ഇനിമുതൽ രാത്രിയിൽ യാത്ര വേണ്ടാ – [Santhosh Nair] 910

കണ്ടക്ടർ പറഞ്ഞു “എല്ലാവരും ക്ഷമിയ്ക്കണം. ഇവിടം വരെ വരാൻ തന്നെ നമ്മൾ കഷ്ടപ്പെട്ടു. ഇനിയങ്ങോട്ടുള്ള വഴി വളരെ മോശം ആണ്. ഇവിടുന്നു വണ്ടി പോവില്ല, എല്ലാവരും ടിക്കറ്റ് റീഫണ്ട് വാങ്ങിയ്ക്കോളൂ”

വേറെ എന്ത് ചെയ്യാൻ? ടിക്കറ്റ് റീഫണ്ട് വാങ്ങി. അടുത്ത ബസ് അര മണിയ്ക്കൂർ കഴിഞ്ഞേയുള്ളൂവത്രെ. അത് വീടിനടുത്തേയ്ക്കു പോവില്ല. ഒരു കിലോ മീറ്ററിനു മുൻപു വരെയേ ഉള്ളൂ. അല്ലെങ്കിൽ പതിനൊന്നു മണി കഴിഞ്ഞേ പിന്നത്തെ ബസ് ഉള്ളൂ. അതാണെങ്കിൽ ഇത് വരെ സ്റ്റാൻഡിൽ വന്നിട്ടുമില്ല. ചിലപ്പോൾ വന്നില്ലെങ്കിൽ വലിയ റിസ്ക് ആവും. ലോങ്ങ് സർവീസ് ആയതിനാൽ ചിലപ്പോൾ തിരക്കു കൂടുതലുണ്ടാവും.

എന്തായാലും പോയേക്കാം. ഭാഗ്യത്തിനു ഒരു കാലൻ കുടയും കയ്യിലുണ്ട്. മഴ പെയ്താൽ പ്രശ്നം ഇല്ല. ബാഗൊന്നും ഇല്ല. മുണ്ടു മടക്കിക്കുത്തി ഒരു നടപ്പു നടക്കാം,അത്രതന്നെ. നമ്മളോടാ കളി, ഹേത്?

എന്തായാലും ഈ ഡ്രൈവർ ഒരു സൂപ്പർസ്റ്റാർ ആയിരുന്നു. ഒരു മണിക്കൂർ കൊണ്ട് പോകേണ്ട ദൂരം മുക്കാൽ മണിക്കൂർ കൊണ്ടു ചെന്നു ചേർത്തു. ഇറങ്ങേണ്ട സ്ഥലം അടുക്കുമ്പോഴേയ്ക്കും നല്ല മഴ, ദൈവം സഹായിച്ചു കറണ്ടും തരികിട തോം.

ഇനി ജീവിതത്തിലൊരിയ്ക്കലും സ്വന്തം മുഖം കണി കാണുന്ന പ്രശ്നമേ ഇല്ല. ഭീഷ്മ ശപഥം എടുത്തു കൊണ്ടു ഇറങ്ങി, സ്വന്തം നടരാജ് മോട്ടോർസ് സ്റ്റാർട്ട് ചെയ്തു ടോപ് ഗിയർ ഇട്ടു.

നടന്നു തുടങ്ങിയപ്പോഴേയ്ക്കും ഭാഗ്യത്തിനു മഴ നിന്നു, രക്ഷപ്പെട്ടു, പക്ഷെ കറന്റില്ലല്ലോ, ഒരു കിലോമീറ്ററിലധികം നടക്കണം. വഴിയിലെങ്ങും ഒരു പട്ടിക്കുഞ്ഞു പോലും ഇല്ല, ധൈര്യവാന്റെ ആദ്യത്തെ രണ്ടക്ഷരത്തിന്റെ സ്റ്റോക്ക് കുറേശ്ശേ കുറേശ്ശേ കുറഞ്ഞു തുടങ്ങി.

വെളിച്ചം നഹി, ബഹുത് ബഹുത് ഇരുട്ട്. റോഡിൽ കോയി നഹി.

“ആവാരാ ഹൂം” പാട്ടു ഉറക്കെപ്പാടിയ്ക്കൊണ്ടു ലാലേട്ടനെ മനസ്സിൽ വിചാരിച്ചുകൊണ്ടു നടന്നു തുടങ്ങി.

https://www.youtube.com/watch?v=VY1pWTek2sY

ഹൈറേൻജ് അല്ലെ, വഴിയുടെ രണ്ടു സയിഡിലും മരങ്ങൾ അടിയ്ക്കുന്ന കാറ്റിൽ നന്നായി ഡാൻസ് ചെയ്യുന്നുണ്ട് – മനുഷ്യനെ ഭയപ്പെടുത്തുക തന്നെയാവും ഇവരുടെ അപ്രഖ്യാപിത ലക്‌ഷ്യം. കൺട്രി ഫെല്ലോസ്, മരങ്ങളാണു പോലും. ഇവയൊക്കെ കൊലമരങ്ങളാണ്.