നിർഭയം 11 [AK] 204

      *********************************

ശരീരമനങ്ങാനുള്ള സ്ഥിതിയിലേക്ക് മാറ്റം സംഭവിച്ചെങ്കിലും കുറച്ചു നാളുകളായി എന്നിൽ പിടികൂടിയ സംശയങ്ങൾ ഊട്ടിയുറപ്പിക്കുന്നത് പോലായിരുന്നു ഗ്രീഷ്മയുടെ പ്രവൃത്തി…സ്ഥിരം എന്നെ ചുറ്റിപ്പറ്റി നിൽക്കുന്നവളുടെ ഒഴിഞ്ഞുമാറ്റം കുറേയൊക്കെ ഞങ്ങളുടെ ഭൂതകാലത്തിലുള്ള അവളുടെ സ്ഥാനം ഏതാണ്ട് ഉറപ്പിക്കുകയാണ് ചെയ്തത്… അങ്ങനെയാകരുതേ എന്ന് ഞാൻ മനസ്സുരുകി പ്രാർത്ഥിക്കുന്നുണ്ടെങ്കിലും…കാരണം  അവളെ എങ്ങനെയോ ഞാൻ സ്നേഹിച്ചു പോയിരുന്നു…

തലയിലും അവിടവിടെയുള്ള ചെറിയ പാച്ച് വർക്കുകളുമായി ആശുപത്രിയിൽ നിന്നും ഞങ്ങളിറങ്ങുമ്പോൾ അനാവശ്യമായി പുറത്തേക്കിറങ്ങാനിടയാക്കരുതെന്ന് മഞ്ജു ഓർമിപ്പിച്ചു കൊണ്ടിരുന്നു… കാരണം ഞങ്ങൾ പൊയ്ക്കൊണ്ടിരുന്നത് അവളുടെ വീട്ടിലേക്കായിരുന്നു…. ഇനിയും മഞ്ജുവിന് പുറത്തിറങ്ങാൻ സമയമായിട്ടില്ല… ചില ഹയർ ഒഫീഷ്യൽസുമായി സംവദിച്ചതിനു ശേഷം ഒളിഞ്ഞുനിന്നുകൊണ്ടുള്ള ഒരന്വേഷണം… കൂട്ടത്തിൽ ചതിയുണ്ടാവുമ്പോൾ അതാണ് നല്ലതെന്ന് അവർക്കും തോന്നിക്കാണും… എത്രയും വേഗം കാര്യങ്ങൾ തീർത്തതിന് ശേഷം മറ്റു മൈതാനങ്ങളിലേക്ക്  അന്വേഷണവിധേയമായി ചേക്കേറാൻ ഞങ്ങൾ തീരുമാനിച്ചിരുന്നു… അതിനു മുന്നേ ഗ്രീഷ്മയെ സുരക്ഷിതമായി വീട്ടിൽ ഏൽപ്പിക്കണം… പിന്നെ അവളുടെ പഠനം… എല്ലാം ആവശ്യമാണിപ്പോൾ…

ചിന്നുവായിരുന്നു കാറിന്റെ സാരഥി.. പറമ്പിന്റെ ഗേറ്റ് കടന്ന് അകത്തെത്തിയപ്പോൾ തന്നെ കുഴപ്പമില്ലാത്ത ഒരു വീടായിരുന്നു കാണാൻ സാധിച്ചത്.. ഒറ്റനിലയുള്ള ഒരു വീട്… കാറിന്റെ ശബ്ദം കേട്ടതിനാൽ തന്നെ അകത്ത് നിന്നും ഒരു പെൺകുട്ടി ഓടിവന്നു ഞങ്ങളെ നോക്കി നിന്നിരുന്നു… രൂപം കണ്ടപ്പോൾ തന്നെ ഇതാകാം ഗ്രീഷ്മയുടെ അനിയത്തി എന്നത് ഞാൻ ഏതാണ്ട് ഉറപ്പിച്ചിരുന്നു… കൈ വിട്ടുപോയ എല്ലാം തിരിച്ചുപിടിക്കാനും എല്ലാ സഹായത്തിനും കൂടെ നിൽക്കാറുമുണ്ടായിരുന്ന നന്ദന്റെ വേർപാട് ഗ്രീഷ്മയുടെ വീട്ടുകാരെ അറിയിച്ചിട്ടുണ്ടായിരുന്നില്ല…

പതിയെ പുറത്തേക്കിറങ്ങിയപ്പോൾ ഉമ്മറത്തു നിന്നെത്തി നോക്കിയ പെൺകുട്ടിയുടെ കണ്ണുകളിലുണ്ടായിരുന്ന നഷ്ടപ്പെട്ട തിളക്കം ഞാൻ ശ്രദ്ധിച്ചു…

“അനിയത്തിയാണ്.. അർച്ചന… ഇപ്പോൾ ഡിഗ്രീ ചെയ്യുന്നു..”

ഗ്രീഷ്മയുടെ വാക്കുകളാണ് എന്റെ ശ്രദ്ധ തിരിച്ചത്…