ദിവ്യാനുരാഗം 2 ❤️ [Vadakkan Veettil Kochukunj] 408

പുള്ളിക്കാരിയുടെ മറുപടി കേട്ടതും സമയം ഇല്ലാന്ന് പറഞ്ഞ് ഒഴിയാൻ നോക്കിയ എന്നോട് ഒരു സമയ കുറവുമില്ല കഴിച്ചിട്ട് പോയാ മതിന്നുള്ള അച്ഛൻ്റെ ശാസനവും വന്നു… ഇനിയും എന്തേലും പറഞ്ഞാ രണ്ടാളും കൂടി എന്നെ കെട്ടിയിട്ട് തീറ്റിക്കും… അതുകൊണ്ട് ഡൈനിങ് ടേബിളിലിരുന്ന് എന്തൊക്കെയോ കുറച്ച് കഴിച്ചിട്ട് അവരോട് രണ്ടാളോടും യാത്ര പറഞ്ഞ് ഞാൻ അവൻ്റെ വീട്ടിലേക്ക് തിരിച്ചു.

അവൻ്റെ വീട്ടിൽ പോയി കാര്യങ്ങളൊക്കെ പറഞ്ഞ് ഒരു വിധത്തിലാണ് അവരെ ആശ്വസിപ്പിച്ച് ഹോസ്പിറ്റലിൽ എത്തിച്ചത്.ഓർക്കാൻ കൂടി വയ്യ അവൻ്റമ്മ ഗിരിജാൻ്റിയും പെങ്ങള് നീതുവും രണ്ടാളും പാവങ്ങളാ എന്തോ അവരുടെ കണ്ണീര് കണ്ടത് വല്ലാത്തൊരു അവസ്ഥ തന്നാർന്നു… പിന്നെ കുഴപ്പങ്ങളൊന്നും ഇല്ലാന്നൊക്കെ പറഞ്ഞ് എങ്ങനെയൊക്കയോ ഹോസ്പിറ്റലിൽ വരെ എത്തിച്ചു… പക്ഷേ ഐസിയുവിലെ അവൻ്റെ കിടപ്പ് കണ്ട് അവരുടെ കൺട്രോള് പിന്നേം പോയി…

കുറച്ച് പാടുപെട്ടു അവരെ ഒന്ന് സമാധാനിപ്പിക്കാൻ ഇപ്പോൾ കൂട്ടിന് അവന്മാരും ഉള്ളതുകൊണ്ട് ഏറെക്കുറെ ഒരു ആശ്വാസമായി… അപ്പോളാണ് അഭിൻ അവിടേക്ക് വന്ന ശ്രദ്ധയെ പറ്റി പറയുന്നതും അവളെ കാണിച്ചുതരുന്നതും അവള് വന്നതോടുകൂടി ആൻ്റിക്കും നീതുവിനും കുറച്ച് ആശ്വാസമായി…

സമയം പിന്നെയും ഒരുപാട് നീങ്ങി അപ്പോഴാണ് ഞാൻ ഓർത്തത് ഇവളുടെ കൂടെയല്ലേ നേരത്തെ ആ ശൂർപ്പണകയെ കണ്ടത്… അതെങ്ങാനുമുണ്ടോ ഈ പരിസരത്ത് നേരത്തെ വെല്ലുവിളിച്ച് പോയതാ.. ഞാൻ ചുറ്റുപാടും ഒന്ന് വീക്ഷിച്ചു…ഹേ ഇല്ല ഭാഗ്യം…

” ഇയാൾ എന്താ നോക്കുന്നേ… ”

ചോദ്യം കേട്ടാണ് ഞാൻ തിരിഞ്ഞത് ശ്രദ്ധയായിരുന്നു

” അല്ല തന്നെയല്ലേ ലിഫ്റ്റിനടുത്ത് വെച്ച് നേരത്തെ കണ്ടത് അപ്പോൾ കൂടെയുണ്ടായിരുന്ന കൂട്ടുകാരിയെ തപ്പുവായിരുന്നു… ആ കൊച്ചിന് വല്ല കൊഴപ്പോണ്ടോ…? ”

അവൾ ചോദിച്ചതിനുള്ള മറുപടിയും കൂട്ടത്തിൽ എൻ്റെ കാര്യമായ സംശയവും ഞാൻ അവളോട് ചോദിച്ചു. അതിന് അവളുടെ ചിരിച്ചുകൊണ്ടുള്ള മറുപടിയും വന്നു..