മാന്ത്രികലോകം 3 [Cyril] 2317

അവർ ആ പ്രകാശം ഗോളത്തെ ഒരു പുഞ്ചിരിയോടെ നോക്കി നിന്നു. ഞാനും അതിനെ കൗതുകത്തോടെ നോക്കി.

ഞങ്ങൾ നോക്കി നില്‍ക്കേ ആ പ്രകാശ ഗോളത്തിൽ നിന്നും കരിഞ്ചുവപ്പ് നിറത്തിലുള്ള പ്രകാശം ചുട്ടു പഴുപ്പിച്ച ആയിരക്കണക്കിന് അസ്ത്രങ്ങളായി മാറി മുന്നിലേക്കും ഗോളത്തിന്റെ ഇരു വശത്തേക്കും പാഞ്ഞു പോയി.

പെട്ടന്ന് ആ രണ്ട് മൃഗങ്ങളും ഞങ്ങളെ അധിക്ഷേപിച്ചു ചിരിക്കും പോലെ മുരണ്ടു. അതോടൊപ്പം രണ്ട് രൂപങ്ങള്‍ ഞങ്ങൾക്ക് മുന്നില്‍ തെളിഞ്ഞു വരാൻ തുടങ്ങി.

അതിനെ കണ്ട് ഞങ്ങൾ എല്ലാവരും ഞെട്ടി വിറച്ചു — ഞങ്ങൾ വിചാരിച്ചത് പോലെ അത് മൃഗങ്ങള്‍ അല്ലായിരുന്നു….!!

“വജ്രാക്ഷസർ….!!”

ഫ്രേയ പേടിച്ച് വിറച്ച് കൊണ്ട് പറഞ്ഞു.

ദൈവങ്ങള്‍ തമ്മിലുള്ള യുദ്ധം തുടങ്ങുന്നതിന് കുറച്ച് വർഷങ്ങൾക്ക് മുമ്പ് മാന്ത്രികപോരാളികളെ നശിപ്പിക്കാൻ വേണ്ടിയാണ് ഒഷേദ്രസ് വജ്രാക്ഷസർ എന്ന വര്‍ഗ്ഗതേ സൃഷ്ടിച്ചത് — വെറും മുപ്പത്തിയാറു വജ്രാക്ഷസരെ മാത്രമാണ് ഒഷേദ്രസ് സൃഷ്ടിച്ചിരുന്നത്.

പക്ഷേ അതുതന്നെ ധാരളം ആയിരുന്നു.

എട്ട് അടി ഉയരമുള്ള അവർക്ക് മനുഷ്യന്റെ തലയേക്കാൾ മൂന്നിരട്ടി വലിപ്പമുള്ള തലയും….., ഒന്നിന് താഴേ മറ്റൊന്നായി ഒരു കുഞ്ഞിന്റെ ചുരുട്ടി പിടിച്ച മുഷ്ടിയുടെ അത്രയും വലിപ്പമുള്ള രണ്ട് കണ്ണുകളും…., തലയ്ക്ക് ഇരു വശത്തും കുതിരകള്‍ക്ക് ഉള്ളത്‌ പോലത്തെ ചെവികളും…., ചെന്നായ്ക്കളുടെ പോലുള്ള വായും കോമ്പല്ലും…., നീളമുള്ള തടി പോലത്തെ കൈകളും….., മൂന്ന് അടി വീതിയുള്ള നെഞ്ചും വയറും…., കാഴ്ചക്ക് ആനയുടെത് പോലെ തോന്നിക്കുന്ന രണ്ട് കാലുകളും ആണ് അവര്‍ക്കുള്ളത്.

നല്ല കട്ടിയുള്ള, ഉരുക്കിനേക്കാൾ ഉറപ്പുള്ള തോലാണ് അവരുടേത് . അവര്‍ക്ക് ആത്മാവ് ഇല്ലെന്നും, സ്വാഭാവിക മരണം ഇല്ലെന്നും, സാധാരണ ആയുധങ്ങൾ കൊണ്ടോ മാന്ത്രിക ആയുധങ്ങൾ കൊണ്ടും അവരെ കൊല്ലാന്‍ കഴിയില്ല എന്നും….. സാധാരണ മാന്ത്രിക ശക്തി കൊണ്ടും അവരെ കൊല്ലാന്‍ കഴിയില്ല എന്നും ആണ് ശിബിരത്തിൽ ഞങ്ങൾ പഠിച്ചിട്ടുള്ളത്.

മാന്ത്രികരുടേയും പോരാളികളുടേയും മാംസമാണ് അവരുടെ പ്രിയപ്പെട്ട ആഹാരം…. മനുഷ്യരെ ബന്ദിയാക്കി അവരെ തങ്ങളുടെ താവളത്തില്‍ കൊണ്ട് പോയി മാത്രമേ അവരെ ചിത്രവധം ചെയ്ത് അവരെ ജീവനോടെ ഭക്ഷിക്കുകയുള്ളു. അവര്‍ക്ക് അപ്രത്യക്ഷരായി സഞ്ചരിക്കാനും കഴിയും.

ആ വര്‍ഗ്ഗത്തെ കുറിച്ച് ഇത്രയേറെ വിവരങ്ങളും ഞങ്ങളുടെ പക്കല്‍ ഉണ്ടെങ്കിലും അവരെ എങ്ങനെ വധിക്കണം എന്ന പ്രധാനപ്പെട്ട കാര്യം മാത്രം ഞങ്ങള്‍ക്ക് എവിടെനിന്നും പഠിക്കാൻ കഴിഞ്ഞില്ല.

ദൈവങ്ങള്‍ തമ്മിലുള്ള യുദ്ധം കഴിഞ്ഞ ശേഷം വളരെ ശക്തിയുള്ള മാന്ത്രികർ പല വര്‍ഷങ്ങളായി വേട്ടയാടി ഇരുപതു വജ്രാക്ഷസരെ വധിച്ചതായി ഏടുകളില്‍ കുറിച്ചിട്ടുണ്ട്….. പക്ഷേ ആ ഇരുപത് പേര്‍ കൊല്ലാന്‍ വേണ്ടി ആയിരക്കണക്കിന് മാന്ത്രികരാണ് അവരുടെ കൈയിൽ നിന്നും കൊല്ലപ്പെട്ടത്.

പിന്നേ ശേഷിച്ച ആ പതിനാറു വജ്രാക്ഷസരെ കുറിച്ചുള്ള വിവരങ്ങള്‍ ഒന്നുംതന്നെ വര്‍ഷങ്ങളായി ആര്‍ക്കും അറിയില്ലായിരുന്നു.

ഇപ്പോളിതാ രണ്ടെണ്ണം ഞങ്ങൾക്ക് മുന്നില്‍ നില്‍ക്കുന്നു.