മാന്ത്രികലോകം 3 [Cyril] 2317

ഇപ്പോഴും എനിക്ക് ആ ചന്ദ്രനെ കാണാന്‍ കഴിഞ്ഞു — പക്ഷേ അങ്ങകലെ ഒരു പൊട്ട് പോലെ മാത്രമാണ് കാണാന്‍ കഴിഞ്ഞത്.

“ഇനി ഇടത്തോട്ട് പോണോ അതോ വലത്തോട്ടോ…?” ഫ്രേയ നദി കരയുടെ രണ്ട് വശത്തും ഉണ്ടായിരുന്ന വഴിയില്‍ നോക്കി അവളുടെ തള്ള വിരലിലുള്ള നഖം കടിച്ച് കൊണ്ട് സംശയത്തോടെ ചോദിച്ചു.

“വലത്തോട്ട്….” ഞാനും സിദ്ധാര്‍ത്ഥും ഒരേ സ്വരത്തില്‍ പറഞ്ഞു.

എന്റെ നോട്ടം വലതു വശത്ത് അങ്ങകലെ, സൂക്ഷിച്ച് നോക്കിയാല്‍ മാത്രം കാണുന്ന, അന്തരീക്ഷത്തില്‍ ചെറുതായി അനങ്ങുന്ന ഒരു കൊടിയില്‍ ആയിരുന്നു. ദൂരം കൂടുതൽ ആയതുകൊണ്ട് അതിന്റെ നിറമോ അതിലുള്ള മുദ്ര എന്തെന്നോ എനിക്ക് കാണാൻ കഴിഞ്ഞില്ല.

ഉടനെ മറ്റുള്ളവരും എന്റെ നോട്ടത്തെ പിന്തുടര്‍ന്ന് ആ കൊടിയെ കണ്ടു.

“അത് കൊട്ടാരത്തിന്റെ മുകളില്‍ പറക്കുന്ന കൊടിയാണോ…?” അഖില്‍ ആ കൊടിയെ കൂറ്പ്പിച്ച് നോക്കിക്കൊണ്ട് ചോദിച്ചു.

“ഇവിടെ നിന്ന് കൊട്ടാരത്തെ കാണാന്‍ കഴിഞ്ഞില്ല എങ്കിലും അത് തന്നെയാണ് കൊട്ടാരം എന്ന് എനിക്ക് തറപ്പിച്ച് പറയാൻ കഴിയും.” നദേയ പറഞ്ഞു.

പെട്ടന്ന് അദൃശ്യരായ ഏതോ ശക്തികള്‍ ഞങ്ങളെ നിരീക്ഷിക്കുന്നത് പോലത്തെ ഒരു തോന്നല്‍ എനിക്ക് ഉണ്ടായി.

ചെറിയൊരു ഭയം എനിക്ക് തോന്നി. നേരത്തെ കാട്ടില്‍ കേട്ടുകൊണ്ടിരുന്ന ചെറിയ പക്ഷി പ്രാണികളുടെ ശബ്ദവും നിലച്ചിരുന്നു.

ആപത്ത് വരുന്നുണ്ട് എന്ന് എന്റെ മനസ് നിര്‍ത്താതെ മന്ത്രിച്ച് കൊണ്ടിരുന്നു.

ഭയം മുഖത്ത് പ്രകടമാക്കാതെ നദിക്ക് എന്റെ പുറം കാണിച്ച് നിന്നുകൊണ്ട് കാട്ടിലേക്ക് ഞാൻ മിഴി കൂറ്പ്പിച്ച് നോക്കി…. പിന്നെ കാണാന്‍ കഴിയുന്ന മരങ്ങളുടെ ശിഖരങ്ങളില്‍ ആരെങ്കിലും മറഞ്ഞിരിക്കുന്നോ എന്നും ഞാൻ നോക്കി. പക്ഷേ വെത്യസ്ത്തമായ ഒന്നും തന്നെ എന്റെ കണ്ണില്‍ പെട്ടില്ല.

“നമ്മെ ആരോ നിരീക്ഷിക്കുന്നത് പോലെ എനിക്ക് തോന്നുന്നു…!!” ദനീരും നദേയയും ഒരേ സ്വരത്തില്‍ പറഞ്ഞു.

ആപത്ത് അടുത്ത് വന്നു എന്ന് പെട്ടന്ന് എന്റെ മനസ്സ് താക്കീത് നല്‍കി. ഉടനെ ഞാൻ എന്റെ അരയില്‍ പിടിപ്പിച്ചിരുന്ന പട്ടയുടെ കൊളുത്തിൽ നിന്നും വാളും ഉറയും ഞാൻ അടർത്തി എടുത്തു…. എന്നിട്ട് തോളില്‍ ഉണ്ടായിരുന്നു വില്ലും ആവനാഴിയും പിന്നെ കൈയിലിരുന്ന വാളിന്റെ ഉറയും ഒരു മരത്തിൽ ചാരി വെച്ചിട്ട് വെറും വാളും പിടിച്ചുകൊണ്ട് ഞാൻ ഒരു മരത്തിൽ എന്റെ പുറം ചേര്‍ത്ത് നിന്നു.

സാഷ ഫ്രേയ നദേയ എന്നിവർ അവരവരുടെ വില്ലെടുത്തു…. സാഷ അതിന്റെ ഞാണിൽ പിടിച്ചുകൊണ്ട് വിലക്കാന്‍ തയാറായി നിന്നു. ഫ്രേയും നദേയയും അവരുടെ വില്ലന്റെ ഞാണിൽ അസ്ത്രം വെറുതെ കൊരുത്ത് കൊണ്ട്‌ തൊടുക്കാൻ തയാറായി നിന്നു — അവർ മൂന്ന് പേരും നദിക്ക് പുറം കാണിച്ച് കൊണ്ട് മൂന്ന് ദിശയില്‍ നോക്കിയാണ് നിന്നത്.

ദനീരും ഹെമീറയും അവരുടെ തോളില്‍ കൊരുത്ത് ഇട്ടിരുന്ന വാള്‍ ഉറയിൽ നിന്നും അവരുടെ വാളിനെ വലിച്ചെടുത്ത് കൊണ്ട് എന്തിനും തയ്യാറായി നിന്നു.