മാന്ത്രികലോകം 3 [Cyril] 2317

ഫ്രൻഷെർ

ഏറ്റവും മുന്നിലായി — ഞാൻ, സാഷ, ദനീർ പിന്നെ സുല്‍ത്താന്‍ ഒപ്പത്തിനൊപ്പം നടന്നു പടികള്‍ കയറാൻ ആരംഭിച്ചു.

ഞാൻ ഇടത്തേ അറ്റത്തും, സാഷയും ദനീരും നടുവിലായും, പിന്നെ സുല്‍ത്താന്‍ വലത്തെ അറ്റത്തുമായാണ് നടന്നത്.

ഞാനും സാഷയും ഞങ്ങളുടെ കൈ കോര്‍ത്ത്‌ കൊണ്ടാണ് പടികള്‍ കയറിയത്.

ഇടക്ക് സാഷ ഒന്ന് തിരിഞ്ഞ് ഫ്രേയയെ നോക്കി കളിയാക്കും പോലെ ചിരിച്ചു. കുറച്ച് പിന്നിലായി നടന്നു വരുന്ന ഫ്രേയ മുഖം ചുളിച്ചു കൊണ്ട് അവളെ തുറിച്ചുനോക്കി.

അവർ തമ്മിലുള്ള പ്രശ്‌നം എന്താണെന്ന് എനിക്ക് മനസ്സിലായില്ല. അല്ലെങ്കിലും അവർ തമ്മില്‍ ഒരിക്കലും ചേരില്ല എന്നത് മാത്രം എനിക്കറിയാമായിരുന്നു.

“ഞാൻ കൊച്ചുകുട്ടി ഒന്നുമല്ല എന്നെ പിടിച്ചു നടത്താൻ….” പെട്ടന്ന് സാഷ എന്നോട് ഗൗരവതരത്തിൽ പറഞ്ഞതു.

ഉടനെ അവളുടെ കൈയിൽ നിന്നും ഞാൻ പിടി വിട്ടു. പക്ഷേ അതിനും അവള്‍ തുറിച്ച് നോക്കി.

ഇപ്പോൾ ഞാൻ എന്ത് തെറ്റാണ് ചെയ്തത്….? ഞാൻ സ്വയം ചോദിച്ചു.

എന്റെ തല ഞാന്‍ മെല്ലെ ആട്ടി കൊണ്ട് ഞങ്ങൾ കയറുന്ന പടിക്കളിൽ ഞാൻ ശ്രദ്ധയോടെ നോക്കി. ഓരോ ചാര നിറത്തിലുള്ള കല്ല് പടവുകള്‍ക്കും പത്തു അടി വീതിയും ഒന്നര അടി ഉയരവും ഉണ്ടായിരുന്നു.

ഞങ്ങൾ നാല് പേരും രണ്ട് പടികള്‍ കയറിയ ശേഷമാണ് മറ്റുള്ളവർ ഞങ്ങളെ പിന്തുടര്‍ന്നു കയറാൻ തുടങ്ങിയത്.

പത്ത് പടികള്‍ക്ക് ശേഷം വലതു വശത്തേക്ക് ഒരു തിരിവും വന്നു….ആ തിരിവ് ഞങ്ങൾ തിരിഞ്ഞതും അന്‍പത് അടിയോളം ഞങ്ങൾക്ക് മുന്നില്‍ നീണ്ട് കിടക്കുന്ന ഇടനാഴിയും അത് അവസാനിക്കുന്നിടത്ത് ഒരു വലിയ വാതിലും ഉണ്ടായിരുന്നു.

ഇടനാഴിയുടെ ഇരു വശത്തുള്ള ചുവരിലും ദൈവങ്ങള്‍ തമ്മില്‍ യുദ്ധം ചെയ്യുന്ന ചിത്രങ്ങളെ കൊത്തി വെച്ചിരുന്നു…..

ഞങ്ങൾ എല്ലാവരും ആ ചിത്രങ്ങളെ കൗതുകത്തോടെ നോക്കിയാണ് നടന്നത്.

അവസാനം ആ അടഞ്ഞ വാതിലിന്റെ മുന്നില്‍ വന്ന് ഞങ്ങൾ നിന്നു.

ഒന്ന് മടിച്ച് നിന്ന ശേഷം അതിനെ തള്ളി തുറന്നു ഞാൻ അതിന്റെ അകത്തുകയറി.

ഞങ്ങള്‍ക്ക് മുന്നില്‍ പിന്നെയും പടികള്‍ ഉണ്ടായിരുന്നു — അതും പത്ത് പടികള്‍ മാത്രം.