ദി ഡാർക്ക് ഹവർ 14 {Rambo} 1817

അന്ന് ആ പള്ളിയിൽ ചെന്നപ്പോഴും ഇത്തരത്തിലൊരു മിന്നൽ അവിടം പതിച്ചതവൾ ഓർമ്മിച്ചു..
അതിന്റെ ഒരുൾപ്രേരണയാലെയാണ് അവളന്നെരം തന്നെ അങ്ങോട്ട് വെച്ചുപിടിക്കാനിടയായതും…!!

ആ കുന്നിൻ ചുവട്ടിൽ വണ്ടി നിർത്തുമ്പോൾ… അവൾക്ക് ഊഹം തെറ്റിയിരുന്നില്ല എന്ന് മനസ്സിലായി ..

ജോണിന്റെ ബൈക്ക് അവിടെ ഒതുക്കിനിർത്തിയത് അപ്പോഴേക്കും അവളുടെ ദൃഷ്ടിയിൽപതിഞ്ഞു..

അതോടെ.. ഉള്ളിലെ ആധി വീണ്ടും കത്തിജ്വലിച്ചുകൊണ്ടിരുന്നു..!! വണ്ടിയിൽനിന്ന് ചാവിയൂരിയെടുക്കാൻ പോലുമുതിരാതെ അവൾ ആ കുന്നിനുമുകളിലേക്ക് കുതിക്കുകയായി..

കുറച്ചുനാൾ വർക്ക്ഔട്ട് ചെയ്യാത്തതിന്റെ വേവലാതികൾ അവളെ ആ കുന്നിലേക്ക് ഓടിക്കയറുമ്പോൾ പിന്നോട്ടടിക്കാൻ ശ്രമിച്ചെങ്കിലും.. തന്റെ ലക്ഷ്യം അതിനെയെല്ലാം സാധൂകരിച്ചുകൊണ്ടിരുന്നു…

ഒരുവിധം അവിടെയെത്തിയെങ്കിലും.. അവിടെ തന്റെ മനസ്സിനെ നുറുക്കാനുതകുന്ന കാഴ്ചയാണുള്ളതെന്നത് അവളറിഞ്ഞിരുന്നില്ല…!!!

×××××

ഇതേസമയം…മെക്ലാർനെസ്സിൽ..

തന്റെ കൊട്ടാരത്തിലെ ബാൽക്കണിയിൽ നിൽക്കുകയായിരുന്നു ഇദ്രിസ്..

മാക്‌സ് ഇവിടുന്ന് പോയിട്ടിപ്പോൾ ഒരു ദിവസം കഴിഞ്ഞിരിക്കുന്നു..

പക്ഷേ…. അയാളുടെ ഉറക്കം നഷ്ടപ്പെട്ടിട്ട് കുറച്ചുകാലമായി…
അത് വരാനിരിക്കുന്ന അവരുടെ ഭാവിയെക്കുറിച്ചാലോചിച്ചിട്ടാവാം..

ആ സ്ഥലത്ത് നിന്നു നോക്കിയാൽ ആ നാടൊട്ടുക്കും കാണാനാവുമായിരുന്നു…
അത്രയുമുയർച്ചയിലാണ് ആ കൊട്ടാരം സ്ഥിതി ചെയ്തിരുന്നത്..

അയാൾ… ആ ഇരുളിൽ അതിന്റെ ഭംഗിയുമാസ്വദിച്ചുനിന്ന നേരം.. അയാളുടെ പത്നി അങ്ങോട്ടേക്ക് കടന്നുവരികയുണ്ടായി..

“”എന്താണ്…??

കുറച്ചുദിവസമായി വല്ലാത്ത ആലോചനയിലാണല്ലോ അങ്..??””

പുറകിലൂടെവന്ന് ഇദ്രിസിന്റെ മുതുകിൽ തഴുകിക്കൊണ്ട് ജുവാന ചോദിച്ചു..

“”ഒന്നുമില്ലെടോ…

ഞാൻ ചുമ്മാ…””

വിദൂരതയിലേക്ക് ദൃഷ്ടിപായിച്ചുകൊണ്ടുതന്നെ അയാൾ പറഞ്ഞുനിർത്തി..