നന്ദന 2[Rivana] 143

ഇവൻ ഇതെന്താ ഒന്നും എഴുതാതെ മാനത്തേക്ക് നോക്കി നിൽക്കാണോ എന്നും കരുതി ഞാനവന്റെ മുഖത്തേക്ക് നോക്കി.

അപ്പോൾ അവനുണ്ട് എന്റെ ആൻസർ ഷീറ്റിൽ  ഞാൻ എഴുതിയ ഉത്തരങ്ങളിലേക്ക് നോക്കിയിരിക്കുന്നു. ഞാൻ അവനെ നോക്കുന്നുണ്ട് എന്നവൻ കണ്ടതും എന്നെ നോക്കി വായിലെ പല്ല് മൊത്തം കാണിച്ചൊരു അളിഞ്ഞ ചിരി ചിരിച്ചു.

അത് കണ്ടപ്പോ ഞാൻ നൈസായിട്ട് ഒരു പുഞ്ചിരി കൊടുത്ത് വീണ്ടും ഉത്തരങ്ങൾ എഴുതാൻ തുടങ്ങി.

ഞാൻ പിന്നെ അവനെ അധികം ശ്രദ്ധ കൊടുക്കാതെ ആൻസർ എഴുതാൻ തുടങ്ങി. ഉത്തരങ്ങൾ അറിയാവുന്നത് കൊണ്ട് ഞാൻ നല്ല രീതിയിൽ തന്നെ ആൻസറുകൾ എഴുതി.

ഒരു മണിക്കൂറോളം കഴിഞ്ഞു കാണും എക്സാം തുടങ്ങിയിട്ട് അതിനിടയിൽ ഞാൻ അഡിഷണലായി മൂന്ന് ആൻസർ ഷീറ്റുകൾ വാങ്ങിച്ചു. ഇത് വരെ അവനെ ഞാനധികം മൈന്റ് ചെയ്തിരുന്നില്ല.

സെക്കന്റ് ബെല്ല് അടിച്ചത് കേട്ടപ്പോൾ ഞാൻ വെറുതെ തല ഉയർത്തി സൈഡിലേക്കൊക്കെ ഒന്ന് നോക്കി. അപ്പോഴാണ് അവൻ എഴുതുന്നതും ഞാൻ ശ്രദ്ധിച്ചത്.

അവൻ നല്ല ഫ്ലോയിൽ എഴുതി കൊണ്ടിരിക്കുന്നുണ്ട് .ഒരു മീഡിയം വേഗത ഉണ്ട് എഴുത്തിന്. അവൻ എഴുതുന്നത് നോക്കുന്നതിനിടയിലാണ് ഒരു കാര്യം എന്റെ കണ്ണിൽ പെട്ടത്.

ഡെസ്കിൽ വച്ച അവന്റെ ഇടത് കയ്യിനുള്ളിൽ കട്ട്‌ ചെയ്തതായ ഒരു പേപ്പർ കഷ്ണം. അതവൻ കൊസ്റ്റൈൻ പേപ്പർ കൊണ്ടും ഇടത് കൈകൊണ്ടും മറച്ചു പിടിച്ചിരിക്കുന്നു. ഇടക്ക് ഇടക്ക് വളരെ നോർമാലായി ആർക്കും സംശയം തോന്നത്തക്കവിധം ചെറിയ മറവിലൂടെ ആ പേപ്പറിലേക്ക് നോക്കുന്നു. എന്നിട്ട് അതിൽ ഉള്ളത് അൻസർ പേപ്പറിലേക് എഴുതുകയും ചെയ്യുന്നു.

പെട്ടെന്ന് ആർക്കും അവൻ കോപ്പിയടിച്ചു എഴുതുകയാണെന്ന് മനസിലാകില്ല. അത്രയും പെർഫെക്റ്റ് ആയിട്ടാണ് അവൻ അത് ചെയ്യുന്നത്.

ഞാൻ അവന്റെ കൈയ്യിന്റെ ഉള്ളിൽ കൂടെയാണ് ആ കോപ്പി ഉള്ളതായി കണ്ടത്.

കുറച്ചു നേരം അവൻ കോപ്പിയടിക്കുന്നത് നോക്കിയിരുന്നു ഞാൻ. ഇവന് എന്ത് ധൈര്യമാണ് മിസ്സ്‌ അടുത്ത് കൂടെ നടക്കുമ്പോഴും ഒരു കൂസലും ഇല്ലാതെ കോപ്പിയടിക്കുന്നു. ഒരു പേടിയും ആ മുഖത്ത് ഇല്ല.

ഞാനൊക്കെ ആണെങ്കിൽ ഇപ്പൊ പേടിച്ചു ഒരു വിധം ആയിക്കാണും ഓർക്കാൻ കൂടെ വയ്യ. ഞാൻ അവൻ ചെയ്യുന്നത് നോക്കി ഇരുന്നത് കൊണ്ടാകും അവൻ എന്റെ മുഖത്തേക്കും പിന്നെ അവന്റെ കയ്യിൽ ഉള്ള കോപ്പിയിലേക്കും രണ്ടു തവണ നോക്കി.

എന്നിട്ട് നല്ലൊരു ചിരി എനിക്ക് തന്നിട്ട് ആ കോപ്പി ഇടത് കയ്യിൽ എടുത്തിട്ട് എന്റെ നേരെ നീട്ടി വേണോ എന്ന് പതിയെ ചോദിച്ചു.

ഒരു നിമിഷം ഞാൻ അന്താളിച്ചു പേടിച്ചു നിന്നെങ്കിലും പെട്ടെന്ന് തന്നെ ഞാൻ തലയാട്ടി വേണ്ടന്ന് പറഞ്ഞു. കൂടുതൽ ഒന്നും പറയാൻ നിക്കാതെ വേഗം എന്റെ അൻസർ ഷീറ്റിലേക്കും കോസ്റ്റൻ പേപ്പറിലേക്കും നോക്കി ഉത്തരങ്ങൾ ചറ പറാന്ന് കുത്തി കുറിക്കാൻ തുടങ്ങി.