പക്വത

Author : വില്ലി

” അമ്മേ ദേ അവനെ കാണാൻ പുറത്ത് ഒരു പെണ്ണ് വന്നിരിക്കുന്നു.. ”

” എന്റെ അമ്മേ ദേവി .,.. ”

സ്വന്തം പെങ്ങളുടെ ശബ്ദം കാതിലേക്ക് തുളച്ചു കയറിയ നേരം,, കിടക്കയിൽ എവിടെയോ ചുരുണ്ടു കിടന്ന മുണ്ടും വാരി എടുത്തു ഒരോട്ടം ആയിരുന്നു.,, പിന്നാമ്പുറത്തേക്ക്…. അടുക്കള വാതിലും ചാടി കടന്ന് പിന്നാമ്പുറത്തു എത്തിയപ്പോൾ ആണ് ആ ചോദ്യം മനസ്സിലേക്ക് ഓടി എത്തിയത്…. സഡ്ഡൻ ബ്രേക്ക് ഇട്ടപോലെ ഒന്ന് നിന്നു.. എന്നിട്ട് സ്വയം ചോദിച്ചു.

” ആരാ യീ ദേവി….? ”

ആളെ തിരിച്ചറിയാൻ ഒരല്പ നേരം തല പുകക്കേണ്ടി വന്നു. ആളെ മനസ്സിലായപ്പോൾ സ്വയം ഞെട്ടിപ്പോയി…. ഇന്നലെ രാത്രിയിൽ എപ്പോളോ വായിച്ചു തീർത്ത കഥയിലെ നായിക ആണ് ഈ കക്ഷി…

” അല്ല അതിന് ഞാൻ എന്തിനാ ഇപ്പോൾ ഈ ഓടുന്നത്…? ”

വായിച്ച കഥയെയും ഇനിയും തന്നെ വിട്ടു മാറാത്ത ഉറക്കത്തെയും ഒന്നിച്ചൊന്ന് പഴിച്ചു,, ഉടുത്ത മുണ്ട് ഒന്ന് കൂടി വൃത്തിയായി എടുത്തു കുത്തി. പതിയെ ഉമ്മറം ലക്ഷ്യമാക്കി നടന്നു.

അപ്പോഴും മനസ്സിൽ സംശയങ്ങൾ ബാക്കി പോലെ ..

” ആരായിരിക്കും വന്നത്? ”
എന്നതായിരുന്നു ആദ്യത്തെ സംശയം..

” ഇനി കഥയിലെ ദേവി തന്നെ ആയിരിക്കുമോ..? ”
എന്നതായി മറ്റൊരു സംശയം.