ ആണെങ്കിൽ ഞങ്ങൾക്ക് വിരോധമില്ല…” ഹെമീറ ആശ്വാസത്തോടെ പറഞ്ഞു.

പെട്ടന്ന് ദനീർ ഉറക്കെ കരഞ്ഞു കൊണ്ട് മുന്നോട്ട് ഓടാന്‍ ശ്രമിച്ചതും ഞങ്ങളെ ചുറ്റി നിന്നിരുന്ന യക്ഷമനുഷ്യരിൽ നിന്നും ഒരു സ്ത്രീ അവളുടെ വിരൽ ഞൊടിച്ചതും ഒരു മഞ്ഞ പ്രകാശം ദനീരിനെ പൊതിഞ്ഞു… ഉടനെ ദനീർ അനങ്ങാനാവാതെ നിന്നു.

“അവനെ നിങ്ങൾ എന്താണ് ചെയ്യുന്നത്…” ദനീർ ദേഷ്യത്തോടെ ചോദിച്ചു.

ഉടനെ ഞാനും ഹെമീറയും ദനീറിന്റെ നോട്ടത്തെ പിന്തുടരുന്നു….

യക്ഷമനുഷ്യർ ഞങ്ങളെ ചുറ്റി വളഞ്ഞിരുന്നു എങ്കിലും അവർ തമ്മില്‍ ചെറിയൊരു അകലം പാലിച്ച് നിന്നിരുന്നത് കൊണ്ട്‌ ആ വിടവിലൂടെ ഞങ്ങൾക്ക് എല്ലാം കാണാന്‍ കഴിഞ്ഞു.

ഉടനെ എന്റെയും ഹെമീറയുടെയും വായിൽ നിന്നും ദനീർ ചോദിച്ച അതേ ചോദ്യം ഉയർന്നു….

“അവനെ നിങ്ങൾ എന്താണ് ചെയ്യുന്നത്…”

ഫ്രൻഷെർനെ ചുറ്റി വളഞ്ഞ് നിന്നവരിൽ, ആറു പേരുടെ കൈയിൽ നിന്നും വജ്രാക്ഷസർ സൃഷ്ടിച്ചത് പോലത്തെ ആറ് ചുവന്ന ഗോളുകള്‍ ഫ്രെൻഷർന് നേരെ പാഞ്ഞു പോകുന്നതാണ് ഞങ്ങൾ കണ്ടത്.

എന്തിനാണ് ആറെണ്ണം…?!

ആ ആറ് ഗോളങ്ങളും അവന്റെ ദേഹത്ത് പതിച്ചതും അതിൽ നിന്നും ആറു ദേഹിബന്ദികൾ ഫ്രെൻഷർന്റെ ദേഹത്ത് അലിഞ്ഞ് ചേര്‍ന്നു. അവന്റെ വായിൽ നിന്നും ചെറിയൊരു ശബ്ദം മാത്രം പുറത്ത്‌ വന്നു…. എന്നിട്ട് അവന്റെ ശരീരം പിന്നെയും നിശ്ചലമായി.

“അവന്‍ എന്താണെന്ന് നിങ്ങള്‍ക്ക് അറിയില്ല…. അവനെ സ്വതന്ത്രമായി നടക്കാൻ അനുവദിച്ചാൽ അവന്‍ ഈ ലോകത്തിന് തന്നെ ആപത്ത് സൃഷ്ടിക്കും. മൂന്ന് ദിവസം മുമ്പാണ് അവന്‍ ഒഷേദ്രസിന്റെ രക്തം സ്വീകരിച്ച് ഒഷേദ്രസിന്റെ അനുയായിയായി മാറിയത്. ഇനി അവന്റെ വാസം ഞങ്ങളുടെ മാന്ത്രിക തടവറയില്‍ ആയിരിക്കും… അവിടെ അവന്റെ ശക്തി ചോര്‍ന്ന് വെറുമൊരു സാധാരണ മനുഷ്യനായി പുറംലോകം കാണാതെ വെറുമൊരു ബന്ദിയായി ജീവിക്കും…” ഹൈനബദ് പറഞ്ഞു.

അത് കേട്ട് ഞങ്ങൾ ഞെട്ടി. കുറച്ച് നേരത്തേക്ക് ഞങ്ങൾക്ക് ഒന്നും പറയാൻ കഴിഞ്ഞില്ല.

ദനീർ കോപത്തോടെ ഹൈനബദ്ദിനെ നോക്കി.

കഴിഞ്ഞ മൂന്ന് ദിവസങ്ങളില്‍ ഫ്രെൻഷർന്റെ പെരുമാറ്റം ഞാൻ ചിന്തിച്ച് നോക്കി.

കുറച്ച് നേരം ഞാൻ മിണ്ടാതെ നിന്നുകൊണ്ട് ആലോചിച്ചു… എന്നിട്ട് ഞാൻ ഹൈനബദ്ദിനെ ദേഷ്യത്തോടെ നോക്കി പറഞ്ഞു —,

“അവന്‍ ശെരിക്കും ഒഷേദ്രസിന്റെ അനുയായിയായി മാറിയെങ്കിൽ എന്തുകൊണ്ട്‌ അവന്‍ ഒഷേദ്രസിന്റെ സൃഷ്ടികളായ വജ്രാക്ഷസരെ നശിപ്പിക്കണം…? എന്തുകൊണ്ട്‌ ഞങ്ങളെ ആ നീച ജന്തുക്കളുടെ പിടിയില്‍ നിന്നും രക്ഷിക്കണം…? അവന്‍ ഒഷേദ്രസിന്റെ അനുയായി ആണെന്ന് ഞാൻ വിശ്വസിക്കുന്നില്ല.”