ചത്തവന്റെ ഡയറി

Author : Tom David

“ടോ…. രാജേന്ദ്ര ആ ചത്തവന്റെ വീട്ടിൽ നിന്നു കിട്ടിയ സാധങ്ങൾ എല്ലാം ഇങ്ങു കൊണ്ടുവന്നേ”

അത്രയും പറഞ്ഞു എസ്. ഐ. ദേവൻ തന്റെ മുറിയിലേക്ക് കയറി.

അകത്തു ചെന്ന് ഫാനിന്റെ ചുവട്ടിൽ കുറച്ചു നേരം വിശ്രമിക്കാനായി ഇരുന്നപ്പോൾ ആണ് ടെലിഫോണിൽ ആരോ വിളിക്കുന്നത്‌.

“ഹലോ, എസ്. ഐ. ദേവൻ ഹിയർ…

ഒക്കെ സാർ ചെയ്തോളാം സാർ….
ഇല്ല ഒരു പ്രശ്നവും വരാതെ ഞാൻ നോക്കിക്കോളാം സാർ”

അത്രയും പറഞ്ഞു അയ്യാൾ ഫോൺ വച്ചു തീർന്നതും രാജേന്ദ്രൻ സാധങ്ങളുമായി എത്തി.

അയ്യാളെ പറഞ്ഞു വിട്ട ശേഷം സാധങ്ങൾ ഓരോന്നായി എടുത്തു പരിശോധിക്കാൻ തുടങ്ങി.

കുറെ സാധങ്ങൾ എല്ലാം നോക്കി പെറുക്കി മാറ്റി വച്ചപ്പോൾ ആണ് ഒരു ബുക്ക്‌ ദേവന്റെ ശ്രദ്ധയിൽ പെടുന്നത്. അത് സാവധാനം എടുത്തു മറിച്ചു നോക്കിയപ്പോൾ അയ്യാൾക്ക് മനസ്സിലായി അത് അവന്റെ ഡയറി ആണെന്ന്.
അയ്യാൾ അതിൽ അവസാനമായി എഴുതിയിരിക്കുന്ന പേജ് എടുത്തു അതിൽ ചോരയുടെ പാട് ഉണ്ടായിരുന്നു അയ്യാൾ വായിക്കാനായി ആരംഭിച്ചു.

13/1/2022
വ്യാഴം

ഇന്നും രാവിലെ തന്നെ എഴുന്നേറ്റു. ജോലി തരാം എന്ന് പറഞ്ഞു കാശു മേടിച്ച കമ്പനിയുടെ പരിസരത്തൊക്കെ പോയി നോക്കി അടച്ചിട്ടിരിക്കുകയായിരുന്നു. അടുത്തുള്ള ആളുകളോടൊക്കെ ചോദിച്ചപ്പോൾ അവർ ഇവിടം വിട്ടു പോയെന്നും എന്തോ ഉടായിപ്പ് ടീംസ് ആയിരുന്നു എന്നും അറിയാൻ കഴിഞ്ഞു.

അങ്ങനെ അവസാനത്തെ പിടിവള്ളിയും കയ്യിൽ നിന്നു പോയി എന്ന വിഷമത്തിൽ ഞാൻ എന്നും ചെന്നിരിക്കാറുള്ള പാർക്കിൽ പോയി ഇരുന്നു. അവിടെ കുറെ ഒക്കെ ശാന്തം ആരുന്നു മനസ്സിന് കുറച്ചൊക്കെ സമാധാനം തോന്നി.

അവിടെ ഇരുന്നപ്പോൾ ഒരു പ്രണയജോടികളെ കാണാൻ സാധിച്ചു അവരിൽ ആരുടെയോ പിറന്നാൾ ആയിരുന്നു എന്ന് തോന്നുന്നു അവരുടെ ഒരു കൂട്ടുകാരനുമായി ചേർന്ന് എന്തോ സർപ്രൈസ് ഒക്കെ കൊടുക്കുന്നത്.

അപ്പോഴൊക്കെ ഞാൻ ഓർത്തു എത്ര കൂട്ടുകാർ കൂടെ ഉണ്ടായിരുന്ന ആളാണ്‌ ഞാനെന്നു. പക്ഷെ ഇപ്പൊ ഒരാൾ പോലും ഇല്ല പിന്നെ സ്നേഹിക്കാൻ ഒരു പെണ്ണും ഇല്ലാതിരുന്നതുകൊണ്ട് അത് നഷ്ടപ്പെടുമ്പോൾ ഉള്ള വിഷമം അറിഞ്ഞിട്ടില്ല എന്നുള്ളതാണ് ഒരേയൊരു ആശ്വാസം.