നിർഭയം 11 [AK] 204

മറുപടി അവളുടെ ഒരു ചിരിയായിരുന്നു… അതിന്റെ അർത്ഥം മനസ്സിലാക്കാനാവാതെ മുഖമുയർത്തിയപ്പോൾ അത്‌ മനസ്സിലായ പോലെന്ന പോലെ അവൾ എന്നോട് പറഞ്ഞു…

“ഇവിടെ വേറെ ആള് പണിയെടുക്കാനില്ലാത്തതല്ല… നിന്റെ പണിയെല്ലാം അവൾ ചോദിച്ചുവാങ്ങി ചെയ്യുന്നതാണ്…”

“ന്തിന്…”

“ഡാ പൊട്ടാ… അവൾക്ക് നിന്നോട് ഇഷ്ടമുണ്ടെന്ന് ഇതുവരെ മനസ്സിലായില്ലെന്ന് നീ പറയരുത്…”

മഞ്ജുവത് പറയുമ്പോൾ എനിക്ക് ചിരിക്കാതിരിക്കാനായില്ല… ശരിയാണ്.. കുറച്ചു നാളായി ഞാനത് ശ്രദ്ധിക്കുന്നുണ്ടെങ്കിലും ഒരു ഉറപ്പ് എനിക്കാവശ്യമായിരുന്നു… എന്തെന്നാൽ അവളോടും പറഞ്ഞറിയിക്കാനാകാത്ത വിധം എന്തോ ഒന്ന് എനിക്കുണ്ടെന്നുള്ളത് തന്നെ…

“നിനക്കെങ്ങനെ അതറിയാം…”

ഞാനത് ചോദിക്കുമ്പോൾ എന്റെ മുഖഭാവത്തിലൂടെ തന്നെ മനസ്സ് വായിച്ചത് കൊണ്ടാണെന്നു തോന്നുന്നു എന്നോടത് പറയാതെ അവളൊഴിഞ്ഞു മാറി..

വാതിൽ തുറന്നകത്ത് വന്ന ഗ്രീഷ്മ തെല്ലൊരു നേരം ഞങ്ങളെ നോക്കി നിൽക്കുന്നത് കണ്ടാണ് ഞാനവളെ അകത്തേക്ക് ക്ഷണിക്കുന്നത്…

“അപ്പോൾ ഗ്രീഷ്മേ…. തന്റെ ഭാവി പരിപാടിയെ കുറിച്ചായിരുന്നു ഞങ്ങൾക്ക് പറയാനുള്ളത്..”