മാന്ത്രികലോകം 3 [Cyril] 2317

എല്ലാവർക്കും താക്കീത് നല്‍കാനായി ഞാൻ ഉറക്കെ വിളിച്ച് കൂവി. പക്ഷേ ആരെങ്കിലും എന്തെങ്കിലും ചെയ്യും മുന്നേ ആ നാല് ഗോളങ്ങളും അവര്‍ നാലുപേരുടെ മേല്‍ പതിച്ചു.

എന്താണ്‌ സംഭവിച്ചത് എന്ന് ആര്‍ക്കെങ്കിലും മനസ്സിലാക്കാന്‍ കഴിയും മുന്നേ രണ്ട് വജ്രാക്ഷസരും നാല് വീതം ഗോളങ്ങളെ ഈരണ്ട് തവണ കൂടി എറിഞ്ഞ് കഴിഞ്ഞിരുന്നു.

പിന്നെയും അവർ ആ ചുവന്ന ഗോളങ്ങളെ സൃഷ്ടിക്കാന്‍ ശ്രമിച്ചെങ്കിലും അവര്‍ക്ക് അതിന്‌ കഴിഞ്ഞില്ല എന്ന് തോന്നി…. കാരണം അവർ കൈ ഉയർത്തി പിടിച്ചെങ്കിലും ഗോളങ്ങൾ അവരുടെ കൈയിൽ പ്രത്യക്ഷപ്പെട്ടില്ല.

ആ ഗോളങ്ങൾ ദേഹത്ത് പതിക്കും മുന്നേ ചിലരൊക്കെ അതിൽ നിന്നും ഒഴിഞ്ഞ് മാറിയിരുന്നു.

ആ ഗോളം ഏതെങ്കിലും വിദ്യാർത്ഥികളുടെ ശരീരത്തിൽ പതിച്ച ഉടനെ ആ ശരീരത്തിന്റെ അത്രയും വലിപ്പമുള്ള പിരി പോലത്തെ ഒരു ചുവന്ന പ്രകാശം ആ ഗോളത്തിൽ നിന്ന് പ്രത്യക്ഷപ്പെടുകയും… ആ പ്രകാശം ആ വിദ്യാർത്ഥിയുടെ ശരീരത്തിൽ അലിഞ്ഞ് ചേരുകയും ചെയ്തു. ഉടനെ ആ വിദ്യാര്‍ത്ഥികള്‍ പ്രതിമ പോലെ ചലനമറ്റ് നിന്നു.

ഞങ്ങൾ അഞ്ച് പേര്‍ ഒഴികെ മറ്റുള്ളവർ പ്രതികളെ പോലെ ചലനമറ്റ് നില്‍ക്കുകയാണ്.

നുരഞ്ഞു പൊന്തിയ ക്രോധത്തോടെ ഞാൻ ആ രണ്ട് വജ്രാക്ഷസരേയൂം ദഹിപ്പിക്കുന്ന പോലെ നോക്കി.

അവരുടെ കണ്ണിലും വയറ്റിലും ഞങ്ങൾ ഏല്പിച്ച മുറിവുകള്‍ എല്ലാം പൂര്‍ണമായി ഭേദമായി കഴിഞ്ഞിരുന്നു.

ആരെല്ലാമോ ഓടി എന്റെ അടുത്ത് വന്നത് ഞാൻ അറിഞ്ഞു. പക്ഷേ അത് ആരാണെന്ന് ഞാൻ നോക്കിയില്ല.

പ്രതിമകള്‍ പോലെ ചലനമറ്റ് നില്‍ക്കുന്ന പതിനൊന്ന് വിദ്യാര്‍ത്ഥികളെയും ഞാൻ വേദനയോടെ നോക്കി.

എന്റെ കണ്ണില്‍ നിന്നും ക്രോധത്തിന്റെ കണ്ണുനീര്‍ ഒഴുകുന്നുണ്ടായിരുന്നു.

“എന്തെല്ലാം ശക്തികളാണ് അവർക്ക് ഉള്ളതു….?” എന്റെ അടുത്ത് നിന്നും സുല്‍ത്താന്‍ കോപത്തോടെ ചോദിച്ചു.

“ചില കാര്യത്തിൽ നമ്മൾ ശിബിരത്തിൽ പഠിച്ചത് പോലെ ഒന്നുമല്ല ഈ വജ്രാക്ഷസർ…. ഇവർക്കും എന്തെല്ലാമോ മാന്ത്രിക ശക്തികള്‍ ഉണ്ട്…. അതുപോലെ അവരുടെ മുറിവുകള്‍ എല്ലാം എത്ര വേഗമാണ് താനെ ഭേദമായത്…!!” സിദ്ധാര്‍ത്ഥ് ദേഷ്യത്തില്‍ പറഞ്ഞു.

“നമ്മുടെ സുഹൃത്തുക്കളെ നമുക്ക് രക്ഷിക്കാൻ കഴിയില്ലേ….?” ഹെമീറ ദുഃഖത്തോടെ ചോദിച്ചു.

“ഈ വജ്രാക്ഷസരുടെ കാര്യത്തിൽ ഒരു തീരുമാനം ഉണ്ടാക്കാതെ നമുക്ക് മറ്റൊന്നും ചെയ്യാൻ കഴിയില്ല….. അവരുടെ ശക്തി ക്ഷയിച്ചത് കൊണ്ടാണ്‌ അവര്‍ക്കു പിന്നെയും ആ ഗോളങ്ങളെ സൃഷ്ടിക്കാന്‍ കഴിയാത്തത്…. ഒരുപക്ഷേ ഇപ്പോൾ നമുക്ക് അവരെ കൊല്ലാന്‍ പോലും സാധിക്കും എന്നാണ് എനിക്ക് തോന്നുന്നത്.” ദനീർ രോഷത്തോടെ പറഞ്ഞു.

‘ശക്തരായ മാന്ത്രികർ സൃഷ്ടിക്കുന്ന ശക്തിയേറിയ ദ്രാവക അഗ്നിക്ക് മാത്രമേ വജ്രാക്ഷസരെ നശിപ്പിക്കാന്‍ കഴിയു….!!’ മാന്ത്രികബോധം എന്റെ മനസില്‍ പറയുന്നത് ഞാൻ കേട്ടു.