മാന്ത്രികലോകം 3 [Cyril] 2317

അവന്റെ കുറ്റപ്പെടുത്താന്‍ കേട്ടിട്ട് ഫ്രെന്നിന്റെ മുഖം ഇരുണ്ട മേഘം പോലെയായി…

പക്ഷേ സുല്‍ത്താന്‍ നിര്‍ത്താതെ പിന്നെയും തുടർന്നു—,

“ഇങ്ങനെയുള്ള നി, ഒരു നുണയൻ അല്ലാതെ എന്ത്…? അല്ലെങ്കിൽ നിന്റെ അമ്മക്ക് ഉണ്ടായിരുന്നത് പോലത്തെ ഭ്രാന്ത് നിനക്കും ഉണ്ടായിരിക്കണം… നിന്റെ അമ്മ ജീവിച്ചിരുന്നപ്പോള്‍ ആര്‍ക്കും മനസ്സിലാവാത്ത കാര്യങ്ങൾ പറയുമായിരുന്നു…. ഇപ്പോൾ നീയും അത് ചെയ്യുന്നു. നിനക്ക് മാത്രം എന്തെല്ലാമോ കാണാന്‍ കഴിയുന്നു എന്ന തോന്നല്‍ മാത്രമാണ് ഇതെല്ലാം…!!

ഒരുപക്ഷേ ഇതുപോലത്തെ രസമുള്ള നുണകള്‍ പറഞ്ഞായിരിക്കും പലരെയും നി നിന്റെ വശത്താക്കിയത്.…..,,

പോരാത്തതിന് നീയൊരു തന്തയില്ലാത്തവനും ആണെന്ന് ശിബിരത്തിൽ ആര്‍ക്കാണു അറിയാ—”

പെട്ടന്ന് സുല്‍ത്താന്‍ വാ പൊത്തിപ്പിടിച്ചു…. ഉടനെ അവന്റെ മുഖത്ത് ഉണ്ടായിരുന്ന ദേഷ്യം മാറി കുറ്റബോധം പടർന്നു…

സുല്‍ത്താന്റെ ആ വാചകം ഫ്രെന്നിനെ ശെരിക്കും ഭ്രാന്ത് പിടിപ്പിച്ചു…. ഫ്രെന്നിന്റെ കണ്ണില്‍ നിന്നും ദേഷ്യത്തിന്റെ കണ്ണുനീര്‍ ചാടി….,

ക്രോധം അവന്റെ സകല നല്ല ബുദ്ധിയെയും അടിമപ്പെട്ടുത്തിയത് പോലെ അവന്റെ വായിൽ നിന്നും ഒരു അലര്‍ച്ച പുറത്ത് വന്നു.

എന്നിട്ട് മിന്നല്‍ വേഗത്തില്‍ ഫ്രെൻ സുല്‍ത്താന്റെ നേര്‍ക്കു എടുത്തുചാടി… സുല്‍ത്താന് പ്രതികരിക്കാന്‍ കഴിയും മുന്നേ ചുരുട്ടി പിടിച്ചിരുന്ന ഫ്രെന്നിന്റെ മുഷ്ടി സുല്‍ത്താന്റെ മുഖത്ത് ശക്തിയോടെ പതിച്ചു…,

സുല്‍ത്താന്റെ താടിയെല്ല് പൊട്ടുന്ന ശബ്ദം ഞങ്ങളുടെ കാതില്‍ പതിച്ചു — ഉടനെ സുല്‍ത്താന്‍ അവന്റെ മുഖം പൊത്തിപ്പിടിച്ചു കൊണ്ട് കുനിഞ്ഞു നിന്നു അലറി….,

ഞങ്ങൾ എല്ലാവരും ഒരു നിമിഷം സ്തംഭിച്ചു നിന്നു..,

പക്ഷേ ഫ്രെന്നിന്റെ കോപം അപ്പോഴും അടങ്ങിയിരുന്നില്ല.

ഫ്രെൻ അവന്റെ ഇടതു കൈ നീട്ടി സുല്‍ത്താന്റെ കഴുത്തിൽ മുറുക്കി പിടിച്ചു കൊണ്ട് അവനെ നിലത്ത് നിന്നും ഉയർത്തി… എന്നിട്ട് അവന്റെ വലത് കൈ പരത്തി സുല്‍ത്താന്റെ നെഞ്ചില്‍ അവന്‍ ശക്തമായി അടിച്ചു…,

സുൽത്താൻ ഒരു കരച്ചിലോടെ തെറിച്ചു പോയി കുറച്ചകലെ വീണു പിടഞ്ഞു.

അതോടെ അവിടമാകെ എല്ലാവരുടെയും ഒച്ചയും ബഹളും മാത്രം ഉയര്‍ന്നു കേൾക്കാൻ തുടങ്ങി.

പെട്ടന്ന് ഞാൻ പാഞ്ഞ് ചെന്നു ഫ്രെന്നിനെ അടക്കി പിടിച്ചു.

പക്ഷേ ഫ്രെൻ അവന്റെ ഇടത് കൈ ഉയർത്തി പിന്നിലേക്ക് കൊണ്ടുവന്ന് എന്റെ കഴുത്തിൽ പിടിച്ചു മുറുക്കി…, എന്നിട്ട് ഞാൻ വെറുമൊരു ഒരു പുഷ്പം എന്നപോലെ അവന്‍ എന്നെ ഉയർത്തുകയും അതേ സമയത്ത് എന്നെ നിസ്സാരമായി അവന്റെ മുന്നിലോട്ട് എന്നെ എറിയുകയും ചെയ്തു.

ഞാൻ പറന്ന് ചെന്ന് അവന്റെ മുന്നില്‍ മുഖം കുത്തി വീണു.

അവന്റെ ആ പ്രകടനം കണ്ടു ഞാൻ പോലും ഞെട്ടി.